Валюта бағамы
  • USD -

    519.3
  • EUR -

    588
  • RUB -

    6.23
АНКАРАДА АЛҒЫС АЙТУ КҮНІ АТАЛЫП ӨТТІ
01 наурыз 2019
АНКАРАДА АЛҒЫС АЙТУ КҮНІ АТАЛЫП ӨТТІ

Түркияның астанасында Қазақстан Республикасының Түркиядағы Елшілігі Алғыс айту күнін атап өтті. Елші Абзал Сапарбекұлы басына қиын-қыстау күн туғанда қазақ бауырластарына құшағын ашқан түрік үкіметі мен халқына Қазақ елі атынан алғыс білдірді. Шара аясында Елшіліктің қолдауымен қоғам қайраткері, белгілі публицист марқұм Сағат Әшімбаевтың «Әдеби сын мақалалар» атты еңбегі мен танымал жазушы Шәрбану Бейсенованың «Бір махаббат баяны», «Сүзгенің соңғы күндері» «Бозоқ аруы» атты түрік тіліне аударылған туындыларының тұсаукесері болды. Бұл туралы аталған елшіліктің фейсбук парақшасында https://www.facebook.com/kzembassy жазды.

 

Шараға Қазақстанның Түркиядағы Елшісі Абзал Сапарбекұлы, Түркия Республикасы Президентінің Бас кеңесшісі Ялчын Топчу, Түріксой халықаралық ұйымының Бас хатшысы Дүйсен Қайсейінов, Еуразия жазушылар одағының төрағасы Якуп Өмероғлу, Түркияның мемлекеттік және қоғам қайртакерлері, БАҚ өкілдері, Түркияда білім алып жатқан қазақ жастары, қазақ диаспорасы өкілдері және түрік оқырман қауымы қатысты.

Алғыс айту күнінің Қазақстан қоғамындағы маңыздылығы туралы сөз қозғаған  Елші Абзал Сапарбекұлы  Президент Н. Назарбаевтың «Біздің ұстанымымыз – татулық пен тыныштық, ұранымыз – береке мен бірлік» деген сөздерін келтірді. Бүгін сол бейбіт өмір мен ынтымақ үшін, қастерлі Тәуелсіздігіміз үшін бір-бірімізге алғыс айтатынымызға ерекше тоқталды. Сондай-ақ ол басына қиын-қыстау күн туғанда қазақ бауырларына құшағын ашқан түрік үкіметі мен халқына да Қазақ елі атынан алғыс білдірді. Елші Алғыс айту күні мақсатының өскелең ұрпақтың бойына достық, төзімділік және патриотизм құндылықтарын сіңіру екендігін айтты.

Сондай-ақ, А. Сапарбекұлы 1999 жылғы 1 наурызда «Нұр Отан» партиясының құрылғанын еске сала отырып, екі күн бұрын 20 жылдық мерейтойға орай өткен партия съезінде Қазақстан Президентінің халықтың ертең емес, бүгін бақытты болуын қалайтынын, осы тұрғыда әлеуметтік дамуға бағытталған жүйелі шараларды ұсынғанын жеткізді. Бұның сыртында  Н. Назарбаевтың өткен жылы жарияланған «Ұлы даланың жеті қыры» атты бағдарламалық мақаласының қазақ халқының рухани жандануы ғана емес, жалпы түркі әлемінің бірлігі үшін маңызды қадам екендігін айтты. Сөзінің соңында А. Сапарбекұлы әйгілі әдебиет сыншысы С. Әшімбаев пен оның жары Ш. Бейсенованың түрікшеге аударылған кітаптарына қысқаша шолу жасап өтті.

Өз кезегінде, Түркия Республикасы Президентінің Бас кеңесшісі Я. Топчу ата-бабаларының месхетиялық түріктер екенін айтып, түріктер және басқа халықтар атынан қиын-қыстау кезеңде пана болып, барымен бөліскен қазақ халқына, соның ішінде Президент Н. Назарбаевтың ата-анасына үлкен алғысын білдірді. Н. Назарбаев пен Р. Т. Ердоғанды Түркі әлемінің, жалпы Еуразиялық кеңістіктің екі алыбы деп ерекше атап өткен Я. Топчу екі елдің қарым-қатынастарының одан әрі дами беретініне сенімді екендігін мәлімдеді.

Ялчын Топчуға Қазақстан мен Түркияның достық қарым-қатынастарының дамуына қосқан үлесі үшін Қазақстан Республикасы Тәуелсіздігінің 25 жылдығы құрметіне арналған мерекелік медаль табысталып, іс-шара кітап тұсаукесерімен жалғасты.

Тұсаукесерде сөз алған Еуразия жазушылары одағының төрағасы Я. Өмероғлу Алғыс айту күні сияқты маңызды мерекелердің іргелі, ұлы мемлекеттер жасайтын шара екенін мәлімдеді. Ол, сондай-ақ, түрлі себептермен қазақ елінде қоныс тепкен халықтардың тарихи отандарының 1 наурыз сайын Қазақстанға делегациялар жіберіп, алғыс айту шараларына қатысуын ұйымдастыруды ұсынды.

Я. Өмероғлу «Сүзгенің соңғы күндері» повесі әйел қаһармандығын суреттейтін шығарма деп баға берді. Ол Сүзге ханшайымның Сібірдің соңғы ханы Көшімнің жары болғанын айтып, жалпы, повесті қазақтардың татар және башқұрт сияқты солтүстік түркі халықтарына қашан да қолдау көрсеткенін меңзейтін маңызды шығарма деп есептейді. Я. Өмероғлу «Бозоқ аруы» повесінің түркі әйелдерінің батырлығы мен қайсарлығын дөп сипаттауымен оқырманның есінде қалатынын айтты.

Кітаптардың авторы Ш. Бейсенова шығармаларында өмірдің қиындықтарынан, тіпті өлімнен де тайынбайтын батыл және қаһарман әйелдерді сомдайтынын жеткізді. Тарихтағы Сүйімбике, Сүзге, Бозоқ аруы сияқты тұлғалар мен Сібірге айдалған М. Қаратаевтың артынан еріп, тіреу болған жары Мархума сияқты әйелдердің ішкі жан дүниесін бейнелеуге тырысқанын айтты.

Автордың артынан сөз алған аудармашы Ж. Кынажы жиналған қауымды шығармалардың сюжетімен таныстырып, «Бозоқ аруы» повесін Президент Н. Назарбаевтың барлық түркі халықтарына ортақ тұлғаларды насихаттау бойынша ұсынысының орындалуы деп бағалады. Сөзінің соңында Ж. Кынажы Елшіліктің бұған дейін де көптеген казақ авторлары кітаптарының түрікше жарық көруіне қолдау көрсеткенін еске салып, Елші А. Сапарбекұлы жүргізіп отырған мәдени дипломатияны жоғары бағалады.

«Балдырған» журналының бас редакторы Д. Мағлұмов, өз кезегінде, Қазақстан тәуелсіздік алғалы бері көптеген қазақ авторлары кітаптарының Түркияда жарық көргенін атап өтіп, жиналған қауымды С. Әшімбаевтың өмірбаянымен қысқаша таныстырды.

Жиын Ш. Бейсенованың түрік оқырмандары үшін кітаптарына қолтаңба беруімен, сондай-ақ, қазақ халық және эстрада әндері шырқалған мерекелік концерт және ресми қабылдаумен жалғасты.

 

 

RELATED NEWS
Түркияда тағы мемлекеттік төңкеріс болуы мүмкін екені айтылуда
15 мамыр 2024
Түркияда тағы мемлекеттік төңкеріс болуы мүмкін екені айтылуда

Түркияда мемлекеттік төңкеріс болуы мүмкін. Осыған байланысты ел президенті Режеп Тайып Ердоған Түркияның барлау және Әділет министрлігінің басшыларымен шұғыл отырыс өткізді, деп хабарлайды Ulys түркиялық басылымдарға сілтеме жасап.

Түрік ұлтшылдарының жетекшісі Девлет Бахчели2016 жылдың шілдесінде елді дүрліктірген мемлекеттік төңкеріс қайталануы мүмкін екенін ескертті.

Бір күн бұрын Анкара Бас прокуратурасы "Айхан Бора Каплан" қылмыстық ұйымына қатысы бар деген күдікпен  үш полицейге қатысты тергеу бастады. Олардың үйлерінде тінту жүргізілді.

Türkiye газеті өз кезегінде "Айхан Бора Каплан" ұйымымен байланыста болды деп айыпталған Анкара қауіпсіздік басқармасында бірқатар полиция қызметкерлерінің жұмыстан шығарылуына байланысты Түркияда үлкен қарсылық көрсетілгенін жазады. Олардың үйлерінде цифрлық материалдарды алу мақсатында тінту жүргізілді.

"Президент Ердоған Әділет министрі Йылмаз Тунджмен және Ұлттық барлау ұйымының басшысы Ибрагим Калынмен Бахчелидің мәлімдемесінен кейін Мемлекет басшысының резиденциясында шұғыл түнгі отырыс өткізді", — деп жазады Türkiye.

Ердоған ел Парламентінде сөз сөйлейді деп күтілуде.

АҚШ Түркияға қарсы заң қабылдамақ
10 наурыз 2025
АҚШ Түркияға қарсы заң қабылдамақ

АҚШ-тың Өкілдер палатасы Түркияның демократиялық статусын қайта қарауға және оны Еуропаның емес, Таяу Шығыстың елі деп тануға бағытталған арнайы заң жобасын қарауға алды. Бұл туралы Fox News хабарлады.

Заң Түркияны Еуропа мен Еуразия істері жөніндегі бюросының құзырынан алып тастап, оны Таяу Шығыс істері жөніндегі бюроға ауыстыруды қарастырады.

Fox News хабарлауынша, мұндағы мақсат "АҚШ-тың жауы саналатын елдермен байланыс жасайтын Түркияны тосқауылдап ұстауға талаптану". Вашингтон Анкараны "АҚШ пен НАТО одақтастарынан алыстап бара жатқан мемлекет" деп есептейді.

"Бұл Үкімет ХАМАС содырларын жасырып отыр. Экономикалық одақтастық арқылы Путиннің әскери машинасына қолдау көрсетеді. Сонымен бірге, Батыс одақтасынан артықшылық талап етуін жалғастыра отырып, НАТО-ның бірлігіне кедергі келтіреді. Америкалық дипломатия көзбояушылық жасауын доғарып, Түркияны бұрынғыдай Еуропаның бір бөлігі деп санауын қоюы керек", – деді жобаны Конгресс қарауына енгізген топты басқаратын конгрессмен Брэд Шнайдер.

Бұл ұстанымға Түркия Үкіметі наразылығын білдірді және түріктің сыртқы саясаты мен еуропалық бағдарын Конгресс мүшелерінің дұрыс түсінбей отырғанына нұсқады.

Айта кетсек, Түркия – НАТО-ның АҚШ-тан кейінгі ең қуатты мүшесі. 

Түркияда теракт болып, 5 адам көз жұмды
24 қазан 2024
Түркияда теракт болып, 5 адам көз жұмды

Кеше кешкісін Түркия Анкарадағы TUSAŞ аэроғарыш компаниясы штаб-пәтерінің маңында қатты жарылыс болған. Бұл туралы Анадолы агенттігі хабарлады. 

Түркия ІІМ жарылыстан қаза тапқандар мен жараланғандар барын айтады. Ал ел билігі оқиғаны "теракт" деп атады. 

Түркияның ішкі істер министрі Али Йерликая хабарлауынша,  теракт салдарынан 5 адам қаза тауып, тағы 22 адам жарақат алғаны айтылған.

Шабуылды жасаған екі лаңкес өлтірілді. Лаңкестердің бірі әйел.

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.