اقتوبە وبلىسىنا قاراستى حرومتاۋ جانە مۇعالجار اۋداندارىنداعى بالاباقشا ەسەپشىلەرى 240 ملن تەڭگەنى تالان-تاراجعا سالعان، دەپ حابارلايدى Ulys.
بۇل فاكتىنى وبلىس پروكۋراتۋراسى انىقتاعان. پروكۋراتۋرانىڭ بولجامىنشا، ەسەپشىلەر قىزمەتكەرلەرگە ارتىق سىياقى، ارتىق جالاقى تولەگەن. ونىڭ ۇستىنە، ەشكىم ءىس-ساپارعا بارماسا دا ولارعا ءىس-ساپار شىعىندارى تولەنىپ وتىرعان. بۇكىل قارجى بالاباقشا مەڭگەرۋشىسىنىڭ نەمەسە ەسەپشىنىڭ جەكە شوتىنا ءتۇسىپ وتىرعان.
«اقتوبە وبلىسىنىڭ حرومتاۋ جانە مۇعالجار اۋداندارى پروكۋراتۋرالارى مەكتەپكە دەيىنگى مەكەمەلەردە 240 ملن تەڭگەدەن استام بيۋدجەت قاراجاتىن تالان-تاراجعا سالعانىن انىقتادى. اۋدان پروكۋرورلارى ءبىلىم ءبولىمىنىڭ بۇرىنعى باسشىلارىنا، 3 بالاباقشا مەڭگەرۋشىسى مەن 4 ەسەپشىگە قاتىستى سوتقا دەيىنگى تەرگەۋدى باستادى»، - دەپ حابارلايدى اقتوبە وبلىسىنىڭ پروكۋراتۋراسى.