15 күнге қамалған әнші Қайрат Нұртас (Айдарбеков — ред.) апелляциялық шағым түсірді. Алайда сот апелляциялық шағымды қанағаттандырмады.
Бүгін Астана қалалық сотында Қайрат Айдарбековке қатысты әкімшілік құқық бұзушылық туралы іс апелляциялық тәртіппен қаралды.
Бірінші сатыдағы сот Қайрат Айдарбековтың (Нұртас-ред) ұшақ ішінде жанжалдасу кезінде азамат Асылбек Бекқайыровқа қол жұмсап, оның денсаулығына жеңіл зиян келтіріп, төбелес кезінде балағат сөздер айтқанын анықтады.
«Құқық бұзушының адвокаты қаулымен келіспей, 434-баптың 2-бөлігі бойынша шағымданып, құрамның болмауына байланысты соттан іс жүргізуді тоқтатуды сұрады. Қаулының күшін жою үшін негіз анықталмағандықтан апелляцияның 2024 жылғы 9 шілдедегі қаулысымен бірінші сатыдағы соттың сот актісі өзгеріссіз қалдырылды. Қаулы заңды күшіне енді», — деп хабарлады ҚР Жоғарғы сотының баспасөз қызметі.
Еске сала кетсек, Алматы-Астана» бағытындағы әуе рейсінде ұсақ бұзақылық және денсаулыққа қасақана жеңіл зиян келтіру фактісі бойынша іс қозғалған еді.
