فوتو: تجم
قازىرگى ۋاقىتتا اتىراۋ، اقتوبە، اقمولا، قوستاناي، سولتۇستىك قازاقستان وبلىستارىندا 3 444 جەر ءۇيدى، 336 اۋلا اۋماعىن سۋ باسىپ قالدى. بۇل تۋرالى ق ر توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيسەرى ەراسىل سايپاش وكق باسپا ءسوز ءماسليحاتىندا ايتتى.
سۋ تاسقىنى باستالعالى بەرى 96 مىڭنان استام ادام قۇتقارىلعان.
«سۋ شايعان 105 اۆتوجول، ونىڭ ىشىندە 8 كوپىر مەن 97 جول توسەمى باقىلاۋدا تۇر. كولىك قاتىناسىنسىز قالعان 69 ەلدى مەكەن باقىلاۋعا الىندى. رەسپۋبليكالىق جانە جەدەل شتابتار جۇمىسىن جالعاستىرىپ جاتىر. بارلىق كۇش پەن قۇرالدار توتەنشە جاعدايلاردىڭ الدىن الۋ مەن جويۋعا جۇمىلدىرىلدى»، - دەدى ەراسىل سايپاش.
ونىڭ ايتۋىنشا، تارتىلعان اۋە كەمەلەرىمەن 2 823 ادام، ونىڭ ىشىندە 865 بالا قۇتقارىلدى. ۋاقىتشا ورنالاسۋ پۋنكتتەرىنە 7 605 ادام، ونىڭ ىشىندە 3 474 بالا ورنالاستىرىلدى. 82 559 اۋىل شارۋاشىلىق جانۋار قاۋىپسىزدىك جەرگە ايدالدى. زارداپ شەككەن وڭىرلەرگە 167 935 كگ گۋمانيتارلىق كومەك جەتكىزىلدى. بىرلەسكەن كۇشتەرمەن 8،5 ملن استام تەكشە مەتر ەرىگەن قار سۋى سورىلدى. 2 750 تۇرعىن ءۇي مەن 1 816 اۋلا اۋماعىنان سۋ بۇرىلدى.
تاۋلىك بويى اۆاريالىق-قۇتقارۋ جۇمىستارىنا 24 295 ادام، 2 655 بىرلىك تەحنيكا، 469 سۋ سورۋ تەحنيكاسى جانە 139 ءجۇزۋ قۇرالى، 10 اۋە كەمەسى جۇمىلدىرىلدى. رەسپۋبليكالىق جانە جەدەل شتابتار جۇمىس ىستەيدى. تجم ازاماتتاردى سۋ تاسقىنى كەزىندە مۇقيات بولۋعا جانە قاۋىپسىزدىك شارالارىن قاتاڭ ساقتاۋعا شاقىرادى.