كوپقاباتتى ۇيلەردەگى ورتتەر، ليفتتەردەن شىققان اقاۋدىڭ قايعىلى سالدارى، تۇتاس ءبىر تۇرعىن ۇيلەردىڭ سالىنىپ بىتپەي جاتىپ قيراپ قالۋى، قولدانىسقا بەرىلگەن ۇيلەردىڭ قابىرعاسىنان سەتىنەپ سوگىلۋى. كەيىنگى كەزدە قۇرىلىس سالاسىندا وسىنداي كەمشىلىكتەر كوبەيىپ كەتتى. ارينە، مۇنىڭ ءبارى ەڭ اۋەلى قۇرىلىس كومپانيالارى مەن سولاردىڭ جۇمىسىن قاداعالاۋشى ورگانداردىڭ سالعىرتتىعىنان بولاتىنى تۇسىنىكتى. ءبىراق كەيدە قاۋىپسىزدىككە جاۋاپتى قىزمەتتەردىڭ قولىن زاڭنىڭ تومپاق نورمالارى بايلايتىن ساتتەرى بولادى.

توتەنشە جاعدايلار مينيسترلىگىندەگى 2016 جىلى بيىك عيماراتتاردى قولدانىسقا بەرۋ وكىلەتىن ۆەدومستۆودان الىپ قويۋ شاراسىن وسىنداي تومپاق نورمانىڭ ءبىرى دەپ ەسەپتەيدى.  ۆەدومستۆو باسشىسى شىڭعىس ءارىنوۆ مينيسترلىككە وسى وكىلەتتى قايتارۋعا كۇش سالىپ ءجۇر.

«كوپ قاباتتى ۇيلەر مەن حالىق كوپ شوعىرلاناتىن نىسانداردى قولدانىسقا قابىلداۋ وكىلەتتىكتەرىن مينيسترلىككە بەرۋ ماسەلەسىن شەشىپ جاتىرمىز. ءقازىر ماجىلىستە زاڭ جوباسى قارالىپ جاتىر. جىل اياعىنا دەيىن ءبىز ۇسىنعان تۇزەتۋ بەكىتىلەدى دەپ ۇمىتتەنىپ وتىرمىز»، - دەيدى ول.

مينيستر ايتىپ وتىرعان وكىلەتتى زاڭ تجم-نەن 2016 جىلى «الىپ قويعانىن» جوعارىدا ايتتىق. ال 2011 جىلعا دەيىن تۇرعىن ءۇي قۇرىلىسىنىڭ جوبالارى دا وسى مينيسترلىكتىڭ ماقۇلداۋىنسىز قابىلدانبايتىن.

مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆقا قورعانىس ۆەدومستۆوسىنىڭ بىلتىر اتقارعان قىزمەتى تۋرالى ەسەپ بەرىلدى.

مەملەكەت باسشىسىنا ارميانىڭ جاۋىنگەرلىك دايىندىعىنىڭ جاي-كۇيى مەن اسكەرلەردى دايارلاۋدىڭ جاڭا تاسىلدەرى جونىندە باياندالدى.

رۋسلان جاقسىلىقوۆ مەملەكەتتىك قورعانىس تاپسىرىسىن ورىنداۋ، الەۋمەتتىك جانە يدەولوگيالىق جۇمىستاردى جۇرگىزۋ، سونداي-اق اسكەري ينفراقۇرىلىمدى دامىتۋ بارىسى جايىندا ايتتى.

كەزدەسۋ سوڭىندا جوعارعى باس قولباسشى قاسىم-جومارت توقايەۆ مينيسترگە ارميانىڭ جاۋىنگەرلىك الەۋەتىن كوتەرۋگە، باسقارۋ ۇدەرىستەرىن ودان ءارى سيفرلاندىرۋعا، ارنايى وپەراسيالار كۇشتەرىن دامىتۋعا، الەۋمەتتىك-يدەولوگيالىق جۇمىستاردى كۇشەيتۋگە قاتىستى ناقتى تاپسىرمالار بەردى.

قورعانىس مينيسترلىگىنە قاراستى اياگوز گارنيزونىندا وفيسەر كوز جۇمعان. گارنيزوننىڭ باسپا ءسوز قىزمەتى اسكەري قىزمەتكەر ءوز ۇيىندە سۋيسيد جاسادى دەدى. بۇل وقيعاعا قورعانىس مينيسترلىگى تۇسىنىكتەمە بەردى، دەپ حابارلايدى Ulsy.

قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باستىعى، ادىلەت پولكوۆنيگى تىلەۋحان باسحوجايەۆ ايتۋىنشا، مارقۇم اياگوز گارنيزونىنا ەكى جىلعا شاقىرىلعان. 

«وفيسەر دالالىق جۇمىسپەن بايلانىستى ەمەس قارجىلىق قىزمەتتە لاۋازىم اتقارعان. قونىس اۋدارۋىنا بايلانىستى بارلىق وتەماقىنى، اقشانى الدى. كەشە سوڭعى رەت اكەسىمەن سويلەسكەن، اسكەري قىزمەتكە ەشقانداي شاعىم تۇسىرمەگەن. مۇمكىن، اياگوز گارنيزونىنا كوشۋىنە، ياعني ورىن اۋىستىرۋىنا بايلانىستى پسيحولوگيالىق اسەر بولعان شىعار. ءقازىر ەندى ءبىز بولجام جاساماي-اق قويايىق. تەرگەۋشى ارىپتەستەرىمىز ءمان-جايدى انىقتايدى.  ءبىز ونىڭ اتا-اناسىنا، وتباسىنا كوڭىل ايتامىز. بۇل دۇرىس ەمەس. ءبىز شەتتە قالمايمىز، بارلىق قاجەتتى تەرگەۋ امالدارى جۇرەدى»، - دەدى باسحوجايەۆ ورتالىق كوممۋنيكاسيالار قىزمەتىندە وتكەن بريفينگتە.

وفيسەردىڭ ءولىمى بويىنشا قىلمىستىق كودەكستىڭ «ءوزىن-وزى ولتىرۋگە دەيىن جەتكىزۋ» بابىمەن قىلمىستىق ءىس قوزعالعان.