ەلوردادا «تۇرىك فيلمدەرى اپتاسى» بەلگىلى رەجيسسەر وسمان سىناۆتىڭ ايگىلى جازۋشى مۇستافا كۋتلۋنىڭ «ۇزىن حيكايا» رومانىنا نەگىزدەلگەن «ۇزىن حيكايا» فيلمىمەن باستالدى.
فءيلمنىڭ باستى ءرولىن قازاقستاندىقتاردىڭ دا سۇيىكتى اكتەرىنە اينالعان كەنان يميرزالىوگلۋ سومدايدى. قىسقاشا مازمۇنى: بالا كەزىندە جەتىم قالعان بولگارلىق ءاليدى اتاسى سۇلەيمەن تۇركياعا الىپ كەلگەن. ءالي سۇيىكتىسى مۋنيرامەن، قىزدىڭ اتا-اناسىنىڭ قارسىلىعىنا قاراماستان ۇيلەنەدى. ءالي قىزدى الىپ قاشادى جانە ولاردىڭ ءومىرى تەمىرجول ۆوكزالدارىنىڭ ستانسيالارىنىڭ اراسىندا ۇنەمى كوشۋمەن وتەدى. الايدا، مۋنيرا ەكىنشى بالاسىن بوسانار كەزدە كوپ قان كەتىپ، دۇنيە سالادى. ال ءالي قارشاداي ۇلى — مۇستافانى ەرتىپ ءومىردىڭ كوپ تەپەرىشىن كورەدى. ادام تاعدىرى شىنايى سۋرەتتەلگەن كينونى كورىپ وتىرعان كورەرمەندەر كەيدە كوز جاسىنا ەرىك بەرسە، وقيعا جەلىسىنە بايلانىستى كەيدە ەزۋ تارتتى.
يۋنۋس ەمرە اتىنداعى تۇرىك مادەنيەت ورتالىعى تۇركيا رەسپۋبليكاسى مادەنيەت جانە تۋريزم مينيسترلىگى كينەماتوگرافيا باسقارماسىنىڭ قولداۋىمەن ءوتىپ جاتقان ەلورداداعى تۇرىك فيلمدەرى اپتاسى 25-قاراشاعا دەيىن جالعاسادى.
اتالعان شارانىڭ ماقساتى تۇرىك ەلىنىڭ ۇزدىك كينو تۋىندىلارىن باۋىرلاس ەلدىڭ كورەرمەنىنە ۇسىنا وتىرىپ، ەكى ەل اراسىنداعى مادەني بايلانىستىڭ دامۋىنا ۇلەس قوسۋ بولىپ تابىلادى. ەكى باۋىرلاس ەلدى ءبىر –بىرىنە جالعاپ وتىرعان كوپىر ىسپەتتەس تۇرىك كينو ونىمدەرى قازىرگى كۇنى الەمدە وتە تانىمال. قازاق كورەرمەندەرى تۇرىك سەريالدارى مەن كينوفيلمدەرىنە ۇلكەن ىقىلاس تانىتۋدا. شارا اياسىندا كورەرمەن تاريحي، رومانتيكالىق جانە شىتىرمان دراما تولى كارتينالاردى تاماشالاي الادى.
تۇرىك فيلمدەرى اپتاسى اياسىندا ەلوردالىقتاردىڭ نازارىنا سەگىز تۇرىك كينوتۋىندىسى ۇسىنىلادى. ولاردىڭ اراسىندا «ۇزىن حيكايا»، «كوبەلەكتىڭ ءتۇسى»، «ۇمىتسام سىبىرلا»، «ەرتۇعىرىل 1890»، «باستىق ءىستىڭ ءساتتى اياقتالعانىن قالايدى»، «سيقىرشى»، «قىشقىل المالار»، «قىزىل ورامالدى شىنارىم» سياقتى فيلمدەر بار.
سەناريستى چاگان ىرماك بولىپ تابىلاتىن «ۇمىتسام سىبىرلا» ءفيلمى -كورەرمەننىڭ كوزايىمىنا اينالعان تۋىندى. مەدكوللەدجدى ءبىتىرىپ، اۋدان ورتالىعىنداعى دارىگەرلىك پۋنكتتە مەدبيكە بولىپ جۇمىسقا جاڭا كىرگەن حانيفە مەن ءسىڭلىسى حاتيجە شاعىن عانا اۋدان ورتالىعىندا تۇرادى. حانيفە – وتە ۇيالشاق، تۇيىق قىز، ال حاتيجە بولسا ەركە، ءوز ەركىمەن وسكەن. حانيفە ءادەبيەتكە اۋەس، ال حاتيدجە بولسا ءان سالۋعا قۇشتار. ءبىر كۇن جاڭا تاعايىندالعان اكىمنىڭ ۇلى تارىك اۋدان ورتالىعىنا كەلەدى. سول كۇننەن باستاپ اپالى-سىڭلىلەردىڭ ءومىرى تۇبەگەيلى وزگەرەدى...
باستى رولدە تانىمال تۇرىك اكتەر كىۆانچ تاتلىتۋگ وينايتىن «كوبەلەكتىڭ ءتۇسى» ءفيلمى 1940 جىلداردا ءومىر سۇرگەن ەكى اقىننىڭ ءومىرىن باياندايدى. كينو ءرۇشتۇ ونۋر مەن مۋزاففەر تاييپ ۋسلۋ اتتى ەكى جاس اقىننىڭ ءومىرى مەن زونگۋلداكتىق شاحتەرلاردىڭ ءومىرىن سۋرەتتەۋمەن باستالادى.
اتى اڭىزعا اينالعان اتىف يىلمازدىڭ تۋىندىسى بولىپ تابىلاتىن «قىزىل ورامالدى شىنارىم» ءفيلمىنىڭ باستى ءرولىن قازاقستاندىق كورەرمەننىڭ سۇيىكتى اكتريساسى تۇركان شوراي سومداعان. كينوتۋىندى شىڭعىس ايتماتوۆتىڭ «قىزىل ورامالدى شىنارىم» شىعارماسىنىڭ جەلىسى بويىنشا تۇسىرىلگەن.
جاپونيا مەن تۇركيا بىرلەسە تۇسىرگەن «ەرتۇعىرىل 1890» ءفيلمىنىڭ رەجيسسەرءى -ميتسۋتوشي تاناكا، سسەناريءستى -ەريكو كوماتسۋ. 1890 جىلى وسمانلى مەملەكەتىنىڭ كەمەسى «ەرتۇعىرىل» جاپون تەڭىزىندە اپاتقا ۇشىرايدى. جاپوندىقتار كومەككە كەلىپ، ەكيپاج بەن كەمەنى قۇتقارۋعا تىرىسادى. ال 100 جىلدان كەيىن 1985 جىلى تۇرىكتەر تەگەراننان شۇعىل تۇردە ەۆاكۋاسيالانۋى قاجەت جاپونيانىڭ 215 ازاماتىن قۇتقارادى.
«باستىق ءىستىڭ ءساتتى اياقتالعانىن قالايدى» اتتى كينوتۋىندىنىڭ وقيعاسى كاپپادوكيادا وتەدى. باستىعى يسفەنديار سيناندى كومەديا ءفيلمنىڭ حيكاياسىن جازۋ ءۇشىن كاپپادوكياعا جىبەرەدى. حيكايانىڭ جالعىز عانا شارتى بار: «باستىق ءىستىڭ ءساتتى اياقتالعانىن قالايدى». الايدا يسفەنديار سونشاما كۇتكەن ءىس «ءساتتى اياقتالا» قويادى ما، بىرگە كورەمىز.
«سيقىرشى» ءفيلمىن تانىمال تۇرىك رەجيسسەر جانە اكتەر جەم يىلماز تۇسىرگەن. سيقىر الەمىنە ەرەكشە قىزىعۋشىلىق تانىتاتىن يسكەندەردى دوسى مارادونادان باسقا ەشكىم مويىنداي قويمايدى. اسىرەسە وفيسەر اكەسى ونىڭ سيقىرشىلىققا دەگەن اۋەسقويلىعىنا قارسى. ءبىراق وقيعا جەلىسى اكەسى مەن بالاسىنىڭ بىرگە گاسترولگە شىعۋىنا بايلانىستى وزگەرۋى مۇمكىن...
«قىشقىل المالار» ءفيلمىنىڭ سەنارييىن يىلماز ەردوگان جازعان. مىنەزى وتە قاتال اكىم ازيز وزايدىڭ ەكى ەرەكشەلىگى بار، ءبىرى ادەمى باقشاسى، سونداي –اق بويجەتكەن ادەمى ءۇش قىزى. قىزدارى ەلدەن وقشاۋ، بولەك وسكەن. وقيعا 1970 جىلدارى حاككاريدە وتەدى. باستى رولدەردى قازاق كورەرمەن جاقىننان تانيتىن فاراح زەينەپ ابدۋللاح، شۇكران وۆالى، سونگۇل ودەن وينايدى. اكە ءرولىن يىلماز ەردوگان سومداعان.
قازىرگى كۇنى مادەنيەت پەن ونەر ورداسىنا اينالىپ ۇلگىرگەن نۇر –سۇلتان قالاسى تۇرعىندارى مەن قوناقتارى، تۇرىك فيلمدەرى اپتاسىندا يۋنۋس ەمرە تۇرىك مادەنيەت ورتالىعى تاراپىنان كورسەتىلەتىن فيلمدەردىڭ بارلىعىن اقىسىز تاماشالاي الادى. شارا 18-25 قاراشا ارالىعىندا «كەرۋەن» وسو، كينوپارك 7 IMAX Keruen كينوتەاترىندا وتەدى. كورسەتىلىم ۋاقىتى ساعات 19.00.
