مەملەكەت باسشىسى نيدەرلاند كورولدىگىنىڭ پرەمەر-مينيسترى مارك ريۋتتەمەن كەزدەستى، دەپ حابارلايدى اقوردا.
اقوردادا پرەزيدەنت قاسىم-جومارت توقايەۆ پەن استاناعا جۇمىس ساپارىمەن كەلگەن نيدەرلاند پرەمەر-مينيسترى مارك ريۋتتە كەزدەسۋ وتكىزدى.
اڭگىمەلەسۋ بارىسىندا ساياسي، ەكونوميكالىق جانە مادەني-گۋمانيتارلىق سالالارداعى ىقپالداستىقتى كەڭەيتۋ پەرسپەكتيۆالارى قاراستىرىلدى.
– وزىڭىزبەن 2015 جىلى كەزدەسكەن ەدىك. سول جۇزدەسۋدى ەرەكشە ىقىلاسپەن ەسكە الامىن. ءسىزدىڭ ءوزارا ءتيىمدى ىنتىماقتاستىعىمىزدى دامىتۋعا قوسقان ۇلەسىڭىزدى جوعارى باعالايمىز. ءسىز باسقا ارىپتەستەرىڭىزگە قاراعاندا پرەمەر-مينيستر لاۋازىمىن ۇزاق ۋاقىت اتقارىپ كەلەسىز جانە حالىقارالىق دەڭگەيدەگى تاجىريبەڭىز وراسان زور. سونداي-اق ەكىجاقتى ىنتىماقتاستىقتىڭ قارقىندى دامىپ كەلە جاتقانىن اتاپ وتكىم كەلەدى. نيدەرلاند – قازاقستان ەكونوميكاسىنىڭ ەڭ ءىرى ينۆەستورى. ەلىمىزگە قۇيىلعان تىكەلەي ينۆەستيسيا 120 ميلليارد دوللاردان استى. ەلدەرىمىز بىرلەسكەن اۋقىمدى جوبالاردى جۇزەگە اسىرىپ جاتىر، – دەدى مەملەكەت باسشىسى.
قاسىم-جومارت توقايەۆ نيدەرلاند پرەمەر-مينيسترىنىڭ ەلىمىزگە ساپارى استانا مەن امستەردام اراسىنداعى ساۋدا-ەكونوميكالىق قارىم-قاتىناستى دامىتۋعا تىڭ سەرپىن بەرەتىنىن اتاپ ءوتتى.
ءوز كەزەگىندە مارك ريۋتتە ەكىجاقتى سەرىكتەستىك دەڭگەيىن جوعارى باعالادى. سونداي-اق ول قازاقستان مەن نيدەرلاندتىڭ ىقپالداستىعىن ودان ءارى جانداندىرۋ قاجەت ەكەنىن ايتتى.
– مەن استانادا العاش رەت 2010 جىلى بولدىم. بۇل مەنىڭ جاڭا پرەمەر-مينيستر رەتىندە ەۋروپا وداعىنان تىسقارى جەرگە جاساعان العاشقى ساپارىم ەدى. سودان كەيىن 2015 جىلى ساپارمەن كەلدىم. سول كەزدە جۇرگىزگەن كەلىسسوزدەرىمىز ءالى ەسىمدە. ەكىجاقتى بايلانىستارىمىزدىڭ قارقىندى دامىپ كەلە جاتقانى مەنى ءارقاشان تاڭعالدىرادى. قازاقستاننىڭ وڭىرلىك جانە حالىقارالىق كۇن تارتىبىندەگى تەڭگەرىمدى ۇستانىمىنا ايرىقشا قۇرمەتپەن قارايمىن. سونىمەن قاتار ەلىڭىزدى جاڭا دەڭگەيگە كوتەرۋ ءۇشىن اتقارىپ جاتقان ءىسىڭىزدى جوعارى باعالايمىن. ءبىز اۋىل شارۋاشىلىعى، جاسىل ەنەرگەتيكا جانە سۋ رەسۋرستارىن باسقارۋ سالالارىنداعى يدەيالار مەن ازىرلەمەلەرىمىزدى بولىسۋگە دايىنبىز، – دەدى نيدەرلاند ۇكىمەتىنىڭ باسشىسى.
كەلىسسوز بارىسىندا ساۋدا-ەكونوميكالىق، ەنەرگەتيكالىق جانە ينۆەستيسيالىق ىنتىماقتاستىقتى، سونداي-اق كولىك، يننوۆاسيا، اتوم ەنەرگەتيكاسى، اۋىل شارۋاشىلىعى، دەنساۋلىق ساقتاۋ، كليمات، سۋ رەسۋرستارىن باسقارۋ سالالارىنداعى بايلانىستاردى نىعايتۋ جولدارى ەگجەي-تەگجەيلى تالقىلاندى.
بۇدان بولەك، تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى. سونداي-اق ەۋروپا وداعىمەن ىقپالداستىق اياسىنداعى ديالوگتى جالعاستىرۋ ماڭىزدى ەكەنىنە نازار اۋدارىلدى.