ماڭعىستاۋ وبلىسىندا قولىنداعى قارجىسىن ەكى ەسەلەپ كوبەيتەمىن دەپ الماس وندىرىسىنە ينۆەستيسيا قۇيعان مىڭداعان تۇرعىن سان سوعىپ قالدى. جابىرلەنۋشىلەر وڭباي الداندىق دەپ اقتاۋداعى پروكۋراتۋرا عيماراتى ماڭىنا جينالدى، دەپ حابارلايدى Ulys الماتى ارناسىنا سىلتەمە جاساپ.
كومەك سۇراعانداردىڭ اراسىندا باسپاناسى مەن كولىگىن ساتىپ، ەڭ سوڭعى تيىن-تەبەنىنە دەيىن سالىپ جىبەرگەندەر بار ەكەن. شاعىمدانۋشىلار الاياقتىڭ جاساعان جارناماسىنا سەنىپ قالعاندارىن ايتادى. ءقازىر قارجىلىق مونيتورينگ اگەنتتىگى بۇل ءىس بويىنشا سوتقا دەيىنگى تەرگەۋ جۇرگىزىپ جاتىر.
جينالعان جۇرت وسىدان 5 جىل بۇرىن بار جيعان-تەرگەنىن Sax Invest كومپانياسىنا قۇيعان ەكەن. بەلگىلى بولعانداي، ۇيىم حالىقتى الماز وندىرىسىنە اقشا سالۋعا ۇگىتتەگەن. سالعان سالىمنان اي سايىن 2 پايىز پايدا تاباسىزدار دەپ سەندىرىپتى. قولدارىنا كەپىلحات تا بەرىپ وتىرعان ەكەن. كەيىننەن كوپشىلىكپەن بايلانىسىپ وتىرعان الگى ادام ەل سىرتىنا شىعىپ كەتىپ، جۇرتشىلىقپەن حات تا الماسپاعان، حابارىن دا بەرمەگەن.
«ءبىز ول كىسىگە بالا-شاعامىزعا دەپ جيناپ وتىرعان بۇكىل قاراجاتىمىزدى سالعانبىز. ارتىنشا وزگەرىستەر بولىپ، بىزگە «اقشانى وسىنداي ۋاقىتتا قايتارامىز» دەپ مىندەتتەمە قاعازىن بەردى. سول قاعاز ءبىزدىڭ قولىمىزدا بار. سودان كەيىن ول كىسى حابارسىز كەتتى. تەك انگولادا جۇرگەنىن الەۋمەتتىك جەلىدەن عانا باقىلايمىز. سوعان سەنىپ وسى ۋاقىتقا دەيىن وتىردىق. بۇگىنگى كۇندە ءساتجاننان ەشقانداي حابار جوق. ءبىزدىڭ اقشامىزدى قايتارسىن! الاياقتىق جولمەن الداپ، اقشامىزدى قايتارماي وتىر»، - دەيدى اقتاۋ قالاسىنىڭ تۇرعىنى گۇلشار بەرگارينا.
جينالعانداردىڭ كوبى الگى كىسىنىڭ شوتىنا شامامەن 10 مىڭ اقش دوللارىنا دەيىن سالعان. ءقازىر اتالمىش كومپانياعا قاتىستى ءىس ەلوردادا تەرگەلىپ جاتىر. ءبىراق جينالعان قاۋىم ونىڭ اقتاۋدا قارالۋىن سۇرايدى. الدانعان جۇرت ءوڭىردىڭ پوليسيا دەپارتامەنتىنە جازعان ارىزىمىز قاناعاتتاندىرىلماي جاتىر دەپ شاعىمىن جەتكىزدى.
«بۇل كىسى بىزگە كەلىپ، ءوز كومپانياسىن جارنامالاپ، اكسياعا ينۆەستيسيا سالىڭىزدار دەپ الدادى. ونىڭ سوزىنە سەنىپ، كولىگىمدى ساتىپ، 10 مىڭ اقش دوللارىن قۇيدىم. قاراجاتىمىزدى قايتاراتىن كەپىلحاتىن دا بەردى. مىنە، بەس جىل بويى تابىس تاپپاق تۇگىلى، ءوز اقشامىزدى الا الماي وتىرمىز. قارجىنى قايتار دەسەك، «انگولادا جۇمىس ىستەپ جاتىرمىن» دەپ قۇرعاق ۋادەگە سەندىرىپ كەلدى. ەندى قۇزىرلى ورگاندار ارىزىمىزدى قاناعاتتاندىرىپ، ءىستىڭ ماڭعىستاۋ وبلىسىندا «الاياقتىق» بابى بويىنشا تەرگەلۋىن سۇرايمىز»، - دەيدى اقتاۋ قالاسىنىڭ تۇرعىنى اللا كاپۋلەر.
بازىناسىن ارقالاعان جۇرتپەن ءوڭىردىڭ پروكۋرورلارى جەكە كەزدەسىپ، زاڭدى تۇرعىدا تۇسىنىك جۇمىسىن جۇرگىزدىك دەپ وتىر.
«استانا قالالىق ەكونوميكالىق تەرگەۋ دەپارتامەنتى قىلمىستىق كودەكستىڭ 217-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋ جۇرگىزىپ جاتىر. وسى ءىس بويىنشا اتالعان ورگانمەن كۇدىكتى تۇلعالار ۇستالدى. بۇدان باسقا تەرگەۋ ارەكەتتەرى تاعى دا جالعاسۋدا. سونىمەن قاتار بۇگىن ماڭعىستاۋ وبلىسى پروكۋراتۋراسىنىڭ باسشىلىق قۇرامى سالىمشىلاردى جەكە قابىلداپ، ءتيىستى زاڭدى تۇسىندىرمە بەردى»، - دەدى ماڭعىستاۋ وبلىستىق پروكۋراتۋراسىنىڭ باسقارما باسشىسى دانيار تولەگەنوۆ.
قارجىلىق مونيتورينگ اگەنتتىگىنىڭ مالىمەتىنشە، كومپانيا حالىقتان جالپى 9 ميلليارد تەڭگەگە جۋىق قاراجات جيناعان. سونداي-اق ۆەدومستۆو وسىدان ءبىر اي بۇرىن «Sax Invest» قارجى پيراميداسىن ۇيىمداستىرۋشىلاردىڭ ءبىرى ۇستالىپ، ۋاقىتشا ۇستاۋ يزولياتورىنا قامالعانىن مالىمدەگەن ەدى.
