تۇركيانىڭ استاناسىندا قازاقستان رەسپۋبليكاسىنىڭ تۇركياداعى ەلشىلىگى العىس ايتۋ كۇنىن اتاپ ءوتتى. ەلشى ابزال ساپاربەك ۇلى باسىنا قيىن-قىستاۋ كۇن تۋعاندا قازاق باۋىرلاستارىنا قۇشاعىن اشقان تۇرىك ۇكىمەتى مەن حالقىنا قازاق ەلى اتىنان العىس ءبىلدىردى. شارا اياسىندا ەلشىلىكتىڭ قولداۋىمەن قوعام قايراتكەرى، بەلگىلى پۋبليسيست مارقۇم ساعات اشىمبايەۆتىڭ «ادەبي سىن ماقالالار» اتتى ەڭبەگى مەن تانىمال جازۋشى ءشاربانۋ بەيسەنوۆانىڭ «ءبىر ماحاببات بايانى»، «سۇزگەنىڭ سوڭعى كۇندەرى» «بوزوق ارۋى» اتتى تۇرىك تىلىنە اۋدارىلعان تۋىندىلارىنىڭ تۇساۋكەسەرى بولدى. بۇل تۋرالى اتالعان ەلشىلىكتىڭ فەيسبۋك پاراقشاسىندا https://www.facebook.com/kzembassy جازدى.
شاراعا قازاقستاننىڭ تۇركياداعى ەلشىسى ابزال ساپاربەك ۇلى، تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ، تۇرىكسوي حالىقارالىق ۇيىمىنىڭ باس حاتشىسى دۇيسەن قايسەيىنوۆ، ەۋرازيا جازۋشىلار وداعىنىڭ ءتوراعاسى ياكۋپ ومەروعلۋ، تۇركيانىڭ مەملەكەتتىك جانە قوعام قايرتاكەرلەرى، ب ا ق وكىلدەرى، تۇركيادا ءبىلىم الىپ جاتقان قازاق جاستارى، قازاق دياسپوراسى وكىلدەرى جانە تۇرىك وقىرمان قاۋىمى قاتىستى.
العىس ايتۋ كۇنىنىڭ قازاقستان قوعامىنداعى ماڭىزدىلىعى تۋرالى ءسوز قوزعاعان ەلشى ابزال ساپاربەك ۇلى پرەزيدەنت ن. نازاربايەۆتىڭ «ءبىزدىڭ ۇستانىمىمىز – تاتۋلىق پەن تىنىشتىق، ۇرانىمىز – بەرەكە مەن بىرلىك» دەگەن سوزدەرىن كەلتىردى. بۇگىن سول بەيبىت ءومىر مەن ىنتىماق ءۇشىن، قاستەرلى تاۋەلسىزدىگىمىز ءۇشىن بىر-بىرىمىزگە العىس ايتاتىنىمىزعا ەرەكشە توقتالدى. سونداي-اق ول باسىنا قيىن-قىستاۋ كۇن تۋعاندا قازاق باۋىرلارىنا قۇشاعىن اشقان تۇرىك ۇكىمەتى مەن حالقىنا دا قازاق ەلى اتىنان العىس ءبىلدىردى. ەلشى العىس ايتۋ كۇنى ماقساتىنىڭ وسكەلەڭ ۇرپاقتىڭ بويىنا دوستىق، توزىمدىلىك جانە پاتريوتيزم قۇندىلىقتارىن ءسىڭىرۋ ەكەندىگىن ايتتى.
سونداي-اق، ا. ساپاربەك ۇلى 1999 جىلعى 1 ناۋرىزدا «نۇر وتان» پارتياسىنىڭ قۇرىلعانىن ەسكە سالا وتىرىپ، ەكى كۇن بۇرىن 20 جىلدىق مەرەيتويعا وراي وتكەن پارتيا سەزىندە قازاقستان پرەزيدەنتىنىڭ حالىقتىڭ ەرتەڭ ەمەس، بۇگىن باقىتتى بولۋىن قالايتىنىن، وسى تۇرعىدا الەۋمەتتىك دامۋعا باعىتتالعان جۇيەلى شارالاردى ۇسىنعانىن جەتكىزدى. بۇنىڭ سىرتىندا ن. نازاربايەۆتىڭ وتكەن جىلى جاريالانعان «ۇلى دالانىڭ جەتى قىرى» اتتى باعدارلامالىق ماقالاسىنىڭ قازاق حالقىنىڭ رۋحاني جاندانۋى عانا ەمەس، جالپى تۇركى الەمىنىڭ بىرلىگى ءۇشىن ماڭىزدى قادام ەكەندىگىن ايتتى. ءسوزىنىڭ سوڭىندا ا. ساپاربەك ۇلى ايگىلى ادەبيەت سىنشىسى س. اشىمبايەۆ پەن ونىڭ جارى ش. بەيسەنوۆانىڭ تۇرىكشەگە اۋدارىلعان كىتاپتارىنا قىسقاشا شولۋ جاساپ ءوتتى.
ءوز كەزەگىندە، تۇركيا رەسپۋبليكاسى پرەزيدەنتىنىڭ باس كەڭەسشىسى يا. توپچۋ اتا-بابالارىنىڭ مەسحەتيالىق تۇرىكتەر ەكەنىن ايتىپ، تۇرىكتەر جانە باسقا حالىقتار اتىنان قيىن-قىستاۋ كەزەڭدە پانا بولىپ، بارىمەن بولىسكەن قازاق حالقىنا، سونىڭ ىشىندە پرەزيدەنت ن. نازاربايەۆتىڭ اتا-اناسىنا ۇلكەن العىسىن ءبىلدىردى. ن. نازاربايەۆ پەن ر. ت. ەردوعاندى تۇركى الەمىنىڭ، جالپى ەۋرازيالىق كەڭىستىكتىڭ ەكى الىبى دەپ ەرەكشە اتاپ وتكەن يا. توپچۋ ەكى ەلدىڭ قارىم-قاتىناستارىنىڭ ودان ءارى دامي بەرەتىنىنە سەنىمدى ەكەندىگىن مالىمدەدى.
يالچىن توپچۋعا قازاقستان مەن تۇركيانىڭ دوستىق قارىم-قاتىناستارىنىڭ دامۋىنا قوسقان ۇلەسى ءۇشىن قازاقستان رەسپۋبليكاسى تاۋەلسىزدىگىنىڭ 25 جىلدىعى قۇرمەتىنە ارنالعان مەرەكەلىك مەدال تابىستالىپ، ءىس-شارا كىتاپ تۇساۋكەسەرىمەن جالعاستى.
تۇساۋكەسەردە ءسوز العان ەۋرازيا جازۋشىلارى وداعىنىڭ ءتوراعاسى يا. ومەروعلۋ العىس ايتۋ كۇنى سياقتى ماڭىزدى مەرەكەلەردىڭ ىرگەلى، ۇلى مەملەكەتتەر جاسايتىن شارا ەكەنىن مالىمدەدى. ول، سونداي-اق، ءتۇرلى سەبەپتەرمەن قازاق ەلىندە قونىس تەپكەن حالىقتاردىڭ تاريحي وتاندارىنىڭ 1 ناۋرىز سايىن قازاقستانعا دەلەگاسيالار جىبەرىپ، العىس ايتۋ شارالارىنا قاتىسۋىن ۇيىمداستىرۋدى ۇسىندى.
يا. ومەروعلۋ «سۇزگەنىڭ سوڭعى كۇندەرى» پوۆەسى ايەل قاھارماندىعىن سۋرەتتەيتىن شىعارما دەپ باعا بەردى. ول سۇزگە حانشايىمنىڭ ءسىبىردىڭ سوڭعى حانى كوشىمنىڭ جارى بولعانىن ايتىپ، جالپى، پوۆەستى قازاقتاردىڭ تاتار جانە باشقۇرت سياقتى سولتۇستىك تۇركى حالىقتارىنا قاشان دا قولداۋ كورسەتكەنىن مەڭزەيتىن ماڭىزدى شىعارما دەپ ەسەپتەيدى. يا. ومەروعلۋ «بوزوق ارۋى» پوۆەسىنىڭ تۇركى ايەلدەرىنىڭ باتىرلىعى مەن قايسارلىعىن ءدوپ سيپاتتاۋىمەن وقىرماننىڭ ەسىندە قالاتىنىن ايتتى.
كىتاپتاردىڭ اۆتورى ش. بەيسەنوۆا شىعارمالارىندا ءومىردىڭ قيىندىقتارىنان، ءتىپتى ولىمنەن دە تايىنبايتىن باتىل جانە قاھارمان ايەلدەردى سومدايتىنىن جەتكىزدى. تاريحتاعى سۇيىمبيكە، سۇزگە، بوزوق ارۋى سياقتى تۇلعالار مەن سىبىرگە ايدالعان م. قاراتايەۆتىڭ ارتىنان ەرىپ، تىرەۋ بولعان جارى مارحۋما سياقتى ايەلدەردىڭ ىشكى جان دۇنيەسىن بەينەلەۋگە تىرىسقانىن ايتتى.
اۆتوردىڭ ارتىنان ءسوز العان اۋدارماشى ج. كىناجى جينالعان قاۋىمدى شىعارمالاردىڭ سيۋجەتىمەن تانىستىرىپ، «بوزوق ارۋى» پوۆەسىن پرەزيدەنت ن. نازاربايەۆتىڭ بارلىق تۇركى حالىقتارىنا ورتاق تۇلعالاردى ناسيحاتتاۋ بويىنشا ۇسىنىسىنىڭ ورىندالۋى دەپ باعالادى. ءسوزىنىڭ سوڭىندا ج. كىناجى ەلشىلىكتىڭ بۇعان دەيىن دە كوپتەگەن كازاق اۆتورلارى كىتاپتارىنىڭ تۇرىكشە جارىق كورۋىنە قولداۋ كورسەتكەنىن ەسكە سالىپ، ەلشى ا. ساپاربەك ۇلى جۇرگىزىپ وتىرعان مادەني ديپلوماتيانى جوعارى باعالادى.
«بالدىرعان» جۋرنالىنىڭ باس رەداكتورى د. ماعلۇموۆ، ءوز كەزەگىندە، قازاقستان تاۋەلسىزدىك العالى بەرى كوپتەگەن قازاق اۆتورلارى كىتاپتارىنىڭ تۇركيادا جارىق كورگەنىن اتاپ ءوتىپ، جينالعان قاۋىمدى س. اشىمبايەۆتىڭ ومىربايانىمەن قىسقاشا تانىستىردى.
جيىن ش. بەيسەنوۆانىڭ تۇرىك وقىرماندارى ءۇشىن كىتاپتارىنا قولتاڭبا بەرۋىمەن، سونداي-اق، قازاق حالىق جانە ەسترادا اندەرى شىرقالعان مەرەكەلىك كونسەرت جانە رەسمي قابىلداۋمەن جالعاستى.