ارىستا اسكەري ءبولىم اۋماعىندا 3 ادام قازا تاپتى. بۇل تۋرالى قورعانىس مينيسترلىگى مالىمدەدى، دەپ حابارلايدى Ulys.
ولار كارىز جۇيەسىن تازارتۋ كەزىندە كارىز گازىمەن ۋلانعان.
بۇگىن، 2024 جىلعى 5 شىلدەدە، ارىس قالاسىنداعى اسكەري ءبولىم اۋماعىندا كارىز جۇيەسىنە قىزمەت كورسەتۋ مەن تازالاۋ جۇمىستارىن جۇرگىزۋ كەزىندە كارىز گازىمەن ۋلانۋ سالدارىنان ءۇش ادام قازا تاپتى. ونىڭ ىشىندە ەكى ازاماتتىق تۇلعا جانە ءبىر كەلىسىمشارت بويىنشا اسكەري قىزمەتشى بار.
وقيعا جۇمىس بارىسىندا ابايسىزدا قۇدىققا قۇلاپ كەتكەن شىمكەنت اۋداندىق پايدالانۋ ءبولىمىنىڭ جۇمىسشىسىن قۇتقارۋ كەزىندە ورىن الدى. وعان كومەككە كەلگەن تاعى ەكى جۇمىسشى مەن كەلىسىمشارت بويىنشا ەكى اسكەري قىزمەتشى دە جاعدايدىڭ ناشارلاۋىنا بايلانىستى جوعارى جاققا كوتەرىلىپ شىعا المادى. سالدارىنان ءۇش ادام سول جەردە قازا تاپتى، - دەپ حابارلادى قورعانىس مينيسترلىگى.
تاعى ءبىر جۇمىسشى مەن اسكەري قىزمەتشى ارىس قالاسىنىڭ اۋرۋحاناسىنا تۇسكەن. ءقازىر ولاردىڭ جاعدايى تۇراقتى-اۋىر دەپ باعالانىپ وتىر.
قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قازا تاپقانداردىڭ تۋىستارى مەن جاقىندارىنا قايعىلارىنا ورتاقتاسىپ كوڭىل ايتادى. ولاردىڭ وتباسىلارىنا بارلىق قاجەتتى كومەك كورسەتىلەدى، - دەپ حابارلادى مينيسترلىك.
اتالعان فاكتى بويىنشا ق ر ءىىم ءاتب شىمكەنت ءبولىمى قىلمىستىق كودەكستىڭ 156-بابى 4-بولىگى بويىنشا سوتقا دەيىنگى تەرگەپ-تەكسەرۋ باستادى (ەڭبەكتى قورعاۋ ەرەجەلەرىن بۇزۋ).