كوشى-قون ساياساتىنىڭ 2023-2027 جىلدارعا ارنالعان تۇجىرىمداماسىندا كورسەتىلگەن دەرەكتەرگە سۇيەنسەك، 2011-2022 جىلدار ارالىعىندا جوعارى جانە تەحنيكالىق-كاسىپتىك ءبىلىمى بار 367 مىڭ ەڭبەككە جارامدى قازاقستاندىق شەتەلگە قونىس اۋدارعان.
ەل دەموگرافياسىنداعى كۇيزەلىس اسىرەسە 2019-2021 جىلدار ارالىعىندا قاتتى بايقالدى. ال ەلگە كوشىپ كەلۋشىلەردىڭ ىشىندە جوعارى ءبىلىمى بار ادامداردىڭ ۇلەسى ازايا تۇسكەن. كەيىنگى 10 جىلدا ەلگە كەلەتىن جوعارى ءبىلىمدى ادامداردىڭ سانى ەكى ەسەدەن استام قىسقارىپ، 2020 جىلى 1،9 مىڭ ادامعا تۇسكەن.
دەگەنمەن، بۇل تەندەنسيا ەلدەگى ەڭبەككە جارامدى ادامداردىڭ سانىنا سونشالىق كەرى اسەر ەتىپ وتىر دەۋگە كەلمەيدى. ەلىمىز ءالى دە بولسا، ەڭ جاس، كوبەيۋگە بەيىم حالقى بار مەملەكەتتىڭ ءبىرى بولىپ سانالادى.
1991-2021 جىلدار ارالىعىندا وزبەكستان، جۇڭگو، تۇرىكمەنستان، موڭعوليا مەملەكەتتەرىنەن 379 مىڭ وتباسى نەمەسە 1 ملن 101 مىڭ قانداس كەلىپ، ازاماتتىق العان. كەيىنگى ءۇش جىلدا قانداستاردىڭ كەلۋى دە باسەڭدەگەنگە ۇقسايدى. 2016 جىلى 33،7 مىڭ قانداس، 2019 جىلى 17،7 مىڭ قازاق، 2021 جىلى 14 مىڭنان استام قانداس، 2024 جىلى 12 325 ادام ورالعان.
سوڭعى حالىق ساناعى حالىق سانى 19 ملن ادامنان اسقانىن كورسەتتى. ساراپشىلار قازاقستاندىقتاردىڭ قازىرگى جاس قۇرامى ەكونوميكا ءۇشىن وتە قولايلى دەپ باعالايدى. ەڭبەككە جارامدى دەپ سانالاتىن 15-62 جاس ارالىعىنداعىلاردىڭ ۇلەسى – 57،7%.
بىزدەگى دەموگرافيالىق دامۋدى نەپال، كونگو، بانگلادەش سياقتى ەلدەردەگى وسىممەن سالىستىرۋعا كەلمەيدى. حالىق سانىن ارتتىرىپ قانا قويماي، دەموگرافيالىق ۇدەرىستەردى ۇتىمدى ءارى ءقاۋىپسىز باسقارۋ دا وڭاي شارۋا ەمەس ەكەنىن قازىرگى گەوساياسي جاعدايلار كورسەتىپ وتىر. سوندىقتان مەملەكەت دەموگرافيالىق ءوسىمنىڭ بارلىق ساتىسىن سيفرلاندىرىپ، دەنساۋلىق ساقتاۋ، ءبىلىم بەرۋ سالالارىمەن ۇندەستىكتە دامىتۋعا باعىتتالعان ساياسات ۇستانادى.