جايىق وزەنىنە سۋدىڭ كەلۋىنە بايلانىستى اتىراۋ وبلىسى ايرىقشا باقىلاۋدا، مونيتورينگ جالعاسۋدا. بۇل تۋرالى وكق-دا وتكەن باسپا ءسوز ءماسليحاتىندا ايتىلدى، دەپ حابارلايدى Ulys.
اتىراۋ قالاسىندا جايىق وزەنى بويىندا بوگەتتەردى نىعايتۋ جۇمىستارى ۇزدىكسىز جۇرگىزىلىپ جاتىر. دروننىڭ كومەگىمەن سۋ تاسقىنى جاعدايىنا مونيتورينگ جۇزەگە اسىرىلۋدا. اتىراۋ وبلىسىنا بەرىلگەن كۇشتەر مەن قۇرالدار سۋ تاسقىنىنا قارسى جۇمىستاردى جالعاستىرۋدا. بۇعان دەيىن بروننان شىعارىلعان جىلجىمالى سورعى ستانسيالارى سۋ باسقان اۋماقتاردان سۋ سورۋ جۇمىستارىنا جۇمىلدىرىلدى.
«سولتۇستىك قازاقستان، اتىراۋ جانە اقتوبە وبلىستارىندا 6 379 تۇرعىن ءۇي مەن 2 794 اۋلا اۋماعىنان سۋدىڭ باعىتى بۇرىلىپ، سۋ سورىلدى. رەسپۋبليكا بويىنشا 37 مىڭنان استام ادام ءوز ۇيلەرىنە ورالدى. 6 مىڭنان استام ادام ەۆاكۋاسيالاۋ پۋنكتتەرىندە ورنالاسقان»، - دەدى ق ر تجم وكىلى اسقار ءشارىپ وكق الاڭىندا وتكەن بريفينگتە.
اۆاريالىق-قۇتقارۋ جانە سۋ تاسقىنىنا قارسى جۇمىستارعا 21 مىڭنان استام ادام، 2 مىڭنان استام ءتۇرلى تەحنيكا، 615 سۋ سورۋ جانە ءجۇزۋ قۇرالى، 8 اۋە كەمەسى جۇمىلدىرىلدى.
سۋ تاسقىنى باستالعالى بەرى 12 ملن استام تەكشە مەتر ەرىگەن قار سۋى سورىپ شىعارىلدى، 6،6 ملن استام قاپشىق جانە 1،5 ملن استام توننا ينەرتتى ماتەريال توسەلدى.
جالپى ازاماتتىق قورعاۋ قىزمەتتەرىمەن اتىراۋ، اقتوبە، اقمولا، باتىس جانە سولتۇستىك قازاقستان وبلىستارىندا سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جانە حالىققا كومەك كورسەتۋ بويىنشا جۇمىستار جالعاسۋدا.