ءبارىمىز ءبىر ەل بولىپ جاڭا جىلدى قارسى الىپ وتىرمىز. بارشامىز ەسكى جىلدى وي ەلەگىنەن وتكىزەمىز، الداعى جىلعا جوسپار جاساپ، جاڭا ماقسات قويامىز. ءبىز وسى ساتتە بىر-بىرىمىزگە اق تىلەگىمىزدى ارنايمىز، سىي-قۇرمەت كورسەتەمىز. قاسيەتتى وتانىمىزدىڭ بەرەكەلى بىرلىگى جۇرتىمىزدىڭ وسىنداي تاتۋ تىرلىگىنەن باستالادى.
2023 جىل قازاقستان ءۇشىن تابىسى مەن تاۋقىمەتى قاتار كەلگەن جىل بولدى. ومىردە قۋانىش پەن قيىندىقتىڭ الما-كەزەك بولۋى – زاڭدىلىق. ءبىراق ءبىز ەڭسەمىزدى تىك ۇستاپ، كەلەشەككە ءاردايىم سەنىممەن قارايمىز.
بيىل جۇرتىمىز جاڭا جىلدى كوپتەن كۇتكەن جاعىمدى جاڭالىقپەن قارسى الۋدا. جاقىندا حالقىمىزدىڭ سانى 20 ميلليونعا جەتتى. ەلىمىز ءۇشىن بۇل اق تۇيەنىڭ قارنى جارىلعان كۇن بولدى. حالىق سانىنىڭ ءوسۋى – مىقتى مەملەكەت بولۋدىڭ جانە وركەندەۋدىڭ كەپىلى. ال باقىتتى وتباسى – باقۋاتتى ەلدىڭ ارقاۋى.
قازاقستان ستراتەگيالىق باعدارى ايقىن ەل رەتىندە تۇراقتى دامىپ كەلە جاتىر. ءبىز ىنتىماق-بىرلىكتىڭ جانە قاجىرلى ەڭبەكتىڭ ارقاسىندا اۋقىمدى ءىس-شارالار اتقاردىق. جاڭارۋ مەن جاڭعىرۋ جولىنداعى ماڭىزدى رەفورمالاردى جۇزەگە اسىردىق. وسىلايشا، مەملەكەتتىگىمىزدىڭ تۇعىرىن بەكەمدەي تۇستىك. زاڭ مەن ءتارتىپ ۇستەمدىگىن ورناتۋدى مەملەكەتتىك ساياساتتىڭ نەگىزگى باعدارى دەپ جاريالادىق. وسى باعىتتا ناقتى شارالاردى قابىلداۋعا كىرىستىك. ءبىلىم بەرۋ جانە دەنساۋلىق ساقتاۋ سالاسىندا اۋقىمدى جوبالاردى قولعا الدىق. ادىلدىككە نەگىزدەلگەن جاڭا ەكونوميكالىق ۇلگىگە كوشە باستادىق. ياعني، حالىقتىڭ تۇرمىس ساپاسىن جاقسارتۋ ءۇشىن اسا ماڭىزدى قادام جاسادىق. شەتەلدەن ميللياردتاعان دوللار ينۆەستيسيا تارتتىق. سونىڭ ارقاسىندا ەلىمىزگە اسا قاجەت وندىرىستەر اشىلدى. جۇمىس ورىندارى پايدا بولدى. ەل ەكونوميكاسىنىڭ باستى قوزعاۋشى كۇشى رەتىندە شاعىن جانە ورتا بيزنەسكە جان-جاقتى قولداۋ كورسەتەتىن بولدىق.
زاڭسىز الىنعان ەكونوميكالىق اكتيۆتەردى ەلگە قايتارۋ جۇمىسى جالعاسۋدا. مەملەكەتكە قايتارىلعان قارجى كوپ ۇزاماي حالىقتىڭ يگىلىگىنە جۇمسالاتىن بولدى، ياعني مەكتەپتەر سالىنا باستادى. جىلدار بويى يگەرىلمەي كەلگەن ميلليونداعان گەكتار جەر ادال شارۋالارعا بەرىلەتىن بولدى.
جۇمىسشىلاردىڭ، ينجەنەرلەردىڭ جانە شارۋالاردىڭ ەسەلى ەڭبەگى، اسكەريلەر مەن قۇقىق قورعاۋ ورگاندارى قىزمەتكەرلەرىنىڭ قاستەرلى وتانىمىزعا قالتقىسىز قىزمەتى، كاسىپكەرلەردىڭ تابىستى جوبالارى، مادەنيەت قايراتكەرلەرىنىڭ شىعارماشىلىعى جانە عالىمداردىڭ ەلگە پايدالى زەرتتەۋلەرى ارقىلى ۇلتىمىزدىڭ جاسامپازدىق الەۋەتى ارتا ءتۇستى.
ءوز كاسىبىن ءمىنسىز اتقارىپ جۇرگەن مۇعالىمدەر، مەديسينا قىزمەتكەرلەرى جانە باسقا دا ەڭبەك ادامدارى – بۇگىنگى كۇننىڭ ناعىز باتىرلارى. ۆولونتەرلەر، مەسەناتتار، قۇتقارۋشىلار جانە وزگە دە جاناشىر ازاماتتار يگى ىستەر جاساپ، جانكەشتى ەرلىك كورسەتىپ، تىلەكتەستىك پەن قامقورلىقتىڭ وزىق ۇلگىسىن تانىتتى. ءبىز جاڭا قوعامدىق ەتيكانى قالىپتاستىرۋ، ەڭبەكقورلىق پەن ءبىلىمپازدىقتى دارىپتەۋ جانە كرەاتيۆتى ەكونوميكانى دامىتۋ ءۇشىن كوپتەگەن ماڭىزدى جۇمىستى قولعا الدىق.
ەلىمىزدە كاسىبي سپورتپەن قاتار، بۇقارالىق سپورت قارقىندى دامۋدا. اسىرەسە، بالالار دەنە شىنىقتىرۋمەن بەلسەندى اينالىساتىن بولدى. سول سەبەپتى مەملەكەت اۋىلدىق جانە قالالىق جەرلەردە جاڭا سپورت نىساندارىن سالىپ جاتىر.
قازاقستان ۇزاق مەرزىمگە ارنالعان ۇلتتىق مۇددەسىنە ساي كەلەتىن ساليقالى سىرتقى ساياسات جۇرگىزىپ، حالىقارالىق ارەناداعى بەدەلىن ارتتىرا ءتۇستى. ءبىر سوزبەن ايتقاندا، وسى جىل ءبىزدىڭ ەلىمىز ءۇشىن مول تابىسقا، جارقىن ساتتەرگە جانە ماڭىزدى وقيعالارعا تولى بولدى. جالپى، ەكونوميكامىز 4،9 پايىزعا ءوستى. تۇتاس جۇرت بولىپ كوپتەگەن وزەكتى ماسەلەنى شەشە باستادىق. وسىلايشا، ەلىمىزدىڭ دامۋىنا تىڭ سەرپىن بەردىك. ەڭ باستىسى، ءبىز جالپىعا بىردەي مۇمكىندىك بەرەتىن ادىلەتتى قازاقستاندى قۇرۋعا كىرىستىك. جۇرگىزىلگەن رەفورمالار ءوز جەمىسىن بەرە باستادى. بۇل – بارىمىزگە ورتاق ءىس. سوندىقتان مەن وسى ماڭىزدى جۇمىسقا اتسالىسقان بارشا ازاماتقا العىس ايتامىن.
جاڭا جىل – ءاردايىم جاڭا مىندەتتەر جۇكتەلەتىن، جاڭا سىن-قاتەرلەردى ەڭسەرەتىن كەزەڭ. ءبىز كەلەسى جىلى ۇلتتىڭ قايتا ورلەۋىنىڭ كۋاسى بولامىز. مەن بۇعان كامىل سەنەمىن. الايدا باسەكەگە قابىلەتتى ءارى دامىعان ەل بولۋ ءۇشىن ءالى دە كوپ تەر توگۋىمىز قاجەت.
جاڭا جىلدا مەملەكەتتىگىمىزدى نىعايتۋ جانە حالىقتىڭ ءال-اۋقاتىن ارتتىرۋ جولىنداعى جۇيەلى رەفورمالار جالعاسىن تابادى. ءبىز زاڭ مەن ءتارتىپتىڭ ۇستەمدىگىن ورنىقتىرۋ ءۇشىن كەشەندى شارالار قابىلدايمىز. مەملەكەت تاراپىنان ونەركاسىپتى، اۋىل شارۋاشىلىعىن، ەنەرگەتيكا جانە ەكونوميكانىڭ باسقا دا سالالارىن وركەندەتۋدى كوزدەيتىن تىڭ باستامالار قولعا الىنادى. ءبىز الەۋمەتتىك جاعدايى تومەن، كومەككە مۇقتاج جاندارعا ءاردايىم قامقور بولامىز. ءمۇعالىم، دارىگەر، قۇتقارۋشى، اسكەري قىزمەتشى، ءتارتىپ ساقشىسى جانە باسقا دا كاسىپ يەلەرىنە قولداۋ كورسەتەمىز.
ءبىز جاس ۇرپاقتىڭ جارقىن بولاشاعىنا جول اشاتىن ماڭىزدى شەشىمدەر قابىلداپ جاتىرمىز. جاقىندا ۇلتتىق قورداعى قارجىنىڭ ءبىر بولىگى بالالاردىڭ ەسەپشوتىنا تۇسە باستايدى. ەلىمىزدىڭ جاستارى بولاشاققا نىق سەنىممەن قاراۋى كەرەك.
كەلەسى جىلى ۇلتىمىزدىڭ تاريحىنا بايلانىستى ءبىرقاتار ءىس-شارا وتكىزىلەدى. حالقىمىزدىڭ تۇلعالارىن ەستە ساقتاپ، ولاردىڭ ەڭبەگىن دارىپتەۋ – ۇرپاق پارىزى. سونداي-اق الداعى جىلى ەلىمىزدە دۇنيەجۇزىلىك كوشپەندىلەر ويىنى وتەدى. سپورتشىلارىمىز جازعى وليمپياداعا قاتىسادى. تۇپتەپ كەلگەندە، ءار ازامات ءوز سالاسىنىڭ ناعىز مامانى بولۋى كەرەك. سوندا عانا وتانىمىز وسىپ-وركەندەيدى.
ءبىز ءاربىر تاڭعا ءۇمىت ارتامىز، ءاربىر جىلدان جاقسىلىق كۇتەمىز. ال ءۇمىتتىڭ اقتالۋى، ارمان-ماقساتتىڭ ورىندالۋى وزىمىزگە بايلانىستى. ەڭ باستىسى، ەلىمىزدەگى تاتۋلىقتى، تىنىشتىق پەن تۇراقتىلىقتى باعالايىق. بىرلىگى مىقتى ەلدىڭ رۋحى بيىك بولادى. ۇلى اباي ايتقانداي، بىرلىك دەگەنىمىز – ەڭ الدىمەن، اقىلعا – بىرلىك. مەملەكەتتىگىمىزدى ساقتاۋ ءۇشىن اۋىزبىرشىلىگىمىزدى ساقتايىق. قاستەرلى وتانىمىزدى كوركەيتەمىز دەسەك، تاباندى ەڭبەك ەتەيىك.
دامىعان مەملەكەت بولۋ ءۇشىن وزىق بىلىمگە ۇمتىلىپ، جاڭا تەحنولوگيانى، سونىڭ ىشىندە جاساندى ينتەللەكتىنى يگەرۋىمىز قاجەت. ءاردايىم بىر-بىرىمىزگە قامقور بولايىق. ۇلكەنگە – قۇرمەت، كىشىگە – ىزەت كورسەتەيىك. بالالارىمىزدىڭ تاربيەسىنە باسا ءمان بەرەيىك. ۇلگى-ونەگە بولىپ، ۇلاعاتتى ۇرپاق وسىرەيىك.
تاۋەلسىزدىك ۇرپاقتارى جاقسى قاسيەتتەردى بويىنا ءسىڭىرىپ ءوسىپ كەلەدى. ولار ونەردە، سپورتتا، عىلىمدا جانە بيزنەستە زور تابىسقا جەتۋدە. ءبىز جاستارىمىزدىڭ وسىنداي مىقتى، ادال ازامات بولعانىن ماقتان تۇتامىز. قازاقستاننىڭ بولاشاعى – وتانشىل، ءبىلىمدى، ەڭبەكقور ازاماتتاردىڭ، ياعني جاستاردىڭ قولىندا. مەن جاس ۇرپاقتىڭ جاسامپازدىق قۋاتىنا سەنەمىن!
ءبىز – ءبارىمىز تەك بولاشاققا، تەك العا ۇمتىلاتىن مەملەكەت بولۋىمىز كەرەك. ءبىز ءبىر ەل بولىپ بىرىكسەك، كەز كەلگەن بەلەستى باعىندىرامىز. ەڭ باستىسى، ەلىمىز تىنىش، ىرگەمىز ءبۇتىن بولسىن!
جاڭا جىلعا دەيىن ساناۋلى سەكۋندتار قالدى. تابالدىرىقتان اتتاعالى تۇرعان جىل ءبارىمىز ءۇشىن جەتىستىكتەرگە تولى بولسىن!
سونىمەن قاتار بۇگىن جاڭا جىلدىڭ قارساڭىندا جۇمىس ىستەپ جاتقان ادامدارعا ارنايى قۇتتىقتاۋىمدى جولدايمىن. سىزدەر ەلىمىزگە ادال قىزمەت ەتىپ جۇرسىزدەر. مەن بارشاڭىزعا شىنايى ريزاشىلىعىمدى بىلدىرەمىن.
جاڭا جىل ءار شاڭىراققا، ءار ازاماتقا قۋانىش پەن شاتتىق اكەلسىن!
ۇلكەندەرىمىز امان بولسىن!
بالالاردىڭ ارمانى ورىندالسىن!
ەڭبەكتەرىڭىز جەمىستى بولسىن!
ءتورت قۇبىلامىز تۇگەل بولسىن!
كوك تۋىمىز ماڭگى جەلبىرەسىن!
ءانۇرانىمىز شىرقالا بەرسىن!
جاڭا جىل قۇتتى بولسىن، اعايىن!
