Қазақстан Республикасы Ақпарат және қоғамдық даму министрі Дәурен Абаевтың бұйрығымен белгілі журналист Ержанар Әшейхан «Қазақстан» РТРК» АҚ Басқарма Төрайымының орынбасары-Қоғам Басқармасының мүшесі лауазымына сайланды.

Ержанар Әшейхан бұған дейін «Қазақстан» РТРК» аймақтық хабар таратуды дамыту департаментінің директоры болып қызмет атқарып келген болатын.                                                                                                                                                            Ол еңбек жолын 2003 жылы «Эра» телекомпаниясы» ЖШС-да репортер қызметінен бастаған.

2006 жылдан бері «Қазақстан» РТРК» АҚ жұмыс істеп келеді.   

2012 - 2015 жылдар аралығында «Қазақстан» Корпорациясының Алматы қаласындағы филиалында бағдарламалар өндірісі жөніндегі шығармашылық бірлестіктің шеф-редакторы, атқарушы продюсері қызметтерін атқарды.

2017 жылдың қарашасынан аймақтық хабар таратуды дамыту департаментінің директоры қызметінде жұмыс істеді. BBC қоры жариялаған "Орталық Азиядағы ана мен бала өлімі" тақырыбындағы телебайқаудың, 2014 жылы Әзірбайжан астанасы Баку қаласында өткен "ТЭФИ-Достастық" халықаралық байқауының лауреаты. Өнертану магистрі. Қазақ телевизиясының 60 жылдығына арналған "Елдидар" кітабының соавторы.

Білім саласындағы білікті менеджерлердің бірі, «Болашақ» бағдарламасының түлегі, PhD докторы Ақерке Абылайхан Өскемен қаласының білім бөлімінің басшысы болып тағайындалды. Ресми ақпаратқа сүйенсек, жаңа басшыны ұжымына және білім беру ұйымдарының директорларына қала әкімі Жақсылық Омар таныстырған.

Ақерке Абылайхан Шығыс Қазақстан облысының тумасы. 1997 жылы «Биология және химия пәндерінің мұғалімі» мамандығы бойынша Ш.Құдайбергенов атындағы «Семей» мемлекеттік университетін тәмәмдаған. 2002-2005 жылдары «Болашақ» халықаралық стипендиясының докторантура бағдарламасы бойынша Германияның Хемниц техникалық университетінде оқыған. Философия ғылымдарының докторы, PhD-ғылымдарының кандидаты (Ph.D.) және жаратылыстану ғылымдары бойынша PhD-докторы (неміс жүйесінде).

Еңбек жолын Семей мемлекеттік университетінде интерн-педагог ретінде бастаған. Содан кейін Әл-Фараби атындағы ҚазҰУ-да, Хемниц техникалық университетінде (Германия) ғылыми қызметкер болып жұмыс істеді.

2006 жылдан бастап 12 жыл бойы ҚР білім және ғылым министрлігінде кафедра меңгерушісі, білім және ғылым министрлігінің даму стратегиясы департаментінің халықаралық бағдарламаларын іске асыру бөлімінің басшысы, ақпараттық технологиялар департаменті директорының орынбасары және халықаралық ынтымақтастық департаменті директорының орынбасары қызметтерін, сонымен қатар, «Нұр Отан» партиясы саяси басқару академиясы директорының орынбасары лауазымдарын атқарған. Соңғы жұмыс орны — Шымкент қаласының білім басқармасының (2018-2019) басшысы.

Ақерке Абылайхан білім және ғылым министрлігінің құрмет грамотасымен және белгісімен, «Қазақстан Республикасының білім беру ісінің құрметті қызметкері», Ауғанстанның жоғары білім министрлігінің Құрмет грамоталарымен, ТМД-ның білім беру жобалары жөніндегі атқарушы комитетінің, ШЫҰ-ның медалімен марапатталған. Осы жылдар аралығында ЮНЕСКО және ИСЕСКО істері жөніндегі ҚР Ұлттық комиссиясының материалдық емес мәдени мұраны қорғау жөніндегі ұлттық комитетінің мүшесі, ТМД-ның білім беру жобалары бойынша сараптамалық тобының төрағасы, ҚР СІМ-нің ресми дамыту жөніндегі жұмыс тобының мүшесі болды. 2018 жылы — БҰҰ-ның әйелдер ісі жөніндегі ғылыми кеңесшісі.

Қазақ тілімен қатар орыс, ағылшын және неміс тілдерін еркін меңгерген.

Танымал журналист, сыйлы ұстаз  Мейрамхан Жәпек бүдан былай Мәдениет және спорт министрлігінің "Интернет жобалары және SMM қызметi" бөлімін басқарады.

Мейрамхан Сағынқызы интернет тілін алғаш меңгеріп, көптеген сайттардың дүниеге келіп, дамуында өзіндік қолтаңбасы бар белгілі маман. Ұзақ жылдар бойы ұстаздықтың сыртында қазақ ақпарат нарығын сапалы ақпаратпен толықтыру жолында ерен еңбек етіп келеді.  Мейрамхан Жәпек  1972 жылы Жамбыл облысы, Қордай ауданы Қарасу аулында дүниеге келген. Әл Фараби атындағы ҚазҰУ-дың журналистика факультетін журналистика мамандығы бойынша бітірген. Аталған оқу орнының магистратурасын да тәмамдаған. Біраз жыл  Е.А. Бөкетов атындағы ҚарМУ-да ұстаздық етіп, бірталай шәкіртті журналистикаға баулыды. Кейін астанаға қоныс аударып  «Қазақстан» РТРКның Интернет жобалар бөлімінің басшысы болды. Оған дейін  2001-2007 жылдар аралығында шыққан www.arka.medialaw.kz сайтының авторы әрі бас редакторы болғанын да айта кету керек. 2004 жылы AWARD-2004 Ұлттық Интернет сыйлығын иеленді. Қазақстан Журналистер Одағының мүшесі.