مەملەكەت باسشىسىنىڭ باستاماسىمەن «تازا قازاقستان» جالپى رەسپۋبليكالىق اكسياسىن ىسكە اسىرۋ جانە «الماتى – ءبىزدىڭ ورتاق ءۇيىمىز» ناۋقانىن جالعاستىرۋ اياسىندا بيىل 26 ماۋسىم مەن 6 شىلدە ارالىعىندا سۋبۇرقاقتاردى، وزەندەر مەن سۋ ايدىندارى جاعالاۋلارىن، ارىق جەلىسى، قوقىس الاڭدارى، اعاشتى سانيتارلىق ماقساتتا كەسۋ، جول ينفراقۇرىلىمىن (ايالداما كەشەندەرى، باعدارشام نىساندارى، جول كورسەتكىشتەرى مەن بەلگىلەرى) تازارتۋ بويىنشا «الماتى جازى» اكسياسى باستالدى.
الماتىدا 150 سۋبۇرقاق بار، ونىڭ 66 كوممۋنالدىق (60-ى شتاتتىق رەجيمدە، 6-ى قايتا جاڭارتىلىپ جاتىر) جانە 84ء-ى جەكە اۋماقتا. كوممۋنالدىق مەنشىكتەگى سۋبۇرقاقتار 1 مامىردان 25 قازانعا دەيىن كۇن سايىن ساعات 8:00-دەن 23:00-گە دەيىن پروفيلاكتيكالىق ءىس-شارالار (تازالاۋ، جابدىقتاردى تەكسەرۋ) كەزىندە ءوشىرىلىپ، كەستەمەن جۇمىس ىستەيدى. سۋبۇرقاقتى تازالاۋ كەستەسىنە سايكەس، سۋبۇرقاقتىڭ سۋى اي سايىن اعىزىلىپ، جابدىقتار تەكسەرىلىپ، ارنايى قۇرالدارمەن توستاعانى جۋىلىپ، تازارتىلادى. كەيدە كوممۋنالدىق سۋبۇرقاقتار اپاتتىق-قالپىنا كەلتىرۋ جۇمىسىن جۇرگىزۋ جانە اعىمداعى جوندەۋ (كابەلدى اۋىستىرۋ، سورعىلار مەن قوزعالتقىشتاردى اۋىستىرۋ نەمەسە جوندەۋ، گيدرووقشاۋلاۋ، قاپتامانى جوندەۋ) ءۇشىن وشىرىلەدى.
جەكە اۋماقتا ورنالاسقان سۋبۇرقاقتاردىڭ جاعدايى ءماز ەمەس، قاراۋسىز قالعان، جۇمىس ىستەمەيدى نەمەسە مەنشىك يەسىندە قارجىنىڭ بولماۋىنا بايلانىستى كۇردەلى جوندەۋدى تالاپ ەتەدى. «الماتى جازى» اكسياسى اياسىندا جەكە سۋبۇرقاقتار قالالىق نىساندارمەن بىرگە رەتكە كەلتىرىلەدى.
اكسيا بارىسىندا ۇزىندىعى 1525 كم قالانىڭ ارىق جەلىلەرىن تازارتۋ جۇمىستارى كۇشەيتىلەدى. كۇن سايىن ارىق جەلىسىنەن شامامەن 250 م3 لاي جانە قوقىس شىعارىلادى. جۇرگىزىلىپ جاتقان شارالارعا قاراماستان، ارىقتار نوسەر جاڭبىر كەزىندە تۇرعىندار تاستاعان قوقىستارمەن، قالدىقتارمەن بىتەلىپ، جەرگىلىكتى سۋ تاسقىنىنا سەبەپ بولىپ وتىر. بۇرىن حابارلانعانداي، تازارتۋ جۇمىستارى كەزىندە كوممۋنالدىق قىزمەت ارىقتان جاڭبىر سۋىنىڭ كەدەرگىسىز اعىپ كەتۋىنە كەدەرگى كەلتىرەتىن پايدالانىلعان جورگەكتەردى، ەسكى زاتتاردى، ىدىس-اياقتى، ءتىپتى ۇلكەن كولەمدى زاتتاردى – كولىك دوڭگەلەكتەرى مەن قۇرىلىس قوقىستارىن تاۋىپ العان.
«الماتى جازى» اكسياسى اياسىندا 624 ايالداما كەشەنىن، 222 باعدارشام نىسانىن، 2 181 جول بەلگىلەرىن شاڭنان جانە لاستانۋدان تازارتۋ (جۋۋ)، وزەن جاعالاۋى مەن سۋ ايدىندارى اۋماعىنداعى شامامەن 250 شارشى كم جەردى قوقىستان تازارتۋ جوسپارلانۋدا.
جازعى كەزەڭدە اۋلاىشىلىك اۋماقتا قوقىس كونتەينەرلەرىنىڭ تەز تولۋى وزەكتى ماسەلە بولىپ وتىر، وسىعان بايلانىستى 1 454 كونتەينەرلىك الاڭدى سانيتارلىق وڭدەۋ، 700 كونتەينەرلىك الاڭدى جۋۋ جانە دەزينفەكسيالاۋ، سونداي-اق 24 747 كوشە جانە اۋلاداعى قوقىس جاشىكتەرى تازارتىلادى.
جازعى ماۋسىمدىق ءىس-شارانىڭ ءبىرى اعاشتاردى سانيتارلىق ماقساتتا كەسۋ. اپاتتى جاعدايداعى اعاش ادامعا جانە مۇلىككە ۇلكەن ءقاۋىپ توندىرەدى. وسىعان بايلانىستى اۋرۋ جانە قۋراعان اعاشتىڭ بۇتاقتارىن سانيتارلىق ماقساتتا كەسۋ داۋىل، قاتتى جەل مەن نوسەر كەزىندە بۇتاقتاردىڭ قۇلاۋ ءقاۋپىن ازايتادى. «الماتى جازى» اكسياسى بارىسىندا 6 مىڭعا جۋىق اعاشتى سانيتارلىق ماقساتتا كەسۋ جوسپارلانىپ وتىر.
وسىلايشا، «الماتى جازى» اكسياسى «الماتى – ءبىزدىڭ ورتاق ءۇيىمىز» ناۋقانىنىڭ جازعى ۋاقىتتاعى جالعاسى بولادى. ەستەرىڭىزگە سالا كەتەيىك، «الماتى – ءبىزدىڭ ورتاق ءۇيىمىز» ناۋقانىنىڭ باستى ماقساتى – قالالىق ينفراقۇرىلىم مەن ورتاق مۇلىككە ۇقىپتى قاراۋ قۇندىلىعىن قالىپتاستىرۋ، ەل اراسىندا جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋ، جەكە ەكولوگيالىق باستامالاردى قولداپ، ولاردى ىسكە اسىرۋعا جاعداي جاساۋ.
