قازاقستاننىڭ تۇركياداعى ەلشىسى ابزال ساپاربەك ۇلى جىلدىڭ ەڭ ۇزدىك ديپلوماتى اتاندى. اقجولتاي اقپارات ەلشىلىكتىڭ فەيسبۋك الەۋمەتتىك جەلىسىندەگى (https://www.facebook.com/kzembassy) رەسمي پاراقشاسىندا جاريالاندى.
«جىبەك جولى» ستراتەگيالىق زەرتتەۋلەر ورتالىعى جانە «جىبەك جولى» باسپا توبىنىڭ ۇيىمداستىرۋىمەن وتكەن شارادا «حالىقارالىق 15ء-شى جىبەك جولى بيىلعى جىلدىڭ التىن ادامدارى» بەلگىلى بولدى. وسى رەتتە، قازاقستاننىڭ ەلشىسى ابزال ساپاربەكۇلىنا «جىلدىڭ ەڭ ۇزدىك ديپلوماتى» سىيلىعى بەرىلدى.
ۇلى جىبەك جولىنىڭ وركەنيەتتەر اراسىنداعى ساۋدا-ساتتىق، باۋىرلاستىق ىنتىماقتاستىعىن ورناتۋ جولىنداعى ميسسياسىن ۇلگى العان «جىبەك جولى» ستراتەگيالىق زەرتتەۋلەر ورتالىعىنىڭ باستى ماقساتتارىنىڭ ءبىرى تۇركيا مەن باسقا ەلدەر اراسىندا دوستىق جانە ىنتىماقتاستىق كوپىرىن قۇرۋ.
تۇركيانىڭ زيالى قاۋىم وكىلدەرى، ديپلوماتيالىق ميسسيا باسشىلارى، كاسىپكەرلەر مەن ب ا ق وكىلدەرى قاتىسقان سالتاناتتى شارادا ءسوز سويلەگەن ەلشى ا.ساپاربەك ۇلى ەلىمىزدىڭ سىرتقى ساياساتىنا توقتالا وتىرىپ، مارتەبەلى سىيلىققا يە بولۋىن، جەكە ءوزىنىڭ ەمەس، قازاقستان ديپلوماتياسىنىڭ جەمىسى دەپ باعالايتىنىن جەتكىزدى. قازاقستاننىڭ كوپۆەكتورلى، بەيبىت، بەلسەندى جانە تەڭگەرىمدى سىرتقى ساياساتى ارقىلى ايماق پەن الەمنىڭ تۇراقتىلىعى مەن بەيبىتشىلىگىنە ەلەۋلى ۇلەس قوسىپ وتىرعانىنا نازار اۋدارعان ەلشى ا.ساپاربەك ۇلى ەلباسى نۇرسۇلتان نازاربايەۆتىڭ استانا پروسەسى، تۇركى كەڭەسىنىڭ قۇرىلۋى، ەلىمىزدىڭ بۇۇ قاۋىپسىزدىك كەڭەسى شەڭبەرىندەگى جۇمىسى سەكىلدى حالىقارالىق ارەناداعى جەمىستى باستامالارى تۋرالى ءسوز ەتتى. تاجىريبەلى مەملەكەت قايراتكەرى جانە كورنەكتى ديپلومات قاسىم-جومارت توقايەۆتىڭ پرەزيدەنت اتانۋى سىرتقى ساياساتىمىزداعى ساباقتاستىقتىڭ كەپىلى ەكەندىگىن جەتكىزگەن قازاقستان ەلشىسى قازاق-تۇرىك ىنتىماقتاستىعىنا دا توقتالدى.
«حالىقارالىق 15ء-شى جىبەك جولى بيىلعى جىلدىڭ التىن ادامدارى» نوميناسياسىندا باستى ماراپات وزبەكستان پرەزيدەنتى شاۆكات ميرزيويەۆكە بەرىلدى. سونداي-اق، مولدوۆا گاگاۋز اۆتونوميالىق ايماعىنىڭ پرەزيدەنتى يرينا ۆلاح، تۇۇم دەپۋتاتى، ازەربايجان-تۇركيا پارلامەنتتەر اراسى دوستىق توبى ءتوراعاسى شاميل ايرىم، تۇركسوي باس حاتشىسى دۇيسەن قاسەيىنوۆ، «Öztek تekstil» باسقارما ءتوراعاسى احمەت وزتەك، بۇكىلالەمدىك احىسكا تۇرىكتەرى قاۋىمداستىعى پرەزيدەنتى زياەددين يسميحانوعلۋ، «Yükselir Group» باسقارما ءتوراعاسى ياۆۋز يۋكسەل، «Edelstaal Şirketler Grubu» باسشىسى تۋرگۋت تورۋنوعۋللارى، حالىقارالىق ءبىلىم ورتالىعى باسشىسى پروف. ەلچين يسگەندەرزادە جانە «Marmara Grubu» قورىنىڭ باسشىسى اككان سۋۆەر تۇركى الەمىنىڭ ىنتىماقتاستىعىنا قوسقان ۇلەستەرى ءۇشىن ءتۇرلى سالالاردىڭ ۇزدىكتەرى اتاندى.
