«تازا قازاقستان» اكسياسى اتباسارلىقتاردىڭ ساناسىندا سەرپىلىس تۋدىردى، دەپ حابارلايدى Ulys.
ەكى مىڭنان استام ادام - قالا جانە اۋدان تۇرعىندارى، قالانىڭ بارلىق ۇيىمدارى مەن كاسىپورىندارىنىڭ قىزمەتكەرلەرى - اتباسارداعى «تازا قازاقستان» ەكولوگيالىق اكسياسىنا قاتىستى.
بۇگىن ورتالىق الاڭدا اتباسار اۋدانىنىڭ اكىمى امانبەك قالجانوۆ قارسى العان اكسياعا قاتىسۋشىلارىنىڭ شەرۋى ءوتتى.
«مەملەكەت باسشىسى قاسىم-جومارت توقايەۆتىڭ باستاماسىمەن 2024 جىلعى 6 ساۋىردەن باستاپ 11 مامىر ارالىعىندا «تازا قازاقستان» رەسپۋبليكالىق ەكولوگيالىق اكسياسى ءوتتى. بۇل اكسيا ءالى دە جالعاسىن تابۋدا. سۋ تاسقىنىنان كەيىن، اسىرەسە، اۋدان قالالارى مەن اۋىلدارىن قالىپقا كەلتىرۋ كەرەك، ونىڭ ىشىندە، كوشەلەردە كوكتەمگى تازالىق جاساپ، ساياباقتار مەن سكۆەرلەردى اباتتاندىرۋ كەرەك. بۇنىن ءبارى ءوز قالاڭىزدىڭ كەيپىن بۇرىنعىدان دا جاقسارتۋ ءۇشىن قاجەت»، - دەدى امانبەك قالجانوۆ.
27 ساۋىرگە دەيىن «جاسىل ايماق» تاقىرىبىنداعى اپتا اعاش كوشەتتەرىن وتىرعىزۋمەن جانە ەكپەلەردى اقتاۋمەن اتاپ ءوتىلدى. اتباسار اۋدانىندا بارلىعى 1613 كوشەت وتىرعىزىلدى. 4 مامىرعا دەيىن وتكىزىلگەن «ونەگەلى ۇرپاق» كەزەڭى - ارداگەرلەر اۋلالارى مەن قارتتار ۇيلەرىنىڭ اۋماقتارىن تازالاۋعا جانە اباتتاندىرۋعا ارنالعان. سوڭعى، بەسىنشى اپتادا «ءمولدىر بۇلاق» دەگەن اتاۋمەن سۋ ايدىندارىن (وزەندەر مەن كولدەر) جانە جاعالاۋ اۋماقتارىن تازارتۋ جۇمىستارى جۇرگىزىلدى.
اتالعان ەكولوگيالىق اكسياعا اتباسار اۋدانىنىڭ تۇرعىندارى، قوعام بەلسەندىلەرى، ۇيىمدار مەن كاسىپورىنداردىڭ قىزمەتكەرلەرى بەلسەندى قاتىستى. اۋدان بويىنشا بارلىعى 365 توننا قوقىس پەن قالدىقتار شىعارىلدى.
- اتباساردىڭ بارلىق تۇرعىندارىن «تازا قازاقستان» رەسپۋبليكالىق اكسياسىنا قوسىلۋعا شاقىرامىن. بىرىگىپ، قالامىزدى تازارتايىق! - دەدى اۋدان باسشىسى.
اكسيا اياسىندا اباتتاندىرۋ ءۇشىن ورىندار انىقتالدى - بۇل جالپىقالالىق جاعاجاي، قالا كوشەلەرى-ەسەنبەرلين، اۋەزوۆ، اعىباي باتىر جانە باسقالار. قالانىڭ ورتالىق الاڭىندا كانادالىق جانە ساندىك بۇتالاردىڭ راۋشان كوشەتتەرى وتىرعىزىلدى.
اكسياعا اتباسار ەلەكتروۆوز جوندەۋ زاۋىتىنىڭ، «اتباسار سۋ» كوممۋنالدىق كاسىپورنىنىڭ، «اجدار ي ك» ۆاگون جوندەۋ كاسىپورنىنىڭ، اتباسار اۋدانىنىڭ مەملەكەتتىك مەكەمەلەرىنىڭ، ءبىلىم بەرۋ جانە دەنساۋلىق ساقتاۋ مەكەمەلەرىنىڭ، كوممۋنالدىق قىزمەتتەردىڭ جانە اۋداننىڭ قالا جانە اۋىل تۇرعىندارىنىڭ وكىلدەرى،اتباسار اگرارلىق-يندۋستريالىق كوللەدجىنىڭ ۇجىمى مەن ستۋدەنتتەرى، جاستار رەسۋرستىق ورتالىعىنىڭ بەلسەندىلەرى، ەرىكتىلەر اكسياعا ۇلكەن ىنتامەن قاتىستى.