«تازا قازاقستان» رەسپۋبليكالىق ەكولوگيالىق اكسياسى جەتىسۋ وبلىسىندا بەلسەندى تۇردە ۇيىمداستىرىلىپ، تۇرعىندار تاراپىنان زور قولداۋعا يە بولدى. بۇگىنگى كۇننىڭ وزىندە جالپىۇلتتىق تازالىق شاراسىنا وبلىس بويىنشا 160 مىڭنان ادام اتسالىستى، دەپ حابارلايدى Ulys.
11 شىلدە كۇنى جەتىسۋ وبلىسى جاستارىنىڭ ۇيىمداستىرۋىمەن «تازا قازاقستان» رەسپۋبليكالىق ەكولوگيالىق اكسياسى جانە «يگى ىستەر» مارافونى اياسىندا «جيناquest» اتتى ەكولوگيالىق كۆەست وتكىزىلۋدە. شاراعا بەلسەندى جاستار، ەكوۆولونتەرلەر، قالا تۇرعىندارى مەن قوناقتارى – جالپى 100 ادام قاتىستى. جاڭاشىل فورماتتاعى شارانىڭ ماقساتى – جاستار مەن جاسوسپىرىمدەرگە قورشاعان ورتانىڭ، تابيعاتتىڭ تازالىعى قانشالىقتى ماڭىزدى ەكەنىن كورسەتە وتىرىپ، ءوز ۇلەستەرىن قوسۋعا ىقپالداسۋ. ەكو-كۆەست شاراسىنا 16-35 جاس ارالىعىنداعى ءوڭىر جاستارى مەن ەكو-بەلسەندىلەردەن قۇرالعان كوماندالار قاتىستى. 5 لوكاسيا بويىنشا وتەتىن ويىن تالدىقورعان قالاسىنىڭ اۋماعىن قوقىستان تازالاۋمەن قاتار، شاپشاڭدىق پەن ۇتقىرلىققا تاربيەلەيدى. قاتىسۋشى كوماندالار بەلگىلەنگەن ورىندى تازالاپ، ەڭ كوپ قوقىس شىعارۋدان باسەكەگە ءتۇسىپ، سونىمەن قاتار ويىن بارىسىندا تانىمدىق سۇراقتارعا جاۋاپ بەرىپ ءتۇرلى كەدەرگىلەردەن وتەدى. ۆيكتورينالىق سۇراقتار جەتىسۋ ءوڭىرىنىڭ تاريحى، تابيعي ماڭىزدى ورىندارى مەن كيەلى جەرلەرى تۋرالى قويىلدى.
«جەتىسۋ جاستارى» كمم ديرەكتورى، وبلىستىق ءماسليحات دەپۋتاتى ەركەبۇلان اقبولاتوۆ: «تازالىق شارالارىن ۇيرەنشىكتى سەنبىلىك سياقتى ەمەس، جاڭا فورماتتا وتكىزۋ جاستاردىڭ قىزىعۋشىلىعىن ارتتىرىپ، ولاردى تابيعاتتى قورعاۋعا جۇمىلا كىرىسۋگە ۇندەيتىنى انىق. وسى ارقىلى جاڭا بۋىن وكىدەرى اراسىندا ەكولوگيالىق مادەنيەتتى قالىپتاستىرا الاتىنىمىزعا سەنىمدىمىن»، - دەپ پىكىرىن ءبىلدىردى.
سونىمەن قاتار كوكسۋ اۋدانىندا دا «تازا اۋلا» جانە «تازا كوشە» بايقاۋلارىنىڭ قورىتىندى كۇنى وتكىزىلۋدە. رەسپۋبليكالىق اكسيا اياسىندا جاريالانعان بايقاۋ اتالمىش اۋداننىڭ بارلىق 10 اۋىلدىق وكرۋگىندە ۇيىمداستىرىلعان بولاتىن. ەندىگى كەزەكتە اۋقىمدى اۋداندىق سەنبىلىك ۇيىمداستىرىلىپ، سوڭىندا ەڭ تازا كوشەلەر مەن تازا اۋلالار انىقتالدى. ەڭ تازا اۋلالارعا ارنايى تاقتايشالار ءىلىنىپ، اۋلا تۇرعىندارى باعالى سىيلىقتارمەن ماراپاتتالدى.
كوكسۋ اۋداندىق ارداگەرلەر كەڭەسىنىڭ ءتوراعاسى سايلاۋباي ءبازىلوۆ: «ەل دەڭگەيىندە وتكىزىلىپ جاتقان اۋقىمدى تازالىق اكسياسى – اسا ماڭىزدى ناۋقان. جاستار عانا ەمەس، اعا بۋىن – ارداگەرلەردىڭ، ورتا بۋىن – ەل اعالارىنىڭ، جاس ۇرپاقتىڭ يىق تىرەسۋىمەن بىرگە اتقارىلىپ جاتقان تازالىق شارالارى تۋعان ەلگە دەگەن شىنايى سۇيىسپەنشىلىكتىڭ دالەلى ىسپەتتەس. كوكتەمنەن بەرى جۇمىلىپ جۇمىس ىستەگەننىڭ ارقاسىندا تۋعان اۋىلىمىز قايتا تۇلەپ، جاڭا كەيىپكە ەندى. بار يگىلىكتىڭ باستاۋى – تازالىقتا. وسىنى ءار قازاقستاندىق ۇعىنسا دەيمىن»، - دەيدى.
«تازا قازاقستان» رەسپۋبليكالىق ەكولوگيالىق اكسياسى باستاۋ العاننان بەرى ءوڭىر سپورتشىلارى ايرىقشا بەلسەندىلىك تانىتۋدا. الەۋمەتتىك جەلىلەر مەن ينتەرنەت-پلاتفورمالاردا سپورتشىلاردىڭ ءوڭىر تۇرعىندارىن تازالىققا ۇندەگەن موتيۆاسيالىق بەينەروليگى كەڭىنەن تارالۋدا.
اقمولدا سايرامكەز، اۋىر اتلەتيكادان الەم چەمپيونى، حالىقارالىق دارەجەدەگى سپورت شەبەرى: «سپورتتا دا، ەل تابيعاتىن ايالاۋدا دا ورتاقتىق بار – ەكەۋىندە دە جاۋاپكەرشىلىك پەن پاتريوتتىق رۋح اسا ماڭىزدى ءرول اتقارادى. ءدال سول سەبەپتى ءبىز «تازا قازاقستان» ەكولوگيالىق اكسياسىنا بىرلەسىپ ۇلەس قوسۋىمىز كەرەك دەپ ەسەپتەيمىن»، - دەيدى وي قوسىپ.
سونىمەن قاتار اعىندى اقسۋ وزەنى مەن تۇمسا تابيعاتقا يە جالاڭاش كولىنىڭ جاعالاۋىندا 100 ادامنىڭ قاتىسۋىمەن تازالىق جۇمىستارى جۇرگىزىلۋدە.
«الاكول ەكوسيستەما» قوعامدىق بىرلەستىگىنىڭ ءتوراعاسى كۇلداريا بەكتەمىسوۆا: «ءار ادام وزىنەن باستاعاندا عانا يگى ءىس ناتيجە بەرمەك. تابيعاتتى ايالاۋ تۇتاس ۇلتتىڭ، ونىڭ ىشىندە وتانىن سۇيگەن ءار ازاماتتىڭ قاسيەتتى بورىشى. تابيعات-انا ءبىزدىڭ وڭىرىمىزگە سونشا اسەمدىكتى دارىتقان. سول مەكەندەردى ايالاپ، كەلەر ۇرپاققا جەتكىزۋ ءۇشىن ءدال وسىنداي اكسيالار بىزگە قاجەت»، - دەگەن پىكىردە.
اتاپ وتسەك، «تازا قازاقستان» اكسياسى اياسىندا جەتىسۋ وبلىسىندا جالپى 1183 تەحنيكا جۇمىلدىرىلىپ، 6337 توننا قوقىس شىعارىلدى، 2226 كم ارىق جەلىسى تازالاندى. سونىمەن قاتار 25 826 م2 اۆتوموبيل جولدارىنا اعىمداعى جوندەۋ جۇمىستارى جۇرگىزىلدى. وبلىس اۋماعىندا اكسيا كەزىندە 29 514 ءتۇپ كوشەت وتىرعىزىلدى.
اتالعان جۇمىستار وبلىستىڭ ءار اۋماعىن قامتىپ، جىل سوڭىنا دەيىن جالعاسىن تاپپاق.
