ىلە اۋدانى الماتى وبلىسى اكىمىنىڭ كۋبوگى ءۇشىن فۋتبولدان ءبىرىنشى وبلىستىق ءتۋرنيردىڭ ارەناسىنا اينالدى. سايىسقا وبلىستىڭ بارلىق اۋداندارى مەن قونايەۆ قالاسىنان 10 كوماندا قاتىستى، دەپ حابارلايدى Ulys.
جارىستىڭ سالتاناتتى اشىلۋ راسىمىندە الماتى وبلىسىنىڭ اكىمى مارات سۇلتانعازييەۆ ءسوز سويلەدى. ول مەملەكەت باسشىسى قاسىم-جومارت توقايەۆتىڭ تاپسىرماسى بويىنشا وبلىستا بۇقارالىق سپورتتى دامىتۋ ءۇشىن بارلىق جاعداي جاسالىپ جاتقانىن اتاپ ءوتتى.
"ءبىزدىڭ وبلىستا فۋتبول جوعارى دەڭگەيدە دامىپ كەلەدى. ءبىر جارىم جىل بۇرىن وبلىس ورتالىعىندا ءار اۋدانىندا فيليالدارى بار بولاشاق كاسىبي فۋتبولشىلاردى دايىندايتىن ارنايى بالالار مەن جاسوسپىرىمدەر سپورت مەكتەبى اشىلدى. سونداي-اق بىزدە قازاقستاننىڭ ەكىنشى ليگاسىندا وبلىستىڭ نامىسىن قورعايتىن "ىلە-الاتاۋ" كاسىبي كلۋبى پايدا بولدى، - دەدى وبلىس باسشىسى.
م.سۇلتانعازييەۆتىڭ ايتۋىنشا، وبلىستا زاماناۋي سپورتتىق نىساندار سالىنىپ، ماتەريالدىق-تەحنيكالىق بازا جاڭارتىلۋدا. "بۇگىنگى تاڭدا وبلىستىڭ ءار اۋدانىندا 10 دەنە شىنىقتىرۋ-ساۋىقتىرۋ كەشەنى جۇمىس ىستەيدى"، - دەپ تولىقتىردى ءسوزىن وبلىس اكىمى.
اكىم تۋرنير قاتىسۋشىلارىنا ساتتىلىك پەن جارقىن جەڭىستەر تىلەدى.
"سپورتتىق جارىستار مىنەزدى شىڭدايدى، كوماندالىق رۋح پەن ماقسات قويا بىلۋگە تاربيەلەيدى. سىزدەردىڭ دايىندىقتارىڭىزدىڭ جوعارى دەڭگەيى مەن سپورتتىق شەبەرلىكتەرىڭىزدى كورسەتەتىنىڭىزگە سەنىمدىمىن!"، - دەدى اكىم.
تۋرنير وليمپيادالىق جۇيە بويىنشا (شىعۋ ارقىلى) ءوتتى. فينالدا قونايەۆ قالاسىنىڭ كومانداسى كەگەن اۋدانىنىڭ ويىنشىلارىن جەڭىپ، 1-ورىندى يەلەندى. ءۇشىنشى ورىندى ىلە اۋدانىنىڭ وكىلدەرى الدى.
تۋرنير ۇيىمداستىرۋشىلارى فۋتبولدى جىل سايىن وتكىزەتىن ءىس-شاراعا اينالدىرىپ، بىرىكتىرۋشى فاكتور رەتىندەگى ماڭىزى زور ەكەنىن تىلگە تيەك ەتتى.
