پارتيا ليدەرى نۇرسۇلتان نازاربايەۆتىڭ كەلىسىمىمەن Nur Otan-نىڭ حاتشىسى قىزمەتىنە ارمان قىرىقبايەۆ تاعايىندالدى. «بۇل تۋرالى جەتەكشى پارتيا ءتوراعاسىنىڭ ءبىرىنشى ورىنباسارى باۋىرجان بايبەك ءوزىنىڭ Twitter-دەگى پاراقشاسىندا حابارلادى» دەيدءى پارتيا سايتىندا جاريالانعان اقپاراتتا.
ارمان ورازباي ۇلى قىرىقبايەۆ – قازاق مەملەكەتتىك باسقارۋ اكادەمياسىنىڭ، ق ر ءسىم ديپلوماتيالىق اكادەمياسىنىڭ تۇلەگى. ءار جىلدارى Nur Otan پارتياسىندا، مادەنيەت جانە اقپارات مينيسترلىگىندە، سىرتقى ىستەر مينيسترلىگىندە جۇمىس ىستەدى.
ول قوعامدىق-ساياسي جۇمىس دەپارتامەنتىنىڭ ديرەكتورى، مادەنيەت كوميتەتىنىڭ ءتوراعاسى، مادەنيەت جانە اقپارات ۆيسە-مينيسترى، قاراعاندى وبلىسى اكىمىنىڭ ورىنباسارى، «ەگەمەن قازاقستان»، «كازاحستانسكايا پراۆدا» رەسپۋبليكالىق باسىلىمدارى، «قازاقفيلم» اق، «Nur Media» ج ش س ديرەكتورلار كەڭەسىنىڭ ءتوراعاسى جانە ت.ب. ءبىرقاتار قىزمەتتەر اتقاردى. 2015 جىلدان باستاپ 2019 جىلعا دەيىن الماتى قالاسى اكىمىنىڭ ورىنباسارى بولىپ، وندا ىشكى ساياسات، ءبىلىم بەرۋ، دەنساۋلىق ساقتاۋ سياقتى سالالاردى قاداعالادى.
پارتيا حاتشىسى رەتىندە ارمان قىرىقبايەۆ قوعامدىق-ساياسي باعىتقا، قوعامدىق ساياسات ينستيتۋتى، «جاس وتان» جق، ساراپشىلار قاۋىمداستىعىمەن بىرلەسىپ جۇمىس ىستەۋ سياقتى باعىتتارعا جاۋاپتى بولادى.
ءتوراعانىڭ ءبىرىنشى ورىنباسارى ونىڭ پارتياداعى، سونىمەن قاتار ورتالىق جانە جەرگىلىكتى مەملەكەتتىك ورگاندارداعى مول جۇمىس تاجىريبەسىنىڭ ارقاسىندا، ول العا قويعان بارلىق ماقساتتار مەن تاپسىرمالاردى تابىستى جۇزەگە اسىراتىنىنا سەنىم ءبىلدىردى.
ال وسىعان دەيىن پارتيا حاتشىسى قىزمەتىن اتقارعان عابيدۋللا وسپانقۇلوۆ ۇكىمەت قاۋلىسىمەن اقپارات جانە قوعامدىق دامۋ ۆيسە-مينيسترى بولىپ تاعايىندالدى. ول جاستاردى قولداۋ جانە ازاماتتىق قوعاممەن ءوزارا بايلانىس سالالارىن قاداعالايدى.
باۋىرجان بايبەك وعان اتقارعان جۇمىستارى ءۇشىن العىسىن ءبىلدىرىپ، تابىس تىلەدى. ونىڭ ايتۋىنشا، سوڭعى التى ايدا پارتيا الاڭدارىندا مەملەكەتتىك ءتىلدى، ۇلتتىق مادەنيەتتى دامىتۋ، بالالاردىڭ قۇقىعىن قورعاۋ ماسەلەلەرى بويىنشا كوپتەگەن جۇمىس اتقارىلىپ، وڭىرلەردەگى جاستارىمەن جۇمىس كۇشەيتىلدى.
سۋرەت nurotan.kz سايتىنان الىندى.
