ىشكى ىستەر مينيتسرلىگى 22-24 مامىر ارالىعىندا «STOP-ترافيك» جەدەل الدىن الۋ شاراسىن وتكىزدى. ونىڭ بارىسىندا ادام ساۋداسىنىڭ 49 فاكتىسى، ونىڭ ىشىندە كامەلەتكە تولماعاندارعا قاتىستى توعىز فاكت انىقتالدى، دەپ حابارلايدى Polisia.kz.
ادامدار «ترافيگىمەن» بايلانىستى زاڭعا قايشى ارەكەتتەردى جۇزەگە اسىرعان كۇدىكتىلەرگە قاتىستى ۇيىمداسقان قىلمىستىق توپ قۇرۋ جانە وعان باسشىلىق ەتۋ دەرەكتەرى بويىنشا ءۇش تەرگەۋ باستالدى.
مىسالى، استانا قالاسىندا توعىز «ەليتالىق» مونشا كەشەنىنىڭ اۋماعىندا جاس قىزداردى سەكسۋالدىق قاناۋ جانە ماجبۇرلەۋ بويىنشا قىلمىستىق جۇيەنى جولعا قويعان 17 ادامنان تۇراتىن توپتىڭ قىلمىستىق ارەكەتىنىڭ جولى كەسىلدى.
30-دان استام ءتىنتۋ كەزىندە اقشا جانە التى اۆتوكولىك تاركىلەندى.
نەگىزگى فيگۋرانتتار قاماۋعا الىندى.
شىمكەنت قالاسىندا وسىعان ۇقساس ۇيىمداسقان قىلمىستىق توپ اشكەرەلەندى. مۇندا جالپى سوماسى 1 ملن تەڭگە جانە 16 مىڭ اقش دوللارىنان استام قاراجات، 10 اۆتوكولىك تاركىلەندى.
توپ جەتەكشىلەرى مەن مۇشەلەرى قاماۋعا الىندى.
— پەتروپاۆل قالاسىندا 2023 جىلدان باستاپ زورلىق-زومبىلىق پەن بوپسالاۋ ارقىلى جاس قىزداردى جىنىستىق قاناۋعا ماجبۇرلەپ كەلگەن قىلمىستىق توپ ارەكەت ەتكەن. ۇيىمداسقان قىلمىستىق توپ قۇرۋ، باسقارۋ جانە وعان قاتىسۋ دەرەگى بويىنشا قىلمىستىق ءىس تەرگەلۋدە، — دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
ءبىرقاتار وڭىردە الەۋمەتتىك وسال توپتاردان شىققان ادامداردى قايىر سۇراۋعا ماجبۇرلەۋ فاكتىلەرى انىقتالدى.
— قاراعاندى قالاسىندا مۇمكىندىگى شەكتەۋلى جاندارعا قوقان-لوققى جانە كۇش كورسەتىپ، ولاردى قايىر سۇراۋعا ماجبۇرلەپ، «بيزنەس» ۇيىمداستىرعان ادامدار توبى ۇستالدى. قىلمىسكەرلەر ءوز قۇرباندارىنىڭ ەسەبىنەن جىلىنا 10 ملن تەڭگەگە دەيىن تابىس تاۋىپ وتىرعان. وسىعان ۇقساس قىلمىستىق توپتاردىڭ ارەكەتتەرى اقتوبە، الماتى جانە ماڭعىستاۋ وبلىستارىنىڭ اۋماعىندا اشكەرەلەندى. وندا مۇگەدەكتەر مەن جاس بالالاردى بازارلار مەن ۆوكزالدار اۋماعىندا پايدالانعان. بارلىق قىلمىسكەرلەر قۇرىقتالدى. بۇل باعىتتاعى جۇمىس جۇيەلى تۇردە جۇرگىزىلەدى، — دەدى قۋاندىق الپىس.
