Валюта бағамы
  • USD -

    454.5
  • EUR -

    488
  • RUB -

    5.03
ҚАЗАҚСТАННЫҢ БАС МҮФТИІ «РУХАНИ КАРТА» ЖАСАУДЫ ҰСЫНДЫ
12 сәуір 2019
ҚАЗАҚСТАННЫҢ БАС МҮФТИІ «РУХАНИ КАРТА» ЖАСАУДЫ ҰСЫНДЫ

Елордада болып өткен «Рухани Жібек жолы. Ислам және жастар: қазіргі заман сын-қатерлері» атты IV Халықаралық ғылыми-діни конференцияда баяндама жасаған Бас мүфти Серікбай қажы Ораз Жібек жолы елдерінің рухани картасын жасауды ұсынды. Бұл туралы ҚМДБ баспасөз қызметі хабарлады.

 

«Өткенсіз болашақ жоқ. Біз өткеннен өнеге алған халықпыз. Осы ретте әріптестеріме Ұлы Жібек жолы елдерінің «Рухани картасын» жасауды ұсынамын. Рухани карта өскелең ұрпақтың тарих пен руханият саласына қатысты сұрақтарына жауап беретін бейнебір бағдаршам, шамшырақ болуы тиіс. Тарихынан тағылым алған, ал тарихи тұлғалардан тәлім көрген ұрпақ діні мен дәстүрін үйлестіріп, өнегелі өмір сабақтастығын қалыптастырмақ. Бұл бастама тарихшы ғалымдар мен дін ғұламаларының Жібек жолы тарихын ғибраттың көзімен қайта зерттеуін қажет етеді», – деп атап өтті өз баяндамасында Серікбай қажы Сатыбалдыұлы.

«Рухани Жібек жолы. Ислам және жастар: қазіргі заман сын-қатерлері» атты IV Халықаралық ғылыми-діни конференция Қазақстан және Ресей мұсылмандары діни басқармаларының ұйымдастыруымен өтті.

Айта кетейік, конференция жұмысына ҚР Ақпарат және қоғамдық даму министрі Дәурен Абаев, Бас мүфти Серікбай қажы Ораз,  Ресей мұсылмандары діни басқармасы және Ресей мүфтилер кеңесінің төрағасы, мүфти, шейх Равиль Гайнутдин, Өзбекстан мүфтиі Усмонхон Алимов, Қытай Ислам қауымдастығының төрағасы Хасан Фа Мин, Қырғызстан мүфтиі Мақсатбек қажы Тоқтомушев, Моңғолия мүфтиі Батырбек Хадыс, Финляндиядағы Ислам орталығының төрағасы Голтен Бедретдин, т.б. дін қайраткерлері, діни саладағы мемлекеттік органның басшылары, зиялы қауым өкілдері, жалпы саны 300 делегат қатысты.

 

 

Конференцияға қатысқан ҚР Ақпарат және қоғамдық даму министрі Дәурен Абаев жастардың санасына жат ағымдарға қарсы мықты иммунитет қалыптастыру маңызды екенін атап өтті.  

«Радикализмге адамдар қандай себеп бойынша бұрылып кететінін анықтау қажет. Оған жекелеген адамдарды гуманистік, интеллектуалдық, мәдени жағдайлар да итермелеуі мүмкін. Сондықтан да заманауи зайырлы мемлекеттің дін өкілдері аймақтардағы дәстүрге мән беріп, мәдени бағыттағы, ғылым мен білім саласындағы артықшылықтарды ескеруі тиіс деп ойлаймын.

Біз жас ұрпақтың дүниетанымын дұрыс қалыптастыруымыз керек. Қазіргі жастар өз пікірлерін ашық айта алады. Олар бәсекеге қабілетті, білімге құштар. Ең бастысы олардың санасына жат ағымдарға қарсы мықты иммунитет қалыптастыру маңызды», – деді Дәурен Әскербекұлы.

2019 – Жастар жылы аясында өткізілген конференция мақсаты – өскелең ұрпақты деструктивті ағымның ықпалынан сақтандыру, оларға дұрыс діни ақпарат жеткізу, діни экстремизм мен терроризмді алдын алу мақсатында Еуразия және Орталық Азия елдері дін қайраткерлерінің күшін біріктіру, тәжірибе алмасу, «Рухани жаңғыру» идеясын насихаттау, жаһандық діни мәселелерді шешуде жаңа әдіс-тәсілдерді ұсыну, ұлтаралық, конфессияаралық диалогты нығайту, т.б.

Конференция соңында қатысушылар арнайы қарар қабылдады.

 

 

 

Суреттер www.muftyat.kz сайтынан алынды.

RELATED NEWS
Нұрлан иман: Дінге, ұлтқа қызмет ету тек мешіт салумен шектелмейді
01 сәуір 2024
Нұрлан иман: Дінге, ұлтқа қызмет ету тек мешіт салумен шектелмейді

Таяуда Атырауда «Адал адам – Адал еңбек – Адал табыс» атты тақырыппен Ұлттық құрылтайдың үшінші отырысы өткен болатын. Осы құрылтайға арнайы қатысқан Мемлекет басшысы Қасым-Жомарт Тоқаев маңызды идеологиялық тұжырымдарымыз бен негізгі бағыттарымыз – Тәуелсіздік және Отаншылдық, Бірлік және Ынтымақ, Әділдік және Жауапкершілік, Заң және Тәртіп, Еңбекқорлық және Кәсіби біліктілік, Жасампаздық және Жаңашылдық екендігін жан-жақты айта келе елдегі дін мәселесіне, мешіт мәселесіне де айрықша тоқталған болатын. 
«Елге жанашыр іскер азаматтар бізде де аз емес. Мұндай азаматтар қоғамға қажетті көптеген жобаға қаржы салып, игі істердің басы-қасында жүр. Қайырымдылық және волонтерлік бастамаларға демеушілік жасап келеді. Мемлекет те отаншыл азаматтарды өзгелерге үлгі етіп, оларға қолдау көрсетеді. Әрине, аймақтарда өз қаржысына мешіт салған кәсіпкерлердің ниеті түзу, оны түсінуге болады. Алайда жаңа мектеп, жатақхана, аурухана, кітапхана, мұражай немесе спорт сарайын тұрғызу әлдеқайда маңыздырақ. Мұның сауабы мол. Кейінгі ұрпақ та осындай игі істерге алғыс айтары анық», - деген еді Президент.
Астанадағы «Алланың гүлі» аталып кеткен Ырыскелді қажы атындағы мешіттің бас имам Нұрлан имам Байжігітұлы да Президенттің мешіт салуға қатысты пікірін құп көретіндігін айтады.
«Мемлекет басшысы Атырауда өткен Ұлттық құрылтайда дінге қатысты өте дұрыс мәселелер көтеріп, мешіт салу ісіне қатысты айрықша тоқталып өтті. Яғни, дінге қызмет ету, ұлтқа қызмет ету тек мешіт салумен ғана шектелмейді. Жол салу, балабақша салу, мектеп салу да ұлтқа қызмет саналады. Мешіт салынған кезде нормативтік-құқықтық актілерінің бәрі реттелуі тиіс және де елімізде орынды жүргізіліп келеді», - деді Нұрлан имам. 
Есте болса, сол құрылтайда Мемлекет басшысы ислам елдерінде әйгілі дін қайраткерлерінің бейіті міндетті түрде жапқышпен жабылатындығын айта келе Ясауи кесенесіне қатысты көне жәдігерге назар аудартқан еді.
«Мәдинадағы Мұхаммед Пайғамбардың қабірі де осылай бүркелген. Бұл – Ислам өркениетінің дәстүрі. Ал қасиетті Түркістандағы Ясауи қабірінде көптен бері арнайы жапқыш жоқ. Талай заманнан келе жатқан көне жапқышты қалпына келтіру жұмысы біраз жыл бұрын басталып, аяқсыз қалған. Мен құзырлы мемлекеттік органға осы құнды мұраны тезірек сапалы жөндеуден өткізіп, тарихи орнына қайтаруды тапсырамын», - деген болатын Қасым-Жомарт Кемелұлы.
Нұрлан имам дәл осы мәселеге де айрықша тоқталып өтті. 
«Иә, ислам Қожа Ахмет Ясауи сынды тарихи тұлғалардың қабірінде жапқыш болады. Жалпы, жапқыш тек тарихи тұлғаларға ғана емес, кез келген адамның жаназасында жабылады. Онда «Бәріміз жаратқаннан келгенбіз», «Бәріміз Аллаға қайтамыз» деген сияқты ескертпе, аңдатпа дұғалар жазылады. Мұндай жапқыштар бар дүние. Меніңше, бұл жапқышты қымбат тастармен әспеттеп, ерекше дайындаса, өте құнды әрі дұрыс болады. Барлық адамға, әсіресе, мұсылман елдерінен келетін тұлғаларға түсінікті болуы үшін ол кісінің өмірін, еңбектерін араби нұсқада жазып қойған жөн. Ертеректе бабаларымызда каллиграфия өнері жақсы дамыған. Соны қайта жандандыруымыз қажет», - деді Ырыскелді қажы атындағы мешіттің бас имамы.
Сонымен қатар ол Марал ишан, Ырғызбай би, Қабанбай, Бөгенбай, Райымбек батырлар сынды есімі елімізге танымал адамдардың қабірінде де жапқыш болуы тиістігін баса айтты. 
«Елімізде тыйым салынған «Ата жолы» сынды ұйымдар қабір басына мата жауып кете береді. Қабір басы ақтыққа толып қалады. Шаманизм элементін жасамамауымыз керек. Жалпы, Президентіміздің айтқан сөзінің астарында мұсылман екенімізді көрсететін үлкен даналық жатыр. Сондықтан толықтай қолдаймын», - деді ол.

2019 ЖЫЛҒЫ ОРАЗА ЖӘНЕ НАМАЗ КЕСТЕСІ
28 сәуір 2019
2019 ЖЫЛҒЫ ОРАЗА ЖӘНЕ НАМАЗ КЕСТЕСІ

Қазақстан Мұсылмандары Діни басқармасының сайтында биылға арналған Қазақстан елдімекендерінің Рамазан айындағы ораза және намаз кестесі жарияланды. Төралқа Мәжілісі мүшелерінің бірауызды шешімімен биылғы пітір садақа мөлшері – 300 теңге болып бекітілді. Пітір садақаны Рамазан айының бірінші күнінен ораза айт намазына дейін беруге болады.

Қазақстанның өзге елдімекендері бойынша Рамазан кестесін білгіңіз келсе төмендегі сілтемені басып, жүктеп ала аласыз.

www.muftyat.kz

Биылғы ораза кестесі жарияланды
20 сәуір 2020
Биылғы ораза кестесі жарияланды

Қазақстан Мұсылмандары Діни басқармасының ресми сайты 2020 жылға арналған Рамазан айының ораза және намаз кестесін жариялады.

 

Сондай-ақ, биылғы пітір садақа мөлшері – 370 теңге болып бекітілді. Оразаның алғашқы күні 2020 жылдың 24 сәуірі, жұмаға сәйкес келеді. 

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.