Саясаттанушы, ҚР Президенті жанындағы Ұлттық құрылтай мүшесі Қазыбек Майгелдинов Астанада бүгін өткен ШЫҰ саммитіне қатысты пікір білдірді, деп хабарлайды Ulys.
«Қанша уақыт бойы күтіп жүрген ШЫҰ саммиті өтті. Қазақстан ұйымға бір жыл төрағалық етіп, енді міне бүгін соның қорытындысын шығарды. Саммитке әлемнің жер-жерінен мемлекет басшылары мен халықаралық ұйым өкілдері келген екен. Оның үстіне бүгін Беларусь ұйымға мүше атанды. Бастапқыда Шанхай бестігі ретінде құрылған ұйымға Беларусь қосылып, ондыққа айналды.
Жалпы, бүгінгі өтіп жатқан іс-шараның маңызы зор. Аталмыш ұйым бір кездері Еуразия аймағындағы ынтымақтастықты нығайту үшін құрылған болатын. Ал қазір әлем терроризм, экстремизм, киберқауіптер пен климаттың өзгеруі сияқты түрлі қауіптердің алдында тұрған кезде, ШЫҰ рөлі күн санап артып келеді.
Сонымен бүгінгі күн Қ. Тоқаевтың қатысумен өткен ШЫҰ-ға мүше мемлекеттер басшылары кеңесінің отырысынан басталды. Отырыста сөз сөйлеген басшымыз бүгінде Шанхай ынтымақтастық ұйымы достық, тату көршілік, теңқұқықтық пен өзара қолдаудың, яғни «шанхай рухы» негізінде жұмыс істейтін мемлекетаралық қатынастардың тиімді тетігіне айналғанын атап өтті. Былтырдан бастап ұйымға төрағалық еткен уақыт аралығында түрлі деңгейде 150-ге жуық іс-шара, соның ішінде цифрлық даму, туризм, энергетика, бизнес салаларында форумдар мен ШЫҰ жастар кеңесі өткізілді. Бұл жайлы да Қ. Тоқаев мәлімдеді. Ары қарай өз сөзінде түрлі іс-шаралардың нәтижесінде ШЫҰ кеңістігіндегі сауда-экономикалық ынтымақтастық қарқынды дамып келе жатқанына тоқталды», -дейді саясаттанушы.
Оның айтуынша Тоқаев Қазақстан ШЫҰ төрағасы ретінде алдыңғы саммитте айтылған барлық мақсат-міндетті толығымен орындағанын айтты.
«Президент еліміздің бастамаларын жүзеге асыруға қолдау көрсетіп, белсенді атсалысқаны үшін барлық мемлекетке шынайы ризашылығын білдірді.
Әрине, Президент қауіпсіздік саласындағы өзара сенім мен ынтымақтастықты нығайтуды бірінші маңызды бағыт екенін де назардан тыс қалдырған жоқ», - дейді сарапшы.
