«Жер үйден өрт шықты. Апатқа ескірген газ баллоны себеп болған». «Шағын асханада газ баллоны жарылып, адамдар зардап шекті». Кейінгі жылдары жаңалықтар легінен осыған ұқсас мәліметтерді жиі оқитын болдық.
Төтенше жағдайлар министрлігі осы проблеманы түп-тамырымен жою үшін қолданыста жүрген газ баллондарын түгенде шыққан көрінеді. Осылайша халықтың қолында 348 мың баллонның газ сақтауға жарамайтыны анықталып отыр.
Ең сорақысы, халық бұл баллондарды бұрынғыдай арнайы қызметтің көмегімен емес, жанармай стансаларына барып, толтырып жүр. Министр Шыңғыс Әрінов проблеманың осы жағына көбірек алаңдайтынын айтады.
«Қазір халық газ баллондарды жанармай стансаларында толтырады. Ол заңға қайшы. Ал, ол баллондардың басым бөлігі қолдануға жарамсыз. Біздің есебіміз бойынша 348 мың газ баллонын ауыстыру керек», - деді министр.
Мәселеге тіпті Үкімет араласып отыр. Премьер-министр Олжас Бектенов Үкімет отырыстарының бірінде 50 жыл бойы үздіксіз қолданылып келе жатқан газ баллондары бар екенін айтты. Қазір Өнеркәсіп және құрылыс министрлігі осы баллондарды жаңасымен ауыстыратын кәсіпорын іздеп жатыр.
Аталған министрлік газ баллондарын жаңасымен алмастыру халықтың қалтасына салмақ салмау керек деген ұстанымда отыр. Ол үшін «Жасыл даму» қорының 12 млрд теңгесін бірнеше кәсіпорынға бөліп беріп, мемлекеттік тапсырыс арқылы жаңа баллондар өндіру ұсынылып жүр. Мысалы, «Kazinjenering» компаниясы бір баллонды 34-38 мың теңгеден жасап шыға алатынын айтқан. Өндіріс қуаты осымен қарайлас тағы бір кәсіпорын табылса, 350 мың баллонды 5 жылда жаңартып шығуға болатын көрінеді.
