ەلىمىزدە جىل سايىن كوكتەم كەلە سالىسىمەن سۋ تاسقىنىمەن كۇرەس جۇمىستارى باستالادى. سۋ شارۋاشىلىعىنىڭ مامانى، گيدروتەحنيك امانبەك رامازانوۆ مۇندايعا جول بەرمەۋ ءۇشىن ەرتە قام جاساپ، ارنالار مەن قويمالاردىڭ دۇرىس جوندەلۋ جاۋاپكەرشىلىگىن زاڭناما ارقىلى مەنشىك يەسىنە جۇكتەۋ قاجەتتىگىن ايتادى.

«سۋ تاسقىنىنا دايىندىقتى اۋىل شارۋاشىلىعىندا سۋارۋ ماۋسىمى اياقتالعاننان كەيىن بىردەن باستاعان ءجون بولدى»، - دەدى سۋ مامانى.

ونىڭ ايتۋىنشا، بۇرىن ءار وبلىستا سۋ شارۋاشىلىعى باسقارماسى جانە ءىرى شارۋا قوجالىقتارى بولدى. مۇنان بولەك، جىلجىمالى مەحانيكالاندىرىلعان لەكتەر قىزمەت كورسەتتى. ولار كانالداردىڭ ارناسىن تازارتۋ، سۋ تىعىزداعىشتاردى، بوگەتتەردى جوندەۋ جۇمىستارىن كۇزدە، ءتىپتى جازدىڭ سوڭىندا باستاپ كەتەتىن. ءقازىر وسى ءتارتىپتى قولعا الۋ قاجەت.

«اكىمدىكتەر جىلىتۋ ماۋسىمى اياقتالا سالىسىمەن كەلەسى جىلىتۋ ماۋسىمىنا دايىندىقتى بىردەن باستاپ كەتەدى. ياعني، ولار كەلەسى جىلىتۋ ماۋسىمىنا دايىندىقتى كۇزدە ەمەس كوكتەمدە، اعىمداعى جىلدىڭ جىلىتۋ ماۋسىمى اياقتالعاننان كەيىن بىردەن قولعا الادى. ءدال سولاي سۋ تاسقىنىنا دايىندىقتى سۋارۋ ماۋسىمىنان كەيىن بىردەن باستاۋ كەرەك. ارينە، مۇنى ايتۋ وڭاي، ال جاساۋ  وتە قيىن ەكەنى تۇسىنىكتى»، - دەدى امانبەك رامازانوۆ.

وسى ورايدا گيدروتەحنيك مۇنداي جاعدايدا كانالدار مەن گيدروتەحنيكالىق جابدىقتاردى كىم رەتكە كەلتىرۋى تيىستىگىنە توقتالدى.

«مەنىڭشە، مۇنى مەملەكەتتىك نەمەسە جەكە مەنشىكتە بولعانىنا قاراماستان قۇرىلىس نىساندارىنىڭ يەلەرى ىستەۋى كەرەك. بۇل مىندەتتەر زاڭمەن بەلگىلەنۋى ءتيىس. ءقازىر قولدانىستاعى زاڭداردا مۇنداي مىندەتتەر كوزدەلمەگەن، جوق. ال ول جۇمىستاردى ۇيىمداستىرۋ جاۋاپكەرشىلىگى زاڭ جۇزىندە سۋ رەسۋرستار مينيسترلىگى مەن جەرگىلىكتى اتقارۋشى ورگاندارعا جۇكتەلۋى قاجەت. سونىمەن قاتار مۇنداي مىندەتتەردى باسسەيندىك كەڭەستەرگە دە جۇكتەۋگە بولادى. سولاي بولعان جاعدايدا اتالعان كەڭەستەردىڭ ءرولى مەن قۇرامى زاڭمەن كۇشەيتىلۋى كەرەك. وسى شارالار قولعا الىنعان جاعدايدا جۇرتشىلىق شەشىم قابىلداۋعا قاتىسۋعا جانە وسى جۇمىستاردىڭ ورىندالۋىن باقىلاۋعا مۇمكىندىك الادى. بۇل كوپتەگەن دامىعان ەلدەردە بار تاجىريبە»، - دەدى ول.

سۋ مامانى سوڭعى جىلدارى كليمات وزگەرىپ، اۋا تەمپەراتۋراسى جىلىپ كەلە جاتقاندىعىنا نازار اۋدارتىپ، سونىڭ سالدارىنان تۋىندايتىن قيىندىقتارعا قارسى تۇرۋدى ۇيرەنۋ قاجەتتىگىن باسا ايتادى.

«ول ءۇشىن «ازاماتتىق قورعاۋ تۋرالى» زاڭدا قازىرگىدەي توتەنشە جاعدايلار مەن ونىڭ سالدارىن جويۋ جونىندەگى ءىس-شارالاردى جوسپارلاۋدى عانا ەمەس، ولاردىڭ الدىن الۋدى دا كوزدەۋ قاجەت. سونىمەن قاتار، بۇل جوسپارلاۋعا تەك توتەنشە جاعدايلار مينيسترلىگى مەن وزگە دە مۇددەلى مەملەكەتتىك ورگاندار عانا ەمەس، سونىمەن قاتار عىلىمي قىزمەتكەرلەر، قازگيدرومەت قاتىسۋى ءتيىس»،-  دەدى گيدروتەحنيك.

اۋا رايىنىڭ كۇرت جىلىنۋى سالدارىنان قار جىلدام ەرىپ، ەلىمىزدىڭ ءبىرقاتار ءوڭىرىن قارعىن سۋ باسقانى بەلگىلى. وسىعان وراي سۋ رەسۋرستارى جانە يرريگاسيا مينيسترلىگى قاۋىپ-قاتەرگە جەدەل دەن قويۋ ءۇشىن ۇنەمى مونيتورينگ جۇرگىزىپ جاتىر. قازىرگى ۋاقىتتا سۋ تاسقىنى ورىن العان ايماقتاردا مينيسترلىكتىڭ 1000-نان استام مامانى مەن 280-نەن استام تەحنيكاسى جۇمىلدىرعان. سۋ شارۋاشىلىعى نىساندارىندا تاۋلىك بويى كەزەكشىلىك ۇيىمداستىرىلعان. سۋ تاسقىنىنا قارسى ءىس-شارالارعا ارنالعان قور، ونىڭ ىشىندە قۇم، قيىرشىق تاس، قاپشىقتار جانە باسقا دا قاجەتتى ينەرتتى ماتەريالدار دايىندالعان. ارنايى قۇرىلعان جەدەل شتاب تا بارلىق اكىمدىكتەرمەن تىعىز جۇمىس ىستەۋدە.سۋۋ تاسقىنى سالدارىنان تالاي اۋىلدىڭ تۇرعىندارى ءۇي-جايىن تاستاپ، ءقاۋىپسىز جەرگە كوشۋگە ءماجبۇر بولدى. ولارعا كيىم-كەشەك پەن ازىق-تۇلىك قاجەت ەكەندىگى ءسوزسىز. سوندىقتان دا ەلىمىزدىڭ ءار جەرىندە قايىرىمى جاندار، ءتۇرى قوعامدىق ۇيىمدار، قايىرىمدىلىق قورلارى سۋ تاسقىنىنان زارداپ شەككەندەرگە گۋمانيتارلىق كومەك جيناپ جاتىر. ولاردىڭ ءبىرى - جاقسىلىق جاسا» قايىرىمدىلىق قورى.

قورعا قايىرىمدىلىق جاساۋمەن سوڭعى 5 جىل بويى اينالىسىپ كەلە جاتقان 7 بالانىڭ اناسى جاننا ەردەنوۆا باسشىلىق ەتەدى جانە جەتىم بالالارعا، اسىراۋشىسىنان ايىرىلعان وتباسىلارعا، كوپ بالالى وتباسىلارعا، جالعىزىلىكتى انالارعا، ومىرلىك قيىن جاعدايعا تاپ بولعان ادامدارعا كومەك بەرەدى. قوردىڭ ەلوردادا قايىرىمدىلىققا ارنالعان جۇكتەر جيناقتالاتىن ەكى قويماسى بار. سول جەرلەردە ەلوردا تۇرعىندارىنان جينالعان كيىم-كەشەكتەر مەن ازىق-تۇلىكتەر جيناقتالادى جانە مۇقتاج جاندار ولاردى تەگىن الىپ كەتەدى.

«قازىرگى ۋاقىتتا ەلىمىزدىڭ تۇكپىن-تۇكپىرىندە حالىق سۋ تاسقىنان زارداپ شەگىپ جاتقانى بەلگىلى. تۇرعىنداردىڭ باسپانالارى، كيىم-كەشەكتەرى سۋ استىندا قالدى. سوندىقتان ەلوردا تۇرعىندارىنان گۋمانيتارلىق جۇك جيناۋدى باستاعانىمىزعا ءۇشىنشى كۇن بولدى. ەلوردالىقتار جان-جاقتان حابارلاسىپ، قويمالارىمىزعا ماكارون ونىمدەرىن، سۇيىق ماي، شاي سىندى بۇزىلمايتىن ازىق-تۇلىكپەن قاتار كىشكەنتاي بالالاردان باستاپ، ۇلكەن ادامدارعا ارنالعان كيىم-كەشەكتەر، كىر جۋاتىن ۇنتاقتار، توسەك-ورىندار، كورپە-جاستىقتار اكەلىپ جاتىر. جينالعان جۇكتى قوستاناي وبلىسىنىڭ سۋ تاسقىنىنان زارداپ شەككەن امانگەلدى اۋدانىنا جىبەرىپ جاتىرمىز. كيىم-كەشەك پەن ازىق-تۇلىك جيناقتالعان العاشقى گۋمانيتارلىق جۇگىمىزدى سەنبى كۇنى 5 جۇك كولىگىمەن جىبەرگەن ەدىك. كەشە تۇرعىندارعا تابىستالدى. تاعى 4 گۋمانيتارلىق جۇك كولىك تيەلگەن تاعى 4 كولىگىمىز جولدا»، - دەدى جاننا ەردەنوۆا.

ق ر پرەمەر-مينيسترى ولجاس بەكتەنوۆ ءتجم-نىڭ داعدارىستىق جاعدايلاردا باسقارۋ ورتالىعىندا توتەنشە جاعدايلار ءمينيسترى شىڭعىس ءارىنوۆتىڭ ەسەبىن تىڭدادى. اۋماقتىق تجد-لار بەينە كونفەرەنس بايلانىس رەجيمىندە قوسىلدى.

تجم دەرەكتەرى بويىنشا اكىمدىكتەرمەن بىرلەسىپ، 2،3 ملن م3 استام اعىن سۋ شىعارىلىپ، 162 مىڭنان استام قۇم تولتىرىلعان قاپشىق جانە 31 587 توننا ينەرتتى ماتەريال توسەلدى. اپاتتىق-قۇتقارۋ جۇمىستارىنا 6 349 ادام، 2 192 تەحنيكا، 689 سورعى قۇرالى جانە ت.ب. جۇمىلدىرىلدى.

«بۇل – سوڭعى جىلدارداعى ەڭ ۇلكەن سۋ تاسقىنى. ءقازىر باستىسى – ادام ءومىرىن ساقتاپ قالۋ جانە اپات زارداپتارىن ازايتۋ. كەيىن جەكەلەگەن لاۋازىمدى تۇلعالاردىڭ ءوز قىزمەتتىك مىندەتتەرىنە سالعىرت قاراۋىنىڭ ىقتيمال فاكتىلەرىن انىقتاۋ ماقساتىندا ەگجەي-تەگجەيلى تەكسەرۋ جۇرگىزىلەتىن بولادى. مەن بۇل ماسەلەنى باس پروكۋرورمەن تالقىلادىم. بۇگىندە بارلىق كۇش سۋ تاسقىنىنا قارسى جۇمىستارعا جۇمىلدىرىلدى. مەنىڭ ءبىرىنشى ورىنباسارىم رومان ۆاسيليەۆيچ سكليار ەڭ قاتتى زارداپ شەككەن وڭىرلەردە ءجۇر» ، — دەدى ولجاس بەكتەنوۆ.

ۇكىمەت باسشىسى سونداي-اق سولتۇستىك وڭىرلەردە دە سۋ باسۋ ءقاۋپى بار ەكەنىن اتاپ ءوتتى. بۇعان دەيىن سولتۇستىك قازاقستان وبلىسىنداعى سۋ توراپتارىنىڭ جاعدايى تەكسەرىلگەن بولاتىن.

تجم باسشىلىعىنا ەلىمىزدىڭ بارلىق وڭىرىندە باقىلاۋدى كۇشەيتۋ تاپسىرىلدى.