Қазақстан Ауғанстандағы жағдайға байланысты мәлімдеме жасады, деп хабарлайды Ulys ҚР СІМ сілтеме жасап.

«Қазақстан Ауғанстандағы жағдайдың даму барысын мұқият қадағалап отыр. Аталған елдің тарихында тағы бір шешуші сәт келе жатыр. Көпжылдық жанжалды ауған халқы өзі шешуі керек.

Қазақстан барлық тараптарды ішкі тұрақтандырудың басты алғышарты ретінде биліктің бейбіт транзитін қамтамасыз етуге шақырады. Біз БҰҰ Қауіпсіздік Кеңесінің инклюзивті және өкілдік үкімет құру, ұлттық азшылықтар мен әйелдердің құқықтарын құрметтеу, басқа мемлекеттерге қауіп төндіретін топтардың болуына жол бермеу, халықаралық құқықты сақтау туралы мәлімдемесін қолдаймыз. Осы ережелерді орындау Ауғанстанның жаңа билігімен диалогты бастау үшін қажетті шарт болуы тиіс», - делінген мәліметте.

67 ел мен Еуропалық Одақ Талибан Ауғанстанды басып алғаннан кейін бірлескен мәлімдеме жасады. Олар Ауғанстаннан кеткісі келетіндерге барлық жолды ашық қалдыруға шақырды және ауған халқына көмектесуге дайын екендіктерін білдірді. Бұл туралы Өзбекстанның мемлекеттік ақпарат агенттігі хабарлады.

Мәлімдемеге қол қойған тараптардың қатарында Еуропалық Одақтың сыртқы істер және қауіпсіздік саясаты жөніндегі жоғары өкілі, АҚШ, Ұлыбритания, Канада, Германия, Австралия, Польша, Украина, Оңтүстік Корея, Африка және Латын Америкасы бар. Алайда Ресей бұл елдердің қатарында жоқ.

«Ауғанстаннан кеткісі келетін ауғандар мен шетелдіктерге мынаған рұқсат беру керек: жолдар, әуежайлар мен шекаралар ашық қалуы және бейбітшілік сақталуы керек. Ауған халқы қауіпсіз және абыройлы өмір сүруге лайық. Біз оларға көмектесуге дайынбыз », - делінген АҚШ Мемлекеттік департаментінің сайтында жарияланған хабарламада.

Мәлімдеме авторлары Ауғанстанда қауіпсіздікті қамтамасыз ету үшін жұмыс жасап жатқанын атап өтті. Олар «барлық тараптарды Ауғанстаннан кеткісі келетіндерді құрметтеуге және олардың қауіпсіз және тәртіппен шығуын қамтамасыз етуге» шақырды.

Еске салсақ, Ауғанстанда билік талибтердің қолына өтті. Президент Ашраф Ғани қантөгіс болдырмау үшін елден кетуге шешім қабылдады.