Валюта бағамы
  • USD -

    477.7
  • EUR -

    521
  • RUB -

    5.41
Түркі ынтымақтастық ұйымдарының реформасы талқыланды
12 наурыз 2019
Түркі ынтымақтастық ұйымдарының реформасы талқыланды

Бүгін Түркі тілдес мемлекеттер ынтымақтастық кеңесінің (Түркі кеңесі) Бас
хатшысы Бағдат Әміреев пен Сыртқы істер министрі Бейбіт Атамқұлов
кездесіп, Түркі ынтымақтастық ұйымдарын реформалау мәселелерін
талқылады. Түркі кеңесінің делегациясы Қазақстанға ұйымға мүше
мемлекеттердің кеден қызметтері басшыларының отырысына қатысу үшін
жұмыс сапармен келген. Бұл туралы Сыртқы істер министрлігінің баспасөз
қызметі хабарлады.
Шолпан-Ата қаласында өткен Түркі кеңесінің 6-шы саммиті барысында
Қазақстан Республикасының Президенті Нұрсұлтан Назарбаев Түркі
ынтымақтастық ұйымдарын құрылымдық реформалау процесіне
бастамашылық етті. 
«Түркі тілдес мемлекеттердің ынтымақтастық кеңесі - қазіргі заманда рөлі
айтарлықтай артып келе жатқан бірегей халықаралық ұйым. Ұйымның
барлық мүшелері үшін Түркі кеңесінің беделі мен әлеуетін одан әрі нығайту
өте маңызды. Сондықтан Қазақстан Түркітілдес интеграцияның қазіргі
институттарын оңтайландыру және қызметтерін қайта форматтау мен
орталықтандыру бойынша нәтижелі жұмысқа үміттенеді», - деп атап өтті
Министр.
Өз кезегінде Б. Әміреев наурыз айының басында Абу-Дабиде өткен Ислам
Ынтымақтастығы Ұйымы (ИЫҰ) сыртқы істер министрлерінің 46-шы
сессиясы барысында Түркі кеңесінің ИЫҰ жанындағы бақылаушы
мәртебесін алуына жан-жақты қолдау көрсеткені үшін Қазақстан СІМ
басшысына алғысын білдірді. 
Түркі Кеңесінің Бас хатшысы Кеңеске мүше мемлекет басшыларының
уағдаластықтары мен тапсырмаларын іске асыру барысы туралы хабардар
етті. Ол Хатшылықтың ұйымды реформалау мәселесі бойынша мүше-
мемлекеттердің астаналарында белсенді консультациялар жүргізетінін
хабарлады. Сонымен қатар, жуырда бұл мәселе жөнінде Аға лауазымды
тұлғалар комитетінің кезекті отырысы өтеді. 
Бас хатшы Түркі кеңес мемлекеттері басшыларының Әзербайжандағы
саммитіне, Өзбекстандағы түркі мемлекеттерінің бизнес-форумына, сондай-
ақ салалық министрліктер мен ведомстволардың басшылары деңгейіндегі
бірқатар кездесулерге дайындық барысы туралы әңгімеледі. 
Сұхбаттасушылар мәдени-гуманитарлық жобаларды жүзеге асыру, баспа
және мұрағат қызметі туралы пікір алмасты.

 

RELATED NEWS
Түркі Кеңесі ақпараттық-коммуникациялық технологиялар бойынша министрлерінің үшінші кездесуі басталды
31 қаңтар 2019
Түркі Кеңесі ақпараттық-коммуникациялық технологиялар бойынша министрлерінің үшінші кездесуі басталды

Алматы қаласында Түркі Кеңесі ақпараттық-коммуникациялық технологиялар бойынша министрлерінің үшінші кездесуі басталды. Түркі Кеңесінің Бас хатшысы Бағдат Əміреевтің төрағылығымен өтіп жатқан жиынға ҚР Ақпарат жəне коммуникациялар министрі Дәурен Абаев,   Түркияның қатынас жəне инфрақұрылым министрі Мехмет Турхан, Қырғыз Республикасы Ақпараттық технологиялар жəне байланыс мемлекеттік комитетінің төрағасы Бақыт Шəршембиев, Əзербайжан Республикасының көлік, байланыс пен жоғары технологиялар министрінің орынбасары Эльмир Велизада, сонымен қатар Мажарстаннның инфокомуникация, инновация мен технологиялар министрлігінің мемлекеттік хатшысының орынбасары Кароли Солимар қатысуда. 
Тараптар киберқауіпсіздік, е-үкімет, TASIM жобасы мен ғарыш қызметтері саласындағы ынтымақтастықтыққа қатысты мәселелерді талқылауда. Қазақстанның ақпарат жəне коммуникациялар министрі Дәурен Абаев саладағы əлеуетті толық пайдалана алмай отырғанымызды айтты.

 

 

 

 

 

 

 

 

 

 

«ТҮРКІ КЕҢЕСІНІҢ» АТАУЫ «ТҮРКІТЕКТЕС МЕМЛЕКЕТТЕР ҰЙЫМЫ» БОЛЫП ӨЗГЕРУІ МҮМКІН
15 қазан 2019
«ТҮРКІ КЕҢЕСІНІҢ» АТАУЫ «ТҮРКІТЕКТЕС МЕМЛЕКЕТТЕР ҰЙЫМЫ» БОЛЫП ӨЗГЕРУІ МҮМКІН

 

Бүгін Әзербайжанның астанасы Бакуде Түркі тілдес мемлекеттердің ынтымақтастығы кеңесіне (Түрік Кеңесі) мүше елдер басшыларының VII саммиті болып өтті

Жиынға Қазақстанның Тұңғыш Президенті — Елбасы Нұрсұлтан Назарбаев,  Түркия Республикасының Президенті Режеп Тайып Ердоған, Өзбекстан Республикасының Президенті Шавкат Мирзиёев, Әзербайжан Республикасының Президенті Ильхам Әлиев, Қырғыз Республикасының Президенті Сооронбай Жээнбеков, Венгрияның премьер-министрі Виктор Орбан, Түрікменстан Республикасы премьер-министрінің орынбасары    Пурли Агамурадов пен Түркі Кеңесінің Бас хатшысы Бағдад Әміреев қатысты.

Алдымен саммитке қатысушылар бірге естелік суретке түсті. Сосын Әзербайжан Республикасының Президенті Ильхам Әлиев саммитті салтанатты түрде ашып, алқалы басқосуға келгендерге өз разылығын білдірді. Одан соң сөз алған Қырғыз Республикасының Президенті Сооронбай Жээнбеков Түркі Кеңесінің төрағалығы Әзербайжанға өтетінін хабарлады. Іле-шала Әзербайжан Республикасының Президенті Ильхам Әлиев Қазақстанның Тұңғыш Президенті — Елбасы, «Түркі Кеңесінің Құрметті Төрағасы» Нұрсұлтан Назарбаевқа «Түркі әлемінің жоғары орденін» тапсырды. Одан кейін Қазақстанның Тұңғыш Президенті — Елбасы Нұрсұлтан Назарбаев,  Түркия Республикасының Президенті Режеп Тайып Ердоған, Өзбекстан Республикасының Президенті Шавкат Мирзиёев, Венгрияның премьер-министрі Виктор Орбан, Түрікменстан Республикасы премьер-министрінің орынбасары Пурли Агамурадов пен Түркі Кеңесінің Бас хатшысы  Бағдад Әміреев сөз сөйледі. Бұдан кейін келесі саммитті Түркия Респубикасында өткізу туралы шешім қабылданды. Ары қарай құжаттарға қол қою рәсімдері жасалды. Соңында Әзербайжан Республикасының Президенті Ильхам Әлиев Түркі Кеңесіне мүше елдер басшыларының VII саммитін қорытындылады. Айта кетерлігі, бұл жолы  Түркі Кеңесіне Өзбекстан республикасы  толыққанды мүше болды. Өз кезегінде Нұрсұлтан Назарбаев «Кеңестің құрамына Өзбекстанның мүше болуы – бүкіл түркі тілдес қауымдастық үшін тарихи әрі көптен күткен оқиға. Будапештте Түркі кеңесінің өкілдігін ашу - ынтымақтастықтың Еуропа векторын дамытуда ерекше маңызды»,-деді. Сосын ол «болашақта Кеңесіміздің атауын қайта қарауды ұсынамын. Түркі тілдес мемлекеттер ынтымақтастығы кеңесін Ұйым деңгейіне дейін көтеруге болады деп санаймын. Осылайша, біздің құрылымды «Түркітектес мемлекеттер ұйымы» деп атауға болады», – деп ойын түйіндеді.

Суреттер president.az сайтынан алынды.

Түркі елдерінің  ақпараттық қауіпсіздік жиыны басталды
29 қаңтар 2019
Түркі елдерінің ақпараттық қауіпсіздік жиыны басталды

Алматы қаласында Түркі Кеңесіне мүше елдердің ақпарат және коммуникациялық технологиялар жұмыс тобының үшінші отырысы басталды. Шараға кеңеске мүше елдер Қазақстан, Қырғызстан, Түркия жəне Əзербайжанның ақпарат саласына жауапты мамандары қатысуда. Жиынды ҚР Ақпарат жəне коммуникациялар вице-министрі Дарын Тұяқов ашып берді. Түркі Кеңесі Бас хатшысының орынбасары Өмер Қожаманның төрағалығымен өтіп жатқан жиында киберқауіпсіздік, е-үкімет, TASIM жобасын жетілдіру мен ғарыш қызметтері тақырыптары талқылануда. Өмер Қожаманның айтуынша, түркітілдес елдер арасында ақпараттық ынтымақтасты арттыру мәселесін Қазақстан президенті Нұрсұлтан Назарбаев 2015 жылы Астанада өткен Түркі Кеңесі басшыларының саммитінде көтерген болатын. Содан бері біраз жұмыс жасалды əрі жалғасын тауып келеді. Ертенгі жиынға Түркі Кеңесіне мүше төрт елдің ақпарат саласы министрлері мен Түркі Кеңесіңің Бас хатшысы Бағдат Əміреев сондай-ақ Мажарстан елінің ақпарат саласы өкілдері қатысады.

 

 

 

 

 

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.