«ەندەرۋن قوعام جانە ستارتەگيا قاۋىمداستىعى» باسشىسىنىڭ ورىنباسارى جەسۋرحان تاش ەكونوميكاسى كۇشتى، تاۋەلسىز ەلدەردىڭ ساياسي تۇرعىدان دا ەشكىمگە باعىنىشتى بولمايتىنىنا توقتالىپ، قازاقستاننىڭ كۇشتى ەكونوميكا قۇرۋ باعىتىنداعى جۇمىستارىن اتاپ ءوتتى. سونىمەن قاتار ول جەر اۋماعى جاعىنان الەمدە 9-شى ورىندا تۇرعان قازاقستاننىڭ ەكونوميكالىق، الەۋمەتتىك ماسەلەلەرگە ءبىرىنشى كەزەكتە ءمان بەرەتىنىن، ەكونوميكاسىنىڭ تۇراقتى دامىپ، حالقىنىڭ ءال-اۋقاتىنىڭ ارتىپ، دەموكراتيانىڭ دامۋى ءۇشىن دە ماڭىزدى قادامدار جاسالعانىنا توقتالدى. ال ءوز كەزەگىندە قازاقستاننىڭ تۇركياداعى ەلشىسى ابزال ساپاربەك ۇلى قازاقستاننىڭ ەكونوميكاسى جانە «استانا» حالىقارالىق قارجى ورتالىعى» تۋرالى ارنايى تانىتىم جاساپ، ينۆەستيسيا قۇيعان شەتەلدىكتەردىڭ مىندەتتى تۇردە ۇتىسقا شىعاتىنىن اتاپ ءوتتى. ءتىپتى قاي سالالارعا ينۆەستيسيا قۇيۋعا بولاتىنىن ناقتى ءتۇسىندىردى. ەگەر ينۆەستورلار قانداي دا ءبىر زاڭسىزدىققا تاپ بولسا، «استانا» حالىقارالىق قارجى ورتالىعىنا» شاعىمدانىپ، ءوز قۇقىقتارىن قورعاي الاتىنىن تاپتىشتەپ ايتىپ بەردى.
ءوز كەزەگىندە حالىقارالىق قارجى مامانى مۇحاممەد تيرياكيوعلۋ «تاۋەلسىز ساۋدا-ونەركاسىپشىلەر مەن كاسىپكەرلەر قاۋىمداستىعى» (MÜSİAD) باسشىسىنىڭ كومەكشىسى ءارى كەڭەسشىسى رەتىندە قازاقستانعا قارجى سالۋ بويىنشا تۇرىك كومپانيالارىنا اقىل-كەڭەس بەرىپ كەلە جاتقانىنا توقتالىپ، قازاق ءىس ادامدارى دا تۇركياعا ينۆەستسيا قۇيسا جاقسى بولار ەدى دەگەن ويىن ءبىلدىردى.
جۋرناليست-جازۋشى دەرەكتى فيلىمدەر ءتۇسىرۋ بويىنشا تانىمال مامان يسمايل كاحرامان بولسا، قازاقستانداعى تۋريزم سالاسىندا ينۆەستيسيا قۇياعا تاپتىرمايتىن جەرلەر بار ەكەنىن باياندادى. تاريحي جىبەك جولى بويىمەن ءجۇرىپ وتكەن ول تۇسىرگەن كوركەم جەرلەردىڭ سۋرەتتەرىن كورسەتە وتىرىپ، تۋريزم ينۆەستورلارىن قازاقستاننىڭ تاريحي ءارى كورىكتى جەرلەرىنە ينۆەستيسيا قۇيۋعا شاقىردى. ونىڭ ويىنشا، مادەنيەت جانە تابيعات تۋريزمىنە تۇرىك كومپانيالارى قارجى سالسا، ەكى ەلدىڭ اراسىنداعى تۋىستىق بايلانىس تىپتەن كۇشەيەدى.
ونەركاسىپ جانە تەحنولوگيا مينيسترلىگىندە كەزىندە باسشىلىق قىزمەت ەتكەن يسرافيل چەليك قازاقستان ەكونوميكاسىنىڭ دامۋ بارىسى تۋرالى باياندادى. باۋىرلاس ەلدەر ءتورتىنشى وناركاسىپتىك ريەۆوليۋسيا جاعدايىندا بىرىگىپ جۇمىس جاساسا ۇتاتىنىن باسا اتاپ ءوتتى. جيىنعا قاتىسقاندار «استانا» حالىقارالىق قارجى ورتالىعىنا» قاتىستى، قازاقستاننىڭ ينۆەستيسيالىق تارتىمدىلىعى جايلى سۇراقتارىنا قازاقستاننىڭ تۇركياداعى ەلشىسى ابزال ساپاربەكۇلىنان تولىمدى جاۋاپتار الدى.
