8-10 قاراشادا استاناداعى جاقسىلىق ۇشكەمپىروۆ اتىنداعى جەكپە-جەك سارايىندا جاۋىنگەرلىك، سپورتتىق جانە زاعيپتار اراسىندا سامبودان الەم چەمپيوناتى وتەدى. وسى ءىس-شاراعا 85 ەلدەن سپورتشىلار قاتىسادى. بۇل تۋرالى ورتالىق كوممۋنيكاسيالار قىزمەتىندەگى باسپا ءسوز ءماسليحاتىدا ءمالىم بولدى. 

«الەم چەمپيوناتىنا قاتىسۋعا 85 مەملەكەتتەن 600-دەن استام سپورتشى ءوتىنىم بەردى. سونىمەن قاتار، بۇل ەلدەردەن 150-گە جۋىق باپكەر كەلەدى. الەمگە تانىمال سپورتشىلار دا شاقىرتۋ الدى، ياعني ءفودور ەمەليانەنكو ەلوردادا قوناعىمىز بولادى»، - دەدى قازاقستان سامبو فەدەراسياسىنىڭ ءبىرىنشى ۆيسە-پرەزيدەنتى ماناربەك بيسەكەنوۆ.

جارىستا ەرلەر سپورتتىق سامبودان 58،64،71،79،88،98،+98 كەلى سالماقتا، ايەلدەر 50،54،59،65،72،80+80 كەلى سالماقتا بەلدەسەدى. ال جاۋىنگەرلىك سامبودان ەرلەر 58،64،71،79،88،98،+98 كەلى سالماق دارەجەسىندە، ايەلدەر 50،54،59،65،72،80+80 كەلى سالماق دارەجەسىندە باقتارىن سىنايدى. زاعيپ جاندار 3 سالماقتا، ياعني 64،79،98 كەلى سالماق دارەجەسىندە كۇرەسەدى. جەڭىمپازدارعا مەدال، ديپلومداردان بولەك اقشالاي سىيلىقتار تابىستالادى. 

«وسى دوداعا 311 مىڭ اقش دوللارى سوماسىندا اقشالاي سىيلىق تىگىلەدى. ءبىرىنشى ورىن العان سپورتشىلارعا 4 مىڭ دوللار، ەكىنشى ورىنعا – 3 مىڭ دوللار، ءۇشىنشى ورىن العان ەكى سپورتشىعا 2 مىڭ دوللاردان بەرىلەدى»، - دەدى م. بيسەكەنوۆ. 

ۇلتتىق قۇراما كوماندانىڭ باس باپكەرى ءبىرجان يماحانوۆ چەمپيوناتقا قاتىساتىن سپورتشىلاردىڭ دايىندىعى جوعارى دەڭگەيدە ەكەنىن جەتكىزىپ، بۇنداي جارىستاردى ەلىمىزدە وتكىزۋ ۇلكەن مارتەبە ەكەنىن ايتتى.

«الەم چەمپيوناتىنا قاتىساتىن سپورتشىلار 24 قازاننان بەرى ەلوردادا وقۋ-جاتتىعۋ جيىنىن باستاپ كەتتى. قازاقستاننان 28 سپورتشى ەل نامىسىن قورعايدى. جالپى، الەم چەمپيوناتىنىڭ قازاقستاندا ءوتۋى ۇلكەن جاۋاپكەرشىلىك جانە ۇلكەن مارتەبە. ونىمەن قوسا، وسىنداي چەمپيوناتتار مەملەكەتىمىزدىڭ تۋريزم سالاسىنىڭ دامۋىنا وڭ اسەرىن بەرەدى دەپ ويلايمىن. سامبوشىلارىمىز دودادا قارسىلاستارىمەن تاجىربيە الماسىپ، جاڭا دەڭگەيگە ءبىر ساتى وسەتىن بولادى»، - دەدى ب. يماحانوۆ.

ءوز كەزەگىندە قازاقستان سامبو فەدەراسياسىنىڭ باس حاتشىسى ەرنازار بەكسۇلتانوۆ فەدەراسيادا تىركەلگەن 43 مىڭعا جۋىق سپورتشى بار ەكەنىن ايتتى. 

«ءبىزدىڭ سپورتشىلار الداعى الەم چەمپيوناتىندا دا ەسەلەرىن جىبەرمەي، بوز كىلەمدە بارىن سالىپ، التىن مەدالدى قورجىنعا سالادى دەگەن ءۇمىت بار. فەدەراسيا جىل سايىن سامبودان قازاقستان رەسپۋبليكاسى چەمپيوناتىن وتكىزىپ كەلەدى. كەلەر جىلى كلۋبتىق سيستەمانى دامىتىپ، جاستار، جاسوسپىرىمدەر جانە كادەتتەر سانىن كوبەيتۋ، كىشكەنتاي بۇلدىرشىندەردى سپورتقا باۋلۋ جوسپارى بار»، - دەدى ە. بەكسۇلتانوۆ.