بەرىلگەن ساداقا بەرەكەتكە سەبەپ بولادى، سونداي-اق كەلەر بالە-جالانىڭ بەتىن قاعادى. مەيىرىمدى بولعان ادام كوپشىلىكتىڭ ماحابباتىنا ءھام دۇنيە، ءھام اقىرەتتتە قۇرمەتكە بولەنەدى. پايعامبارىمىز (س.ا.ۋ.): «ساداقا بەرگەننەن دۇنيە-مۇلكىڭ كەمىمەيدى. اللا ق ۇلىنىڭ ءقادىرىن مەيىرىمدى بولعانى ءۇشىن ارتتىرادى. حاق تاعالا الدىندا كىشىپەيىل بولعان ءبىر ءمۇميننىڭ ءقادىرىن اللا تاعالا، البەتتە، كوتەرەدى»- دەگەن.
ساداقا بەرگەندە جانۇياسى، بالاسى، قىزمەتشىلەرى، جاقىن دوستارى نەمەسە كىم بولسا دا بەرگەنىن بۇلداپ، باسقاعا بيىكتەن قاراماۋ كەرەك. باقارا سۇرەسىنىڭ 264- اياتىندا بۇلداپ، مىندەتسىنىپ جاسالعان، دىنگە قايشى ىسپەن جاسالعان جاقسىلىقتىڭ يەسىنە پايدا بەرمەيتىندىگىن بىلدىرەدى. تاپسىردە: «ەي، مۇميندەر، بەرگەن ساداقالارىڭنىڭ ساۋابىنان مىندەتسىپ، بۇلداپ ماحرۇم قالماڭدار. بۇلاي بەرىلگەن ساداقانىڭ قارىمتاسى بولمايدى. اللاعا جانە اقىرەت كۇنىنە سەنبەي دۇنيەسىن باسقالارعا ماقتانىشپەن، ريامەن شاشقان ادامنىڭ ءىسى دە مۇنافىقتىڭ ساداقاسى سياقتى بوسقا كەتەدى. ءبۇنىڭ ءحالى جالتىر تاستىڭ ۇستىنە تۇسكەن ازعانتاي توپىراقتىڭ قاتتى ەسكەن جاڭبىرلى داۋىلدان ۇشىپ كەتكەنىندەي بولادى. مىنە، بۇنداي ساداقا جالتىر تاستىڭ ۇستىنە سەبىلگەن تۇقىمداي بوسقا كەتەدى. يمانى بولماي، ساداقاسىن ريامەن، بۇلداپ بەرگەندەر جاساعان بۇل امالدارىنان ەشقانداي پايدا كورمەيدى، ساۋابىنان ماحرۇم قالادى. سوندىقتان جاسالاتىن ءبىر جاقسى ءىس، بەرىلەتىن ساداقا شىنايى نيەت جانە دۇرىس يتيقاتپەن بولۋ كەرەك. مىندەتسىنۋدەن، كوڭىلگە كەلەتىن سوزدەن، داندايسىپ تاكاپپارلانۋدان الىس بولۋ كەرەك. اللا ريزالىعى ءۇشىن اركىمگە سىپايى، قاراپايىم بولعان ءبىر مۇسىلمان ۇلكەن قۇرمەتكە يە بولىپ، ەكى دۇنيەدە دە ۇلكەن مارتەبەگە قاۋىشادى. وسىلايشا وسى سىندى كوركەم مىنەزدەرى ارقىلى ءومىرىن ورنەكتەي بەرمەك.
ءۋاليحان ۇستاز، اقسۋ قالاسى