بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. بۇل تۋرالى Kazinform حابارلادى.
«دەرەكتەرگە جۇگىنسەك، سوڭعى ەكى جارىم جىلدا ەلىمىزدىڭ شامامەن ءاربىر بەسىنشى ادامى ويىن وينايدى ەكەن نەمەسە قۇمار ويىندارىنا قانداي دا ءبىر قاتىسى بار. ال، ونىڭ ىشىندە 400 مىڭداي ادام ويىنعا سالىنىپ، بۋكمەكەرلىك كەڭسەلەر مەن كازينولاردىڭ تۇراقتى كليەنتىنە اينالعان. بۇل دەرت بالالار مەن جاسوسپىرىمدەردى دە شارپىپ وتىر. قۇقىق قورعاۋ ورگاندارىنىڭ مالىمەتىنشە، شامامەن 200 مىڭعا جۋىق كامەلەتتىك جاسقا تولماعان بالا باسقا ادامنىڭ اتىنان بۋكمەكەرلىك كەڭسەلەرگە ءباس تىگىپ، قۇمار ويىندار وينايدى ەكەن. وزگە ادامنىڭ لوگينىمەن بۋكمەكەرلىك كەڭسەلەرگە ءباس تىگۋشى ادامداردىڭ سانى بەلگىسىز. ەكىنشىدەن، وتباسى ينستيتۋتىن السىرەتۋى. ەلىمىزدەگى اجىراسۋلاردىڭ 40 پايىزىنا وسى لۋدومانيا تىكەلەي سەبەپ بولىپ وتىر. تۇرمىستاعى زورلىق-زومبىلىققا باراتىنداردىڭ دەنى – وسى قۇمار ويىنعا شالدىققاندار. بىلتىر الماتى وبلىسىندا جانتۇرشىگەرلىك جاعدايدا ايەلى مەن ەكى بالاسىن اياۋسىز ءولتىرىپ، ءۇيىن ورتەپ جىبەرگەن وقيعا قوعامدى ءدۇر سىلكىندىردى. قىلمىسكەر لۋدومان بولعان، بولماشى اقشاعا ءۇش بىردەي ادامنىڭ ءومىرىن قيدى»، - دەدى ءماجىلىس دەپۋتاتى ەلنۇر بەيسەنبايەۆ.
ونىڭ پايىمىنشا، قۇمار ويىن ءسۋيسيدتىڭ ورشۋىنە اسەر ەتىپ وتىر. ماسەلەن، 2022 جىلى ەلىمىزدە 3 مىڭ 676 ادام وزىنە قول جۇمساپ قايتىس بولسا، ولاردىڭ ءاربىر بەسىنشىسىنىڭ سەبەبى – لۋدومانيا.
«وكىنىشكە قاراي، بۇل دەرت ءقازىر اسكەردە دە كەڭ ەتەك العان. ولاردىڭ كوبى قۇمار ويىننىڭ شىرماۋىنان شىعا الماي جاتقانىن بىلەمىز. بۇدان بولەك، قۇمار ويىن قىلمىسقا دا ىقپال ەتەدى. ەلىمىزدە قىلمىس جاسايتىنداردىڭ 20 پايىزى لۋدوماندار ەكەنى بەلگىلى بولدى. ولار باسكە تىگەتىن اقشا تابۋ ءۇشىن الدىمەن قارىز الادى، سودان سوڭ ۇرلىق، توناۋ سەكىلدى قىلمىستارعا بارادى ەكەن. كولەڭكەلى ەكونوميكاعا دا اسەرى بار. ويىن نارىعى اينالىسىندا ۇلكەن قاراجات اينالىپ جاتىر. ماسەلەن، بىلتىر بۋكمەكەرلىك كەڭسەلەردىڭ جىلدىق اينالىمى بەيرەسمي اقپاراتتار بويىنشا 1 تريلليون تەڭگەگە جەتكەن ەكەن. دەمەك، مۇنىڭ اينالاسىندا مۇددەلى توپتار، لوببيستەر بولاتىنى ءسوزسىز. وسىندا كەلتىرىلگەن مالىمەتتەردەن قازاقستاندا ويىنقۇمارلىق ىندەتتەي ءورشىپ، ەل قاۋىپسىزدىگىنە قاتەر توندىرە باستاعانىن بايقايمىز. بۇگىن قاراستىرعالى وتىرعان زاڭ جوبالارى وسى ماسەلەنى بارىنشا اۋىزدىقتاپ، رەتتەۋگە ارنالعان»، - دەدى دەپۋتات.
بىرىنشىدەن، زاڭ جوباسىندا ماكسيمالدى تۇردە بۋكمەكەرلىك كەڭسەلەر مەن كازينولاردىڭ جارناماسىن شەكتەۋ قاراستىرىلعان. وندا ۇيلەردىڭ قاسبەتتەرىندە، فاسادتارىندا، عيماراتتاردا، قۇرىلىستاردىڭ قورشاۋلارىندا، كولىك قۇرالدارىندا سىرتقى جارناماعا تىيىم سالىنادى.
ينتەرنەت رەسۋرستارىندا، رەسمي سايتتاردا، تەلەارنالار مەن راديودا، مەرزىمدى باسپا باسىلىمدارىندا، كينو بەتتەرىندە، ءموبيلدى وپەراتورلاردىڭ سمس حاتتامالارىنا دا جارناماعا تولىق تىيىم سالىنادى. ەندى بەلگىلى بلوگەرلەر مەن الەۋمەتتىك جەلىدەگى تانىمال تۇلعالارعا مۇنداي ويىن تۇرلەرىن جارنامالاۋعا تىيىم سالىنادى. جارناما تەك سپورتتىق وبەكتىلەر، سپورتتىق باعىتتاعى سايتتار، تەلەارنالار مەن سپورتتىق ءىس-شارالاردا عانا رۇقسات ەتىلەدى.
ەكىنشىدەن، ويىندا ءباس تىگۋ جاسى 21 جاستان 25 جاسقا دەيىن كوتەرىلەدى.
ۇشىنشىدەن، وتەلمەگەن اليمەنتتىك جانە نەسيەلىك قارىزى بار ازاماتتاردىڭ قۇمار ويىنعا ءباس تىگۋ مۇمكىندىگى شەكتەلەدى. ياعني بورىشكەرلەردىڭ ءبىرىڭعاي رەەسترىندە مالىمەتتەرى بار جەكە تۇلعالاردى قۇمار ويىندارعا جانە ءباس تىگۋگە جىبەرۋگە تىيىم سالۋ بەلگىلەنەدى.
«ويناۋ جاسىنا كەلمەگەن ازاماتتاردىڭ قۇمار ويىندارىنا جانە ءباس تىگۋگە قاتىسۋى شەكتەلەدى. ولارعا زاڭسىز ويىن ويناۋعا مۇمكىندىك بەرگەن زاڭدى تۇلعالارعا قوماقتى كولەمدە ايىپپۇل سالىنادى جانە قايتالاناتىن جاعدايدا ليسەنزيالارى توقتايدى. سونىمەن قاتار، زاڭسىز ونلاين كازينو ۇيىمداستىرۋشىلارعا قىلمىستىق كودەكستىڭ 307-بابى بويىنشا جازا قولدانىلادى. اتاپ ايتقاندا، مۇلكi تاركiلەنiپ، 2000 ايلىق ەسەپتiك كورسەتكiشكە دەيiنگi مولشەردە ايىپپۇل سالۋعا نەمەسە سول مولشەردە تۇزەۋ جۇمىستارىنا، 600 ساعاتقا دەيىنگى مەرزىمگە قوعامدىق جۇمىستارعا تارتۋعا، 2 جىلعا دەيiنگi مەرزiمگە باس بوستاندىعىن شەكتەۋگە جازا قاراستىرىلعان. مۇنىمەن قوسا، زاڭسىز لوتوماتيكتەر مۇلدەم جويىلادى. سونداي-اق، بالالار، ءبىلىم بەرۋ، مەديسينالىق، ءدىني ۇيىمدار ورنالاسقان تۇرعىن ۇيلەر مەن عيماراتتاردا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنادى»، - دەدى ەلنۇر بەيسەنبايەۆ.
اتاپ ايتقاندا، شەتەلدىك ويىن بيزنەسىن ۇيىمداستىرۋشىلاردىڭ ءتىزىمى جاسالادى، سونداي-اق بانكتەر مەن تولەم جۇيەلەرىنە ولاردىڭ پايداسىنا قارجىلىق وپەراسيالار جۇرگىزۋگە تىيىم سالۋ ەسكەرىلگەن.
«بۋكمەكەرلىك كەڭسەنىڭ نەمەسە توتاليزاتوردىڭ قىزمەتىن جۇزەگە اسىراتىن ويىن بيزنەسىن ۇيىمداستىرۋشىلاردىڭ ءوز اپپاراتتىق-باعدارلامالىق كەشەندەرىنىڭ مەملەكەتتىك كىرىستەر ورگانىنىڭ اقپاراتتىق جۇيەلەرىمەن ينتەگراسيالانۋىن قامتاماسىز ەتۋ مىندەتى بەلگىلەنەدى. سونداي-اق، ۇلتتىق بانكتىڭ، قارجىلىق مونيتورينگ اگەنتتىگىنىڭ، ادىلەت مينيسترلىگىنىڭ بازالارىن بىرىكتىرۋ ارقىلى ويناۋشىنىڭ تۇلعاسى بەينەمەتريكالىق تۇرعىدان انىقتالادى»، - دەدى دەپۋتات.
