ۇلتتىق بانكتىڭ مونەتارلىق وپەراسيالار دەپارتامەنتىنىڭ ديرەكتورى نۇرجان تۇرسىنحانوۆ بيىل جىل باسىندا ءبىرىڭعاي جيناقتاۋشى زەينەتاقى قورىنىڭ ينۆەستيسيالىق كىرىسى نەگە تومەندەگەنىن ءتۇسىندىردى، دەپ حابارلايدى Azattyq Rýhy.
ونىڭ ايتۋىنشا، بيىل ءبىرىنشى توقسانىندا زەينەتاقى سالىمشىلارى ءوز شوتتارىندا ينۆەستيسيالىق تابىستىڭ تومەندەگەنىن بايقاعان.
«الايدا بۇل جاعداي ۋاقىتشا سيپاتقا يە، سوندىقتان الاڭداۋعا نەگىز جوق. تومەندەۋ ءۇردىسى زەينەتاقى اكتيۆتەرى قايتا باعالانعاندىقتان بولدى. اتاپ ايتقاندا، تەرىس ينۆەستيسيالىق تابىستىڭ نەگىزگى سەبەپتەرىنىڭ ءبىرى – ينفلياسيا مەن ينفلياسيالىق بولجامداردىڭ ءوسۋى اياسىندا مەملەكەتتىك باعالى قاعازدار كىرىستىلىگىنىڭ ارتۋى. بۇل ءوز كەزەگىندە ولاردىڭ نارىقتاعى قۇنىن تومەندەتتى. سونىمەن قاتار، قارجى مينيسترلىگى تاراپىنان وسى باعالى قاعازدار كوپ ۇسىنىلعاندىقتان، ول دا نارىقتاعى باعاعا اسەر ەتتى»، - دەيدى تۇرسىنحانوۆ ۇلتتىق بانكتە وتكەن بريفينگتە.
ينۆەستيسيالىق تابىسقا اقش دوللارىنا قاتىستى تەڭگە باعامنىڭ قۇبىلمالىعى دا اسەر ەتكەن.
«2025 جىلدىڭ باسىندا دوللار باعامى 525،11 تەڭگە بولسا، ناۋرىزدا 504،44 تەڭگە بولدى. بۇل جەردە ماڭىزدىسى: تەڭگە نىعايعان كەزدە شەتەل ۆاليۋتاسىنداعى اكتيۆتەردىڭ تەڭگەمەن ەسەپتەگەندەگى قۇنى ۋاقىتشا تومەندەيدى. بۇل ەسەپتەۋلەردە تەڭگەمەن كورسەتىلگەن ماندە شىعىن رەتىندە كورىنىس تابادى. جىل باسىنان بەرى تىركەلگەن تەرىس ينۆەستيسيالىق تابىس – ەسەپ تۇرىندەگى عانا مالىمەت، ياعني تۇبەگەيلى شىعىن بولىپ سانالمايدى. بۇل – اكتيۆتەر قۇنىنىڭ ۋاقىتشا قۇبىلۋىنا بايلانىستى قالىپتاسقان كورسەتكىش. قارجى نارىعىنداعى جاعداي تۇراقتالعان سايىن، بۇل اكتيۆتەردىڭ قۇنى قايتا قالپىنا كەلەدى»، - دەيدى دەپارتامەنت ديرەكتورى.
