قازاق تاريحىنىڭ تەرەڭدىگى مەن بابالار جاساعان وركەنيەتتىڭ ورەسىنىڭ بيىكتىگىن كورسەتەتىن «التىن ادام» انادولى جەرىندە. تۇركيانىڭ استاناسى انكارا قالاسىنداعى انادولى وركەنيەتتەر مۋزەيىنىڭ كورمە زالىندا ق ر ۇلتتىق مۋزەيىنىڭ «ۇلى دالا: تاريح جانە مادەنيەت» كورمەسى اشىلدى. «التىن ادامنىڭ الەم مۋزەيلەرىنە شەرۋى» اتتى حالىقارالىق جوبا اياسىندا جۇزەگە استى.
قازاقستاننىڭ تۇركياداعى ەلشىلىگىنىڭ اقپاراتىنا قاراعاندا، ەۋروپانىڭ ەڭ ۇزدىك مۋزەيى دەپ تانىلعان انادولى وركەنيەتتەر مۋزەيىندە وتكەن كورمەنىڭ اشىلۋ سالتاناتىنا تۇركيا رەسپۋبليكاسى مادەني قۇندىلىقتار جانە مۋزەيلەر باسقارماسى ديرەكتورىنىڭ ورىنباسارى سەيىت احمەت ارسلان، قازاقستاننىڭ تۇركياداعى ەلشىسى ابزال ساپاربەك ۇلى، قازاقستاننىڭ ۇلتتىق مۋزەيى ديرەكتورى ارىستانبەك مۇحامەدي ۇلى مەن تۇركسوي باس حاتشىسى دۇيسەن قاسەيىنوۆ قاتىسقان. قازاقستاننىڭ تۇركياداعى ەلشىسى ابزال ساپاربەك ۇلى ءوز سوزىندە «قازاقستاننىڭ «رۋحاني جاڭعىرۋ» مەملەكەتتىك باعدارلاماسى اياسىندا انكارانىڭ تورىندە، تۇركيانىڭ ەڭ ماڭىزدى مۋزەيلەرىنىڭ بىرىندە وتكىزىلىپ وتىرعان وسى ماعىنالى شاراعا قوش كەلدىڭىزدەر!
«التىن ادامنىڭ الەم مۇراجايلارىنا شەرۋى» حالىقارالىق كورمە جوباسىنىڭ باۋىرلاس تۇركياعا كەلىپ جەتكەنى بارشامىزدى ەرەكشە قۋانتىپ وتىر. «ۇلى دالا تاريحى جانە مادەنيەتى» اتتى وسى كورمە ارقىلى ۇلتىمىزدىڭ باعا جەتپەس قازىناسىن تاماشالاۋدىڭ تاپتىرماس مۇمكىندىگىنە يە بولىپ وتىرمىز. وسى ءىس-شارا ارقىلى تۇرىك كورەرمەنىنىڭ دە قازاقتىڭ باي تاريحي جانە مادەني مۇراسىمەن تانىسىپ، ءتانتى بولارىنا كۇمانىم جوق» -دەدى.
قازاقستان رەسپۋبليكاسى ۇلتتىق مۋزەيى حالىقارالىق «التىن ادامنىڭ الەم مۋزەيلەرىنە شەرۋى» تۋرنەسى اياسىندا كورمە بۇعان دەيىن بەلارۋس، رەسەي، ءازىربايجان، جۇڭگو، پولشا، وڭتۇستىك كورەيا، تاتارستان، وزبەكستان جانە سولتۇستىك ماكەدونيا مۋزەيلەرىندە وتكەن بولاتىن. قازاقستان رەسپۋبليكاسى ۇلتتىق مۋزەي ديرەكتورى ارىستانبەك مۇحامەدي ۇلى، كورمەگە كيىمى التىن جاپسىرمالارى جانە جەبە، قار بارىسى، ارقار، جىلقى جانە قۇس تۇرىندەگى التىن تىلىمشەلەر اشەكەيلەپ تۇرعان كونۋس ءپىشىندى ەرەكشە باس كيىمدى التىن ادامنىڭ رەكونسترۋكسياسىن جانە وسى جاس ساق جاۋىنگەرىمەن (ارحەولوگتار پىكىرىنشە، 17-18 جاستاعى) بىرگە جەرلەنگەن ەرتە تەمىر داۋىرىندەگى (ب.د.د. V-IV عاسىر) ارحەولوگيالىق جادىگەرلەر قويىلعانىن ءوز فەيسبۋك پاراقشاسىنا جازدى. سونداي-اق ول كورمەگە قازاقستان رەسپۋبليكاسىنىڭ ۇلتتىق مۋزەي قورلارىنان 207 زات ۇسىنىلعانىنا توقتالا كەلە، «كورمەگە قويىلعان قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى - بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن بۇرىنعىنىڭ ەسىمدەرى بەلگىسىز شەبەرلەرىنىڭ تۋىندىلارىنىڭ از عانا بولىگى. كورمەگە كەلگەن قوناقتار قازاقستاننىڭ كونە مادەنيەتىنە، شەبەرلەردىڭ ونەرىنە تامسانىپ، ەرەكشە اسەرلەنىپ شىعۋدا»،-دەپ جازدى. شارا اياسىندا قازاقستان مەن تۇركيانىڭ باس مۋزەيلەرى اراسىندا ىنتىماقتاستىق تۋرالى حاتتاماعا قول قويىلدى. كورمە 12ء-شى قازانعا دەيىن بولادى.
سۋرەتتەر قازاقستاننىڭ تۇركياداعى ەلشىگىنىڭ فەيسبۋك پاراقشاسىنان الىندى.
