Қазақстанның Түркиядағы Елшісі Абзал Сапарбекұлы жылдың ең үздік дипломаты атанды. Ақжолтай ақпарат елшіліктің фейсбук әлеуметтік желісіндегі (https://www.facebook.com/kzembassy) ресми парақшасында жарияланды.
«Жібек жолы» Стратегиялық зерттеулер орталығы және «Жібек жолы» баспа тобының ұйымдастыруымен өткен шарада «Халықаралық 15-ші Жібек жолы биылғы жылдың Алтын адамдары» белгілі болды. Осы ретте, Қазақстанның Елшісі Абзал Сапарбекұлына «Жылдың ең үздік дипломаты» сыйлығы берілді.
Ұлы Жібек жолының өркениеттер арасындағы сауда-саттық, бауырластық ынтымақтастығын орнату жолындағы миссиясын үлгі алған «Жібек жолы» Стратегиялық зерттеулер орталығының басты мақсаттарының бірі Түркия мен басқа елдер арасында достық және ынтымақтастық көпірін құру.
Түркияның зиялы қауым өкілдері, дипломатиялық миссия басшылары, кәсіпкерлер мен БАҚ өкілдері қатысқан салтанатты шарада сөз сөйлеген Елші А.Сапарбекұлы еліміздің сыртқы саясатына тоқтала отырып, мәртебелі сыйлыққа ие болуын, жеке өзінің емес, Қазақстан дипломатиясының жемісі деп бағалайтынын жеткізді. Қазақстанның көпвекторлы, бейбіт, белсенді және теңгерімді сыртқы саясаты арқылы аймақ пен әлемнің тұрақтылығы мен бейбітшілігіне елеулі үлес қосып отырғанына назар аударған Елші А.Сапарбекұлы Елбасы Нұрсұлтан Назарбаевтың Астана процесі, Түркі кеңесінің құрылуы, еліміздің БҰҰ қауіпсіздік кеңесі шеңберіндегі жұмысы секілді халықаралық аренадағы жемісті бастамалары туралы сөз етті. Тәжірибелі мемлекет қайраткері және көрнекті дипломат Қасым-Жомарт Тоқаевтың Президент атануы сыртқы саясатымыздағы сабақтастықтың кепілі екендігін жеткізген Қазақстан Елшісі қазақ-түрік ынтымақтастығына да тоқталды.
«Халықаралық 15-ші Жібек жолы биылғы жылдың Алтын адамдары» номинациясында басты марапат Өзбекстан Президенті Шавкат Мирзиёевке берілді. Сондай-ақ, Молдова Гагауз автономиялық аймағының президенті Ирина Влах, ТҰҰМ депутаты, Әзербайжан-Түркия Парламенттер арасы достық тобы төрағасы Шамиль Айрым, Түрксой Бас хатшысы Дүйсен Қасейінов, «Öztek Тekstil» басқарма төрағасы Ахмет Өзтек, бүкіләлемдік Ахыска түріктері қауымдастығы Президенті Зияеддин Исмиханоғлу, «Yükselir Group» басқарма төрағасы Явуз Юксель, «Edelstaal Şirketler Grubu» басшысы Тургут Торуноғуллары, Халықаралық білім орталығы басшысы проф. Елчин Исгендерзаде және «Marmara Grubu» қорының басшысы Аккан Сувер түркі әлемінің ынтымақтастығына қосқан үлестері үшін түрлі салалардың үздіктері атанды.
