28-қараша күні «Отандастар қоры» және «Дүниежүзі қазақтарының қауымдастығы» шет елдердегі қазақ диаспорасының тарихи Отанымен мәдени-гуманитарлық және іскерлік ынтымақтастығын одан әрі дамыту үшін жағдай жасау мақсатындағы мемлекеттік тапсырма аясында отандастардың қатысуымен «Отандастар. Болашаққа бағдар» атты Халықаралық дөнгелек үстел өткізеді.

Қордың баспасөз қызметінің хабарлауынша, жиынға ҚР Премьер-Министрінің орынбасары  Б. Сапарбаев мен ҚР ақпарат және қоғамдық даму министрі Д. Абаев қатысады. Ең басысы — халықаралық шараға 20 елдегі қазақ диаспораларынан 150 делегат келеді. «Отандастар Қоры» КЕАҚ Президенті Н. Әбіқаев Қордың іске қосқан және жүзеге асырған жобалары,  олардың нәтижелері, отандастармен жұмыстың 2020 жылға арналған жоспары жайлы сөз сөйлейді. Сонымен қатар, шет елдердегі қазақ қауымдастықтарының жетекшілері де өз ұйымдары жайлы айтады. Шара аясында дүниежүзі қазақтарының қауымдастығы мен Қор өкілдері қызметтерінің негізгі бағыттары, оның ішінде шет елдердегі қандастармен мәдени-гуманитарлық және іскерлік байланысты кеңейту әрі нығайтуды көздеген «Отандастар» қорының негізгі жобаларының бірі «Қазақ үйі» Қазақ мәдени-іскерлік үйінің құрамына кіретін іскерлік үйлері мен мәдени орталықтарының  әлем бойынша желісін құру жоспары талқыланады. Бірлескен жұмыстың нақты ұсыныстары әзірленеді. Қатысушыларға Қазақстанның инвестициялық әлеуеті мен өңірлерде бизнесті дамыту үшін жасалған жағдайлар жайында ақпарат беріледі.  «Атамекен» іскерлік үйінің панельдік сессиясында Іскерлік үйінің мақсаты мен міндеті, отандастарды консультациялық қолдау орталығының жұмысы жайлы айтылады. Шет елдерде өткізілген бизнес форумдар қорытындыланады. Түркия, Швеция, Еуропа елдерінен келген қандас кәсіпкерлер сөз сөйлейді. «ҚазАгро», «Бәйтерек» холдингтері мен «ҚазақИнвест» ҰАҚ өз тараптарынан қандас кәсіпкерлерді қолдау мүмкіндіктерімен бөліседі. Шет елдердегі қазақтілді БАҚ өкілдерінің қатысуымен өтетін панельдік сессияда шет елдердегі қазақтілді БАҚ пен журналистердің өзара ынтымақтастық мәселесі талқыланады. «Абай» мәдени орталығының панельдік сессиясында мәдени орталықтың  мақсаты мен міндеті, шет елдерде қазақ мәдениеті мен өнерін дамыту, білім беру жобаларын іске асыру, елімізде туристік кластерді дамыту және еліміздің туристік тартымдылығын арттыру, барлық елде қазақ әдебиеті орталығының желісін құру мәселелері талқыланады. «Отандастар» Қорының жобасы – «Әлемдегі танымал қазақтар туралы» кітабы мен «Мұзбалақ» анимациалық фильмі таныстырылады. «Жас Қазақ» жастар клубының панельдік сессиясында шет елдердегі қазақ жастарын тарихи Отанын айналасына шоғырландыру және оларға жан-жақты қолдау көрсету,  диаспоралық және жастар саясаты саласындағы өзара әрекеттестік және серіктестік аясын кеңейту, жас белсенділерді таныстыру, достығын нығайту,  олардың бойында тарихи Отанына деген патриоттық сезімдерін қалыптастыру, Қазақстан Республикасының барлық жастар ұйымдарының іс-шараларына диаспора өкілдерін қатыстыру, өзара біріккен жұмыс жоспарын құрып, бірлесе жұмыс істеу мәселесі талқыланады. «Қазақ елі» жастар клубы жұмысының жоспары бекітіледі. 

«Атамекен» ҰКП және «Отандастар Қоры» коммерциялық емес акционерлік қоғамы арасында өзара түсіністік және ынтымақтастық туралы Меморандумға қол қою рәсімі өтті.

Қордың баспасөз қызметінің хабаралуынша, келісімге «Отандастар» қорының президенті Нұртай Әбіқаев пен палатаның Басқарма Төрағасы Абылай Мырзахметов қол қойды.

Атап өтейік, «Отандастар» қоры - шет елдерде тұратын этникалық қазақтар мен отандастарды қолдау жұмысы бойынша мемлекеттік органдар және үкіметтік емес ұйымдармен нақты бағыттарды айқындап, серіктестік танытып қызмет етіп келе жатқан ұйым.

Меморандум «Атамекен» ҰКП мен Қордың көптеген бағытта тығыз байланыста жұмыс атқаруы үшін құқықтық негіз бекітті. Мәселен, құрылымында call-орталық пен өңірлік қоғамдық қабылдауы бар ұйымның отандастарды ақпараттық қолдау орталығына «Атамекенде» жинақталған кәсіпкерлік туралы білім банкін пайдалану, бизнесті құру және дамыту, палата жүзеге асыратын бағдарламалар бойынша оқу, инвесторлар мен стартаптарды іздеу мүмкіндігі туды.

Сонымен қатар ынтымақтастық аясында «Менің Атамекенім» және бизнес саласындағы шетелдік қазақтардың ұйымдарын әлем бойынша бір желіге біріктіретін «Атамекен» Іскерлік үйі» жобасын іске асыру мәселелері де қамтылды. Этникалық қазақтардың тарихи отанына жаппай көшуін ынталандыруды қарастыратын «Темір қазық» бағдарламасына дербес басымдық берілді.

«Отандастар» қоры мен «Атамекен» ҰКП бірлескен жұмысының алдағы бағыттары «ОТАНДАСТАР. БОЛАШАҚҚА БАҒДАР» халықаралық дөңгелек үстел аясында өтетін «Атамекен» Іскерлік үйінің» панельдік сессиясында кезінде нақтыланады.  Аталған шара биыл 28 қарашада Нұр-Сұлтан қаласында өтеді, жиынға 20 елдегі қазақ диаспорасынан 150 делегат қатысады.

«Отандастар» қоры мен Дүниежүзі қазақтарының қауымдастығы ағарту көкжиегін кеңейтуде. Атап айтқана, Ресей Федерациясы Астрахань облысына қарасты екі ауданда қазақ тілін оқытатын кабинеттер ашты.

«Отандастар» қоры баспасөз қызметінің хабарлауынша, «Никита Ысқақов атындағы Семибугорен орта мектебі» муниципалды қазыналық жалпы білім беру мекемесі қазақ тіліне арнап жеке кабинет бөлді. Ол кабинетте қазақтың ұлттық мәдениеті, өнері, әдебиеті, тұрмыстық бұйымдарымен танысуға болады. Қор өкілі Сәби Түйтебеков аталған кабинетке Қазақстаннан арнайы әкелінген сыйлық-Қастерлі қалам кітабын сыйлады. Кабинет Отандастар Қорынан телевизор, бейнекамера, ноутбуктар тәрізді құнды сыйлықтар жеткізілгеннен кейін ашылады. Мектеп директоры Римма Ибрагимова Қазақстаннан арнайы келген қонақты ыстық ықыласпен қарсы алып, қандастарға қамқорлығы үшін Қор мен Дүниежүзі қазақтарының қауымдастығына алғыс айтты.

Екінші кабинет Володар ауданы Калинин ауылында ашылады. Академик Ережеп Мәмбетқазиев атындағы Калинин орта мектебінің директоры Арман Нұрлиевтың айтуынша, қазақ тілі кабинеті Қор сыйлаған ең заманауи жабдықтармен жабдықталады.

Ресми дерек бойынша, Астрахань облысында өмір сүретін 160 мың этникалық қазақтың басым бөлігі ауылдық жерлерде тұрады. Мәселен, Калинин ауылы тұрғындарының 99,9 пайызы қазақ. Олар ұлттық салт-дәстүрді сақтау үшін барлық мүмкіндікті пайдалануда. Қордың аталған ауыл мектебінде қазақ тілі кабинетін ашуы шет елдегі қандастарымызды тарихи Отанымен бұрынғыдан да жақындастыратынына сенім мол.