ҰҚК бұрынғы басшысы Кәрім Мәсімовтің орынбасары болған Дәулет Ерғожинге тағы екі бап бойынша айып тағылды, деп хабарлайды Ulys ҰҚК баспасөз қызметіне сілтеме жасап.
Комитеттің хабарлауынша, Ерғожинге қатысты тергеу жұмыстары әлі жүргізіліп жатыр.
Қазіргі уақытта оған ҚР ҚК-ның 218-бабы, 3-бөлігі, 3-тармағы, яғни «Қылмыстық жолмен алынған ақшаны және өзге де мүлікті заңдастыру (жылыстату)» және ҚР ҚК-нің 366-бабының 4.4-бөлігі – «Аса ірі мөлшерде пара алу» бойынша қүдік келтіріледі.
ОКҚ өткен баспасөз мәслихатында Сыбайлас жемқорлыққа қарсы іс-қимыл агентігінің ресми өкілі Данияр Бигайдаров «Каспий» футбол клубында жасалған жемқорлық жайлы айтты, деп хабарлайды Azattyq Rýhy.
«Маңғыстау облысы бойынша Сыбайлас жемқорлыққа қарсы қызмет «Каспий» футбол клубы» ШЖҚ МКК бұрынғы директоры мен деструктивті діни орта өкілдеріне қатысты сотқа дейінгі тергеу жүргізуде. Олар зорлық-зомбылық қолдана отырып, аса ірі мөлшерде ақша бопсалады деген күдікке ілініп отыр», - деді Бигайдаров.
Оның айтуынша, Маңғыстау облысы прокуратурасының үйлестіруімен үш күдікті ҚПК-нің 128-бабы негізінде ұсталып, уақытша ұстау изоляторына қамалды.
«Қазіргі уақытта бұрынғы директордың оқу-жаттығу жиындарын ұйымдастыру үшін футбол клубына бөлінген бюджет қаражатын жымқыру фактісіне қатысты ма, жоқ па тексеріп жатырмыз. Тергеу жалғасып жатыр», - деді ресми өкіл.
Көктемгі су тасқынынан зардап шеккендерге көмек ретінде жиналған қайырымдылық ақшаны ұрлады деген күдікпен қамауға алынған Перизат Қайрат бренд сөмкелер мен зергерлік бұйымдарға құмар болған. Қаржы мониторингі агенттігі таратқан ақпарат бойынша, Перизат Қайраттың бір сөмкесінің өзі 25 млн теңге тұрады, деп хабарлайды Ulys.
Қайырымдылық қорының басшысы су тасқынынан зардап шеккендерге және Палестина халқына гуманитарлық көмек көрсету мақсатында жиналған 1,7 млрд теңгені жымқырды деген күдікке ілінген.
Бүгін Қаржы мониторингі агенттігі Перизат Қайраттан тәркіленген мүліктерді көрсетті.
«Перизат Қайраттың тұрғылықты жерін тінту барысында қайырымдылыққа жиналған қаражатқа сатып алынған қымбат техника, Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada және тағы басқа танымал әлемдік брендтердің киім, аяқ киім, зергерлік бұйымдары, сөмкелері тәркіленді», - делінген хабарламада.
Күдіктіден тәркіленген қымбат зергерлік бұйымдардың жалпы құны 70 млн теңгеден асады. Мәселен, Graff брендінің сырға-алқалары 10 млн теңгеден басталса, Rolex сағатын 7 млн теңгеге сатып алған. Ал Bulgari сағаты 6 млн 750 мың теңге тұрады екен.
Бұдан бөлек, Перизат Қайраттың бренд сөмкелерге деген махаббаты да ерекше болған сыңайлы. Құқық қорғау органдары күдіктінің үйінен жалпы құны 110 млн теңгеден асатын ондаған сөмке тапқан.
Бренд сөмкелердің ең арзаны 1 млн теңге тұрса, ең қымбаты да 25 млн 600 теңге болып шықты. 2 млн, 4 млн, 14 млн теңгеге сатып алған сөмкелері де бар.
ҚМА Перизат Қайраттың жиырма шақты бренд сөмкесінің суреті мен бағаларын жариялады. Перизат Қайрат барлық сөмкесіне P.K деп аты-жөнінің бас әріптерін жаздырған.
«ҚазАвтоЖол» компаниясының бұрынғы төрағасы бюджет қаражатын жымқырғаны үшін 8 жылға сотталды, деп хабарлайды Ulys Бас көлік прокуратурасына сілтеме жасап.
«ҚазАвтоЖол» ҰК» АҚ-ның бұрынғы төрағасы мен бас мердігерге қатысты «Жақсы-Есіл-Бузулук» автожолын күрделі жөндеуге, соның ішінде Есіл өзені арқылы өтетін көпірді салуға бөлінген 200 млн теңге көлемінде мемлекет қаражатын жымқырған.
«Келісімшарттың бұзушылықтармен жасалғандығы және берілген аванстың ысырап етілгендігі дәлелденді. Жоба бойынша жұмыс басталмаған. Сотталғандар 8 жылға бас бостандығынан айырылды. Сонымен қатар, сот мемлекетке келтірілген залалды өндіріп алды. Сот үкімі заңды күшіне енген жоқ», - делінген Бас көлік прокуратурасы хабарламасында.
