Түркияның елордасы Анкара қаласында Қазақстан Республикасының
Тәуелсіздік күні тойланды. Бауырлас мемлекеттегі Елшілігіміздің
фейсбуктегі ресми парақшасы таратқан мәліметтерге қарағанда, шара
жоғары деңгейде өткен.

Қазақстанның Түркиядағы Елшілігінің ұйымдастыруымен өткен ресми
қабылдауға Түркия Республикасы атынан бас қонақ ретінде Түркия Ұлы
Ұлттық мәжілісі төрағасы профессор Мұстафа Шентоп пен бауырлас елдің
бір топ зиялысы мен атқамінерлері қатысқан. Атап айтқанда, Түркия
Президентінің Бас кеңесшісі Ялчын Топчу, Көлік Вице-министрлері Ө.
Фатих Саян және С.Дурсун, Отбасы, еңбек және әлеуметтік қызметтер Вице-
министрі Айше Ергезен, Энергетика және табиғи ресурстар Вице-министрі
Алпарслан Байрактар, Сауда Вице-министрі Сезаи Учармак, Анкара
губернаторы Васип Шахин, Ескишехир губернаторы Өздемир Чакаджак,
Анкара мэрі Мансур Яваш, бұрынғы Мәжіліс төрағасы Джемил Чичек,
Қазақстан-Түркия парламентаралық достық тобының төрағасы, Мехмет Али
Джевхери, Түркия мәжілісі депутаттары, бірқатар университет ректорлары,
аудан әкімдері, партиялардың басшылары, бұрынғы министрлер, Елшілер,
Халықаралық ұйым басшылары, Түркі кеңесі Бас хатшысы Бағдат Әмреев,
Қазақстанның құрметті консулдары, инвесторлар, дипломатиялық миссия,
зиялы қауым, іскер топ, диаспора мен БАҚ өкілдері, қазақстандық
тәлімгерлер және қонақтар қатысты.
Ресми қабылдау алдында қонақтар Қазақстаннан арнайы жеткізілген
«Казбееф» маркалы еттің дәмін татты. Оны түріктің әйгілі азпазшысы,
«ScarlEt Steakhouse» иесі Сүлеймен Дилек өзі дайындап, қонақтарға ұсынды.
Алқалы қабылдаудың беташар сөзін сөйлеген Қазақстанның Түркиядағы
Елшісі Абзал Сапарбекұлы ең басты мереке — Тәуелсіздік күнімен жиналған
қауымды құттықтады. Егемендігіміздің 28 жылында Қазақстанның жеткен
жетістіктеріне тоқталған ол бауырлас Түркияның әрдайым көрсеткен
қолдауын атап өтті. Еліміздегі саяси реформаларды тілге тиек еткен Елшісі
Елбасы Нұрсұлтан Назарбаевқа Түркия Президенті Режеп Тайып
Ердоғанның бастамасымен Түркі Кеңесінің құрметті төрағасы атағы
берілгенін еске салды. Президентіміз Қасым-Жомарт Тоқаевтың қоғамның
демократиялық құқықтары мен қауіпсіздігін сақтау, халықпен тиімді
байланыс орнату, саяси реформалар, ұлттық кодты қалыптастыру
жұмыстарын жалғастыру, көп векторлы және теңгерімді сыртқы саясат және
жастарды билікке тарту секілді саяси басымдықтарына назар аударған Абзал

Сапарбекұлы жуырда Қазақстан Премьер-министрі Асқар Маминнің де
Түркияға жасаған сапары туралы әңгімеледі. Тәуелсіздігіміздің және
бауырлас қазақ-түрік ынтымақтастығының маңызына тоқталған Елші, сөзін
бабаларымыздың «Бірлік болмай – тірлік болмас» деген мақалымен
тәмамдады.
Айтулы кештің ашылу салтанатында сөз сөйлеген ТҰҰМ төрағасы Мұстафа
Шентоп «Түркия Қазақстанның Тәуелсіздігін мойындаған алғашқы мемлекет
болғанын әрдайым мақтан тұтады. Елдеріміз арасындағы қарым-қатынастар
біз үшін өте маңызды. Алға қойылған 10 млрд. долларлық сауда айналымы
межесіне жету үшін қыруар жұмыс атқарылуда. Қазақстанның қуанышы
біздің де қуанышымыз»,- деді. Елбасы Н.Назарбаевтың көреген саясатын
тілге тиек еткен М.Шентоп «Назарбаевтың қайраткерлігі тек Қазақстан үшін
ғана емес, барша Түркі әлемі және аймақтағы елдердің дамуына бағыт
көрсететін жұмыстары да қызығушылық тудыратынына» тоқталған ол
Қазақстан мемлекеті Тәуелсіздігінің 28-ші жылдығымен құттықтады.
Сондай-ақ алқалы кеште ТҰҰМ төрағасы М.Шентоп Елші А.Сапарбекұлына
Елбасы Нұрсұлтан Назарбаев атына Түркі әлемі жазушылар және
өнерпаздардың «Türksav» қоры атынан 1919 жылы 19-мамырда Ататүрік
бастаған ұлт-азаттық соғыстың 100 жылдығы құрметіне тағайындалған «19
мамыр Түркі әлемінің жаңғыруы» марапатын табыс етті.
Түркі әлемінің әдебиет және өнер салаларындағы ынтымақтастығын
арттыруға бағытталған жұмыстар жүргізетін «Türksav» қорының бұдан
бұрын Елбасына «Түркі әлеміне қызмет сыйлығын» бергенін айта кеткен
жөн.
Ресми қабылдау Нұр-Сұлтан қаласының әкімдігі мемлекеттік академиялық
филармониясының Қазақ оркестрі, «Қорқыт ата» көне аспаптар саз тобының
концертімен және қазақтың ұлттық тағамымен көмкерілген мол дастарханға
ұласты.

Суреттер Қазақстанның Түркиядағы елшілігінің фейсбуктегі ресми
парақшасынан алынды.