پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا كۇن تارتىبىنەن تىس سالىق رەفورماسى ماسەلەسى قارالدى. مەملەكەت باسشىسى وتاندىق بيزنەس وكىلدەرىمەن كەزدەسۋدە سالىق رەفورماسىن كاسىپكەرلەرمەن، دەپۋتاتتارمەن جانە ساراپشىلارمەن بىرگە تالقىلاۋدى تاپسىردى.
ۇكىمەت وتىرىسىندا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين اتقارىلىپ جاتقان جۇمىستار تۋرالى بايانداما جاسادى.
ونىڭ ايتۋىنشا، اكىمشىلەندىرۋدى جەڭىلدەتۋ ءۇشىن ناقتى مولشەرلەمە قۇرىلىمى (16%، 10%، 0% جانە بوساتۋ) ەنگىزىلەدى. ققس مولشەرلەمەسىن 16%-عا دەيىن ارتتىرۋ ۇسىنىلىپ وتىر، بۇل بيۋدجەتتىڭ مۇناي كىرىستەرىنە تاۋەلدىلىگىن ازايتىپ، قوسىمشا قاراجاتتى باسىم جوبالارعا باعىتتاۋعا مۇمكىندىك بەرەدى. اۋىل شارۋاشىلىعى تاۋارىن وندىرۋشىلەر ءۇشىن ققس تولەۋدەن بوساتۋ ەنگىزىلەدى، بۇل ولاردىڭ باسەكەگە قابىلەتتىلىگىن ارتتىرادى. دەنساۋلىق ساقتاۋ سالاسىنا دا 10% تومەندەتىلگەن مولشەرلەمە ۇسىنىلىپ وتىر، ءبىراق ونى باسقا سالالارعا دا كەڭەيتۋ مۇمكىندىگى تالقىلانۋدا.
سونىمەن قاتار ققس بويىنشا ەسەپكە قويۋ شەگى 80 ملن تەڭگەدەن 15 ملن تەڭگەگە دەيىن تومەندەتىلەدى، بۇل بيزنەستى جاساندى بولشەكتەنۋىمەن كۇرەسۋگە جانە بارلىق كومپانياعا تەڭ جاعداي جاساۋعا مۇمكىندىك بەرەدى. بولشەك سالىق رەجيمى قايتا قارالۋدا، جۇمىسشىلار سانى بويىنشا شەكتەۋلەر الىنىپ تاستالادى، ال ىسكە اسىرۋ B2C سەگمەنتىمەن شەكتەلەدى. سالىق تۇسىمدەرىنىڭ كۇتىلەتىن ءوسۋ كولەمى – جىل سايىن 4-5 ترلن تەڭگە. بۇل ۇلتتىق قورعا تاۋەلدىلىكتى جانە مەملەكەتتىك قارىزدى ازايتۋعا، ينفراقۇرىلىم مەن ونەركاسىپكە قاراجات بولۋگە كومەكتەسەدى. ىقتيمال ينفلياسيالىق اسەر قىسقامەرزىمدى بولادى جانە 2،5–3% دەڭگەيىندە باعالانادى.
ۇسىنىلعان تاسىلدەر «اتامەكەن» ۇلتتىق كاسىپكەرلەر پالاتاسى جانە بيزنەس-قوعامداستىق وكىلدەرىمەن كەزدەسۋدە تالقىلاندى.
«جالپى ۇسىنىستاردى قولدايمىز. وسى اپتادا وڭىرلەرگە بارىپ، حالىقتىڭ بارلىق ساناتىمەن ەگجەي-تەگجەيلى تالقىلاۋ جۇرگىزۋ كەرەك. مەن دە استاناداعى جانە وڭىرلەردەگى بيزنەس وكىلدەرىمەن تالقىلاۋلار وتكىزەمىن. وسى جۇمىستاردىڭ ناتيجەسى بويىنشا 20 اقپانعا دەيىن سالىق كودەكسىنىڭ جوباسى مەن ىلەسپە زاڭ جوباسىنا تۇزەتۋلەردى ماجىلىسكە ەنگىزۋ كەرەك. ءارى قاراي ماجىلىستە تالقىلاۋدى جالعاستىرامىز»، — دەپ اتاپ ءوتتى پرەمەر-مينيستر.
