شىعىس قازاقستان وبلىسىنداعى «ەرتىس» شاحتاسىندا اپات بولىپ، 4 ادام قازا تاپتى. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ Ulys حابارلايدى.
«شاحتادان 4 ادامنىڭ ءمايىتى تابىلدى. ولاردىڭ ەكەۋى كاسىپورىننىڭ، ەكەۋى مەردىگەر ۇيىمنىڭ جۇمىسشىلارى بولعان. الدىن الا دەرەك بويىنشا جۇمىسشىلار گازدان ۋلانىپ قالعان»، - دەدى KAZ Minerals كومپانياسىنىڭ باسپا ءسوز قىزمەتى.
ەڭبەك مينيسترلىگىنىڭ مالىمەتىنشە، 4 ادام قازا تاپقان توپتىق جازاتايىم وقيعانى تەكسەرۋ ءۇشىن ارنايى كوميسسيا قۇرىلدى.
«كوميسسيانى شىعىس قازاقستان وبلىسىنىڭ باس مەملەكەتتىك ەڭبەك ينسپەكتورى باتىربەك قيزاتوۆ باسقارادى، ونىڭ قۇرامىنا ق ر تجم ونەركاسىپتىك قاۋىپسىزدىك كوميتەتى مەن ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ اۋماقتىق دەپارتامەنتتەرىنىڭ، جۇمىس بەرۋشىلەر مەن جۇمىسكەرلەردىڭ وكىلدەرى كىردى.
ەڭبەكمينىنىڭ ۇجىمى قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتادى»، - دەلىنگەن مينيسترلىك حابارلاماسىندا.
جازاتايىم وقيعا وسى جىلدىڭ 31 تامىزىندا بولعان. ساعات 16.25-تە شىعىس قازاقستان وبلىسى التاي كەنتىندە، «ۆوستوكسۆەتمەت» ج ش س ەرتىس كەنىشىنىڭ «ەرتىس» شاحتاسىندا اۋىسىم كەزىندە بەلگىسىز زاتپەن ۋلانۋ بەلگىلەرى بار 4 جۇمىسكەردىڭ دەنەسى تابىلدى.
«ۆوستوكسۆەتمەت» ج ش س ەكى قىزمەتكەرى:
- ۇڭعىماشى ا. ب. باقىتوۆ، 1894 ج. ت.؛
- ۇڭعىماشى ا. ب. كەڭەسبايەۆ، 1989 ج. ت.
«شاحتستروي ينجينيرينگ» ج ش س مەردىگەر ۇيىمىنىڭ ەكى قىزمەتكەرى:
- ۇڭعىماشى ا. ت. جايرعازين، 1978 ج. ت.؛
- ۇڭعىماشى ا. ك. قۇسايىنوۆ، 1983 ج. ت.
«ۆوستوكسۆەتمەت» ءجشس-نىڭ تاعى ءبىر جۇمىسكەرى، ۇڭعىماشى ا.ك. قامباروۆ اۋرۋحاناعا جاتقىزىلدى.
كوميسسيا جازاتايىم وقيعانىڭ سەبەپتەرىن انىقتايتىن بولادى.