Валюта бағамы
  • USD -

    444.9
  • EUR -

    484
  • RUB -

    4.97
Қазақстанның 10 облысы су астында қалды: Тоқаев үндеу жасады
06 сәуір 2024
Қазақстанның 10 облысы су астында қалды: Тоқаев үндеу жасады

Мемлекет басшысы Қасым-Жомарт Тоқаев су тасқыны салдарынан қалыптасқан ауыр жағдайға байланысты үндеу жариялады. Ulys үндеудің толық мәтінін жариялайды.

***

Құрметті отандастар!

Бүгін мен еліміздің азаматтарына арнайы үндеуімді жолдап отырмын. Баршаңызға белгілі, қазір елімізде күрделі жағдай қалыптасып отыр. Қардың күрт еруіне байланысты аймақтарда су тасқыны болып жатыр. Бұл – табиғи апат. Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады.

Су тасқынына байланысты еліміздің он аймағында төтенше жағдай жарияланды, яғни Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында.

Атқарушы органдар жіберген олқылықтарды түзеу үшін мен шұғыл түрде нақты тапсырмаларды бердім. Қазір барлық қажетті шаралар қабылданып жатыр. Үкімет қарғын судың салдарын жоюға бар күшін салуда.

Премьер-Министрдің басшылығымен Республикалық штаб құрылды. Премьер-Министрдің өзі, оның орынбасарлары және Төтенше жағдайлар министрі апат болған аймақтарды аралап жүр. Барлық құтқару жұмыстары менің тікелей бақылауымда.

Су тасқынымен күресуге Төтенше жағдайлар министрлігінің барлық ресурсы тартылды. Сондай-ақ құтқару жұмыстарына Ішкі істер министрлігі, Ұлттық ұлан, Қарулы Күштер және Ұлттық қауіпсіздік комитетінің мамандары белсене атсалысып жатыр. Зардап шеккен аймақтардың әкімдіктері күндіз-түні жұмыс істеуде. Ондаған мың волонтер де көмектесіп жүр.

Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз. Ең бастысы – азаматтардың амандығы.

Тасқын судан зардап шеккен азаматтарға айтарым, мемлекет бірде-бір адамды ескерусіз қалдырмайды. Баршаңызға қаржылық және басқа да көмек беріледі. Материалдық шығындар толық өтеледі.

Біз алапат су тасқынынан тиісті қорытынды шығаруымыз керек. Яғни, жіберілген олқылықтарды түзетіп, тиісті сабақ алуымыз қажет. Ал ондай сабақтар аз емес.

Апаттардың алдын алу жұмысындағы кемшіліктен бастап, су шаруашылығы мамандарының тапшы болуы, табиғатқа немқұрайлы қарауға дейін көп мәселені реттеу қажет. Үкімет және жергілікті атқарушы органдар су тасқынымен күресті тиімді үйлестіріп отыруға тиіс. Су басқан аумақтарда құқықтық тәртіпті қамтамасыз ету қажет.

Менің бұйрығыммен апатқа қарсы күреске Қорғаныс министрлігі қосымша әскери күштерін жолдайды. Халыққа көмектесу үшін Үкіметке мемлекеттік материалдық резервті пайдалануды тапсырамын. Сондай-ақ Үкімет шығындарды өтеудің тиімді жолдарын шұғыл қарастыруға тиіс. Оны зардап шеккен азаматтарға жан-жақты түсіндіру керек. Берілетін өтемақы шығынды толық жабуы қажет.

Жағдайы неғұрлым күрделі аймақтардағы жұмысты үйлестіру үшін Үкімет басшысының орынбасарларына аймақтарға шығуды тапсырамын. Олар ахуал түзелгенше сол жерде болады. Ақпараттық штаб азаматтарды мемлекет қабылдап жатқан барлық шаралар жөнінде үздіксіз және жан-жақты хабардар етіп отыруға тиіс.

Бұқаралық ақпарат құралдарына, белсенді азаматтарға және блогерлерге айтарым, жұртты дүрбелеңге салатын жалған ақпараттарды таратпау қажет. Қазіргі уақытта билік пен қоғамды ұйыстыратын әрекеттер жасау аса маңызды. Азаматтарды тек қана ресми ақпарат көздеріне сүйенуге шақырамын.

Құтқарушыларға, тәртіп сақшыларына, волонтерлерге және апатпен күресуге атсалысып жатқан барша жұртқа алғысымды айтамын. Осындай қиын-қыстау кезде бір жағадан бас, бір жеңнен қол шығару айрықша маңызды. Бір ел, бір халық болып жұмылып, бұл апатты еңсереміз. Бұл біздің қолымыздан келеді.

RELATED NEWS
Климаттың өзгеруіне сай әрекет етуді үйрену қажет – су маманы
03 сәуір 2024
Климаттың өзгеруіне сай әрекет етуді үйрену қажет – су маманы

Елімізде жыл сайын көктем келе салысымен су тасқынымен күрес жұмыстары басталады. Су шаруашылығының маманы, гидротехник Аманбек Рамазанов мұндайға жол бермеу үшін ерте қам жасап, арналар мен қоймалардың дұрыс жөнделу жауапкершілігін заңнама арқылы меншік иесіне жүктеу қажеттігін айтады.

«Су тасқынына дайындықты ауыл шаруашылығында суару маусымы аяқталғаннан кейін бірден бастаған жөн болды», - деді су маманы.

Оның айтуынша, бұрын әр облыста су шаруашылығы басқармасы және ірі шаруа қожалықтары болды. Мұнан бөлек, жылжымалы механикаландырылған лектер қызмет көрсетті. Олар каналдардың арнасын тазарту, су тығыздағыштарды, бөгеттерді жөндеу жұмыстарын күзде, тіпті жаздың соңында бастап кететін. Қазір осы тәртіпті қолға алу қажет.

«Әкімдіктер жылыту маусымы аяқтала салысымен келесі жылыту маусымына дайындықты бірден бастап кетеді. Яғни, олар келесі жылыту маусымына дайындықты күзде емес көктемде, ағымдағы жылдың жылыту маусымы аяқталғаннан кейін бірден қолға алады. Дәл солай су тасқынына дайындықты суару маусымынан кейін бірден бастау керек. Әрине, мұны айту оңай, ал жасау  өте қиын екені түсінікті», - деді Аманбек Рамазанов.

Осы орайда гидротехник мұндай жағдайда каналдар мен гидротехникалық жабдықтарды кім ретке келтіруі тиістігіне тоқталды.

«Меніңше, мұны мемлекеттік немесе жеке меншікте болғанына қарамастан құрылыс нысандарының иелері істеуі керек. Бұл міндеттер заңмен белгіленуі тиіс. Қазір қолданыстағы заңдарда мұндай міндеттер көзделмеген, жоқ. Ал ол жұмыстарды ұйымдастыру жауапкершілігі заң жүзінде Су ресурстар министрлігі мен жергілікті атқарушы органдарға жүктелуі қажет. Сонымен қатар мұндай міндеттерді бассейндік кеңестерге де жүктеуге болады. солай болған жағдайда аталған кеңестердің рөлі мен құрамы заңмен күшейтілуі керек. Осы шаралар қолға алынған жағдайда жұртшылық шешім қабылдауға қатысуға және осы жұмыстардың орындалуын бақылауға мүмкіндік алады. Бұл көптеген дамыған елдерде бар тәжірибе», - деді ол.

Су маманы соңғы жылдары климат өзгеріп, ауа температурасы жылып келе жатқандығына назар аудартып, соның салдарынан туындайтын қиындықтарға қарсы тұруды үйрену қажеттігін баса айтады.

«Ол үшін «Азаматтық қорғау туралы» Заңда қазіргідей төтенше жағдайлар мен оның салдарын жою жөніндегі іс-шараларды жоспарлауды ғана емес, олардың алдын алуды да көздеу қажет. Сонымен қатар, бұл жоспарлауға тек Төтенше жағдайлар министрлігі мен өзге де мүдделі мемлекеттік органдар ғана емес, сонымен қатар ғылыми қызметкерлер, Қазгидромет қатысуы тиіс»,-  деді гидротехник.

Су тасқыны: Ел тұрғындары зардап шеккендерге гуманитарлық көмек жинауда
01 сәуір 2024
Су тасқыны: Ел тұрғындары зардап шеккендерге гуманитарлық көмек жинауда

Ауа райының күрт жылынуы салдарынан қар жылдам еріп, еліміздің бірқатар өңірін қарғын су басқаны белгілі. Осыған орай Су ресурстары және ирригация министрлігі қауіп-қатерге жедел ден қою үшін үнемі мониторинг жүргізіп жатыр. Қазіргі уақытта су тасқыны орын алған аймақтарда министрліктің 1000-нан астам маманы мен 280-нен астам техникасы жұмылдырған. Су шаруашылығы нысандарында тәулік бойы кезекшілік ұйымдастырылған. Су тасқынына қарсы іс-шараларға арналған қор, оның ішінде құм, қиыршық тас, қапшықтар және басқа да қажетті инертті материалдар дайындалған. Арнайы құрылған жедел штаб та барлық әкімдіктермен тығыз жұмыс істеуде.СуУ тасқыны салдарынан талай ауылдың тұрғындары үй-жайын тастап, қауіпсіз жерге көшуге мәжбүр болды. Оларға киім-кешек пен азық-түлік қажет екендігі сөзсіз. Сондықтан да еліміздің әр жерінде қайырымы жандар, түрі қоғамдық ұйымдар, қайырымдылық қорлары су тасқынынан зардап шеккендерге гуманитарлық көмек жинап жатыр. олардың бірі - Жақсылық жаса» қайырымдылық қоры.

Қорға қайырымдылық жасаумен соңғы 5 жыл бойы айналысып келе жатқан 7 баланың анасы Жанна Ерденова басшылық етеді және жетім балаларға, асыраушысынан айырылған отбасыларға, көп балалы отбасыларға, жалғызілікті аналарға, өмірлік қиын жағдайға тап болған адамдарға көмек береді. Қордың елордада қайырымдылыққа арналған жүктер жинақталатын екі қоймасы бар. Сол жерлерде елорда тұрғындарынан жиналған киім-кешектер мен азық-түліктер жинақталады және мұқтаж жандар оларды тегін алып кетеді.

«Қазіргі уақытта еліміздің түкпін-түкпірінде халық су тасқынан зардап шегіп жатқаны белгілі. Тұрғындардың баспаналары, киім-кешектері су астында қалды. Сондықтан елорда тұрғындарынан гуманитарлық жүк жинауды бастағанымызға үшінші күн болды. Елордалықтар жан-жақтан хабарласып, қоймаларымызға макарон өнімдерін, сұйық май, шай сынды бұзылмайтын азық-түлікпен қатар кішкентай балалардан бастап, үлкен адамдарға арналған киім-кешектер, кір жуатын ұнтақтар, төсек-орындар, көрпе-жастықтар әкеліп жатыр. Жиналған жүкті Қостанай облысының су тасқынынан зардап шеккен Амангелді ауданына жіберіп жатырмыз. Киім-кешек пен азық-түлік жинақталған алғашқы гуманитарлық жүгімізді сенбі күні 5 жүк көлігімен жіберген едік. Кеше тұрғындарға табысталды. Тағы 4 гуманитарлық жүк көлік тиелген тағы 4 көлігіміз жолда», - деді Жанна Ерденова.

Құмар Ақсақалов Арқалыққа келіп, су тасқынына қарсы жұмыстарды бақылады
28 наурыз 2024
Құмар Ақсақалов Арқалыққа келіп, су тасқынына қарсы жұмыстарды бақылады

Қостанай облысының әкімі Құмар Ақсақалов көктемгі су тасқынына байланысты төтенше жағдайлар орын алған облыстың оңтүстік аудандарындағы атқарылып жатқан іс-қимылдардың жай-жапсарымен өзі тікелей келіп танысты.

Облыс әкімі Арқалықтағы сапарында қалаға қарасты Северный кентінің Пролетарская көшесіндегі ағын судың алдын алу жұмыстарын көріп, үйлерін су басқан тұрғындардың да жай-күйлеріне назар аударды.

26 наурыз күні сағат 18.45 -те Северный кенті, Пролетарская көшесі бойында жолдың үстімен өтіп кеткен қар суын тоқтату үшін жолдың жиегіне құм төселіп, су сорғыш мотопомпалар мен жылжымалы станциялар жұмылдырылды.

Жол бойынан арық қазылып, судың бағыты бұрылды.

Бұл іске барлығы 50 адам, 13 техника тартылып, нәтижесінде жолдың үстінен үйлерге қарай құлаған су екпіні тоқтатылды.

Құмар Іргебайұлы Арқалық қаласының әкімдігінде көршілес Амангелді, Жангелдин аудандары әкімдерінің қатысуымен бейнежиын өткізіп, мән-жайды нақтылады.

27 наурызға текті Арқалық қаласы бойынша көктемгі су тасқынына қарсы шаралар жайында қала әкімі Әмірхан Асанов ақпарат берді.

Арқалық қаласына қарасты Екідің, Әбдіғаппар хан ауылдарымен байланыстыратын көтерме жолдың суағар құбырлары еріген қар суын өткізіп үлгере алмағандықтан 25 наурыздан бастап аталған ауылдармен қатынас үзілді. Екідің ауылында 258 тұрғын бар, ауылдағы 49 үйдің 23 -не су кіріп, 10 үй бүлінді. Екі қыстаудың тұрғындары қауіпсіз жерге шығарылды.

Әбідғаппар хан ауылында 276 тұрғын бар, 2 үйдің тұрғындары қауіпсіз жерге шығарылды. Қайыңды ауылдық округінің Қызылжұлдыз ауылының 185 тұрғынын қауіпсіз жерге шығаруға 3 автөкөлік жіберілді. Қайыңды ауылдық округіне қарасты 4 шаруа қожалығы орналасқан қыстауда 14 адам қауіпті жағдайда. Аталған екі ауылда да жүкті әйелдер мен медициналық есепте тұратын науқастарды қауіпсіз жерге шығару, ауыл тұрғындарын азық – түлікпен, дәрі – дәрмекпен қамту шаралары жүргізілді.

Арқалық қалалық әкімдігі жанынан 4 мобильді топ құрылып, 8 мотопомпамен тұрғындардан түскен шағымдар бойынша су сору жұмыстарын жүргізуде. Көмеке Қостанай облысы Төтенше жағдайлар департаменті жасағы 50 адам, 3 техника және 1 тіркемелі мотопомпа, Қарағанды қаласының әскери бөлімшесінен 50 адам 3 техника, Қостанай қалалық Төтенше жағдайлар департаментінен 2 техника мен 5 адам жіберілген.

Облыс әкімі қауіпті жағдайда қалған тұрғындарды жедел түрде қауіпсіз аймаққа шығаруға тапсырма берді. Бұл үшін Қорғаныс министрлігінен 4 тікұшақ жәрдемге келген.

«Адамдар түнге дейін толық құтқарылуы тиіс. Төтенше жағдайдан зардап шеккен бірде бір тұрғын өз мәселесімен жеке қалмауы қажет», – деді облыс әкімі Құмар Ақсақалов.

Сондай-ақ, қала және аудан басшыларына алдағы уақытта көктемгі су тасқынына жіті дайындалуға пәрмен берді.

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.