Қостанай облысына жұмыс сапары барысында премьер-министр Олжас Бектенов зауыттар мен кәсіпорындарды аралап, өндіріс басшылығымен және ұжымдарымен кездесулер өткізді. Осы сапарда сол сияқты бірыңғай уақыт белдеуіне көшу мәселесіне де айтылды. Бұл туралы Үкіметтің баспасөз қызметі хабарлады.
Үкіметтің баспасөз қызметі премьер-министр Олжас Бектенов тұрғындармен әңгімелесу барысында табиғи уақыттың азаматтардың денсаулығы мен әл-ауқатына оң әсері ғылыми дәлелденгеніне назар аударылғаны жазылған.
«2017 жылы америкалық ғалымдар тобы адамның циркадиялық ырғағын зерттегені үшін Нобель сыйлығымен марапатталды, бұл табиғи уақытқа сәйкес өмір сүрудің ең пайдалы екенін растады. Осы жұмыстың және басқа да ғылыми зерттеулердің негізінде 2022 жылы 80-нен астам елдің ғалымдары мен мемлекет қайраткерлері қол қойған Барселона декларациясы қабылданды», - делінген Үкімет хабарламасында.
Премьер-министр Қостанай облысының тұрғындарына және барлық қазақстандыққа осы маңызды шешімді түсініп, қолдағаны үшін алғысын білдірді.
«Қазақстан үшін табиғи уақыт белдеуі біз қазір өмір сүріп жатқан UТC+5 болып саналады. Бұрын өздеріңіз білетіндей, біз басқа UТC+6 белдеуінде болдық. Кезінде еліміз директивалық тәртіпте біз үшін табиғи емес белдеуге ауыстырылды. Қазір, керісінше, біз уақытты күн цикліне сәйкес келтірдік.
Мен бірыңғай уақыт белдеуіне ауысу кейбір адамдарға ыңғайсыздық тудыруы мүмкін екенін түсінемін. Ағза біртіндеп үйренеді. Осындай шешім қабылданды. Егер өңірлерде қандай да бір қолайсыздықтар болса, біздің еңбек заңнамамыз мүмкіндік беретін инфрақұрылымды, жарықтандыруды, ыңғайлы кестені ұйымдастыру арқылы жұмыс істеу қажет. Осы мәселелердің барлығын әрі қарай шешетін боламыз», — деп атап өтті Премьер-министр.
