Л.Н.Гумилев атындағы Еуразия ұлттық университетінің ректоры Ерлан Сыдықовтың бұйрығымен Нұржан Қуантайұлы журналистика және әлеуметтік ғылымдар факультетінің деканы қызметіне тағайындалды. Тәжірибелі маман 22 жылдан бері БАҚ саласында еңбек етіп келеді. Бұл туралы Ulys EҰУ сілтеме жасап хабарлайды.
Нұржан Қуантайұлы 1993 жылы КазҰУ-ды үздiк дипломмен бiтiріп, еңбек жолын Қазақ радиосында аға редактор, шолушы болып бастады. ЕҰУ журналистика және әлеуметтік ғылымдар факультетінің деканы қызметіне тағайындалғанға дейін Әл-Фараби атындағы Қазақ ұлттық университетiнiң журналистика факультетiнде аға оқытушы, доцент болып дәріс бере жүріп, республикалық «Жас алаш» газетiнiң шолушысы, «Ақ жол - Қазақстан» газетiнің әдебиет бөлімінің меңгерушісі, «Айқын» газетiнiң саяси шолушысы болып қызмет етті. Кейін ҚазҰУ-дың журналистика факультеті мен Шығыс Қазақстан облыстық әкімдігіне қарасты «Шығыс ақпарат» медиа-холдингін басқарды.
Нұржан Қуантайұлы 2000 жылы «Жүсiпбек Аймауытовтың көсемсөз мұрасы және Алаш Орда баспасөзі» атты кандидаттық диссертация қорғады.
Филология ғылымдарының кандидаты көптеген ғылыми және ғылыми-көпшілік еңбектердің, сондай-ақ Web of Science және Scopus деректер қорындағы мақалалардың авторы.
Прозашы, ақын, Мемлекеттiк «Дарын» сыйлығының лауреаты, Қазақстан Жастар одағы сыйлығының лауреаты, Қазақстан Журналистер одағының Смағұл Садуақасов атындағы сыйлығының иегері.
«Қараөзек» атты романның, бірнеше әңгімелердің, үш жыр жинағының авторы.
«Адырна», «Күмбiр», «Қараөзек», «Алаш Орда баспасөзi және Жүсiпбек Аймауытұлы», «Қолшатыр» атты кiтаптары жарық көрген.
Факультетке арнайы барып, жаңа деканды ұжымға таныстырған ЕҰУ ректоры Ерлан Сыдықов осы қызметте 14 жыл қызмет еткен журналистика және әлеуметтік ғылымдар факультетінің экс-деканы Қайрат Саққа көп жылғы еңбегі үшін алғыс айтып, алдағы жұмысына табыс тіледі. Қ.Сақ Алғыс хатпен марапатталды.
