8-13 قىركۇيەك ارالىعىندا استانادا ەتنيكالىق سپورت تۇرلەرى بويىنشا حالىقارالىق سپورتتىق جارىستار – V دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن ەكى مىڭنان استام ادام قاتىسادى، دەپ حابارلايدى ەلوردا اكىمدىگىنىڭ رەسمي سايتى.
ويىندار ءۇش باعىت، ياعني سپورت، مادەنيەت جانە عىلىم بويىنشا وتەدى.
دۇنيەجۇزىلىك كوشپەندىلەر ويىندارىنىڭ ينفراقۇرىلىمىنا ەلوردالىق 6 نىسان كىردى: "استانا-ارەنا" ستاديونى، "قازانات" يپپودرومى، ج. ۇشكەمپىروۆ اتىنداعى جەكپە-جەك سارايى، "الاۋ" مۇز ايدىنى سارايى، "Qazaqstan" جەڭىل اتلەتيكالىق سپورت كەشەنى، "دۋمان" كەشەنى.
"قازانات" يپپودرومىندا جانە ەتنواۋىل اۋماعىندا ات جارىسى، ءداستۇرلى ساداق اتۋ جانە قۇستارمەن اڭ اۋلاۋدىڭ ۇلتتىق تۇرلەرى بويىنشا جارىستار، سونداي-اق ات جارىستارى وتەدى. ج. ۇشكەمپىروۆ اتىنداعى جەكپە-جەك سارايى مەن "الاۋ" مۇز ايدىنى سارايىندا ۇلتتىق كۇرەس، جەكپە-جەك جانە حالىق ويىندارى بويىنشا جارىستار، "دۋمان" كەشەنىندە ءداستۇرلى زياتكەرلىك ويىندار وتەدى. "Qazaqstan" جەڭىل اتلەتيكالىق سپورت كەشەنىندە اككرەديتتەۋ جانە جابدىقتاۋ ورتالىقتارى ورنالاساتىن بولادى.
ويىنداردىڭ عىلىمي باعدارلاماسىنىڭ ءىس-شارالارى ق ر ۇلتتىق مۋزەيىندە وتەدى.
وڭتۇستىك-باتىس جاعىنان "قازانات" يپپودرومىنا ىرگەلەس 10 گا اۋماقتا ورنالاسقان "كوشپەندىلەر الەمى" ەتنواۋىلى ۆيك مادەني باعدارلاماسىن ىسكە اسىرۋ ءۇشىن باستى الاڭ بولادى، سونداي-اق مادەني باعدارلاما شەڭبەرىندەگى ءىس-شارالار استانانىڭ ءتۇرلى الاڭدارىندا (الاڭدار، ساياباقتار، سكۆەرلەر، باسقا دا قوعامدىق كەڭىستىكتەر، تەاترلار، كونسەرت زالدارى، كينوتەاترلار، مۇراجايلار، كورمە پاۆيلوندارى جانە ت. ب.) وتەدى.
سپورتتىق باعدارلاما جارىستاردى سپورتتىڭ 21 تۇرىنەن قامتيدى. ونىڭ ىشىندە:
* اسىق اتۋ
* وردو
* ارقان تارتىس
* بايگە
* كوكپار
* اۋدارىسپاق
* تەڭگە ءىلۋ
* قازاق كۇرەسى
* اشىرتمالى ابا گۇرەشي
* كورەش (بەلبەۋ تاتار كۇرەسى)
* كوكبورۋۋ
* الىش
* ماس-رەستلينگ
* Powerful nomad (الىپتار سايىسى)
* توعىزقۇمالاق (توعىزقورعۇل)
* مانگالا
* وۆاري
* جامبى اتۋ
* ءداستۇرلى ساداق اتۋ
* قۇسبەگىلىك
* قۇراش (وزبەك كۇرەسى)
ويىنداردا 100-گە جۋىق مەدال جيىنتىعى ويناتىلادى.
