«Ақ жол» партиясының төрағасы Азат Перуашев пен экс-депутат Асқар Садықов арасындағы дау жаңа мәліметтердің бетін ашуда, деп хабарлайды Ulys.
Бұған дейін партия төрағасы Азат Перуашев Асқар Садықов депутат болып жүргенде парламенттегі бір әйелге сексуалды сипатта бопса жасағанын айтып, дәлел ретінде әйелдің арызы мен скриншоттарын жариялаған болатын.
Экс-депутаттың өрескел қылығы туралы «Ақ жол» партиясының төрағасы Азат Перуашев жазды. Ол Асқар Садықовтың партиядан шығарылғаны жөніндегі тілшілерге түсініктеме берген.
«Партиямыздың атына А.Садықовқа қатысты бірқатар шағым түсті, онда айтылған жәйттар пленумда қаралып, тиісті шешім шығарылды. Шағымдардың дені оның теріс іс-әрекеттеріне, атап айтқанда, өкілеттігін асыра пайдалану мен этикалық нормаларды бұзуына байланысты болды. Шағымдардың әрқайсысы бойынша жеке-жеке фактілер келтіруге болатын болса да, бір ғана мысалды атап өту жеткілікті деп ойлаймын. Мәселен, парламентте (партияда емес) жұмыс істейтін бір әйел адам А.Садықовтың бірнеше рет ұятсыз ұсыныстар жасап, қысым көрсеткені туралы айтып арызданды. Ол өзінің сөзіне дәлел ретінде ватсабына А.Садықовтан келіп түскен хабарламалардың скринін көрсетті (этикалық себептертерге байланысты оның бопсалауына тап болған аталған жәбірленушінің есімі жасырылған)», - дейді Перуашев.
Бұған жауап ретінде экс-депутат Садықов Азат Перуашев туралы өз шындығын жайып салды.
Оның сөзінше, Азат Перуашевтың орынбасары Ұлттық гвардия генералына пара берген.Сосын Садықов «Азат Перуашев ұлттық қауіпсіздікі ұстап алған орынбасарына қатысты шуды басқа арнаға бұру үшін мені осылай қаралады» деді.
Оған жауап ретінде «Ақ жол» партиясы тағы бір түсініктеме таратып отыр.
«Асқар Садықов партия төрағасы келтірген деректерден басқа өзін партия қатарынан шығаруға негіз боларлық еш дәйектің жоқтығын алға тартыпты. Ол тіпті, харрасмент фактілерін жоққа шығарып та отырған жоқ. Соның өзі ғана оны партия қатарынан шығаруға жетіп жатыр. Алайда, партия төрағасы Садықовқа тағылған айыптар өзге де салмағы ауыр жайттарға қатысты екендігін тілге тиек еткені бекер емес. Мысалы, Садықовтың үшінші тұлғалардың пайдасы үшін өз өкілеттілігін асыра пайдалану әрекеті анықталды», - дейді партияның баспасөз қызметі.
Яғни, партияның баспасөз қызметі хабарлағандай, харассмент – этикалық нормаларды бұзатын жайт болса, лауазымын асыра пайдалану құқық қорғау органдарының құзыретіне жататын құқықтық қылмыс.
«Осының бәрі пленумда талқыланып, Садықовтың әрекеттері партия беделіне нұқсан келтіруі мүмкін деген қорытынды жасалды. Мәселе Садықов депутат ретінде мемлекеттік сатып алу процедурасына араласуы және өз таныстарының тендерлерде жеңіске жетуін қамтамасыз ету талаптары туралы болып отыр (әкімдердің бірінің А.Садықовтың мемлекеттік сатып алу нәтижелеріне ықпал етуге тырысқаны жөнінде ресми хаттары қолымызда бар). Адал бизнес пен шынайы бәсекелестікті қолдайтын «Ақ жол» демпартиясы осы жағдайды сараптай келе мұндай әрекеттер партияның Жарғысы мен Бағдарламасына қайшы келеді деп есептейді», - деп хабарлады партия.
Осыған байланысты пленум оны партиядан шығару туралы шешім қабылдаған.
Айта кетейік, 4 қыркүйек күні Ұлттық қауіпсіздік комитеті Ұлттық ұлан бас қолбасшысының орынбасары Константин Воронкинді ұстағаны туралы хабарлаған болатынбыз.
