قازاقستان پرەزيدەنتى وزبەكستاننىڭ ءوليي ءماجىلىس سەناتىنىڭ ءتوراعاسى تانزيلا ناربايەۆانى قابىلدادى. اقورداداعى باسپا ءسوز قىزمەتىنىڭ حابارلاۋىنشا، كەزدەسۋ كەزىندە ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى.
قاسىم-جومارت توقايەۆ تانزيلا ناربايەۆانىڭ ساپارى ەكى ەلدىڭ پارلامەنتارالىق بايلانىستارىن دامىتىپ، مەملەكەتتەر اراسىنداعى قارىم-قاتىناسقا تىڭ سەرپىن بەرەتىنىن اتاپ ءوتتى.
– 2018 جىلى ساۋدا اينالىمى 2،5 ميلليارد دوللاردى قۇرادى. ال بيىلعى 9 ايدىڭ وزىندە وتكەن جىلعى ناتيجەدەن ارتىق جەتىستىككە جەتىپ وتىرمىز. سوعان سايكەس، جىل سوڭىندا قازاقستان مەن وزبەكستان اراسىنداعى ساۋدا اينالىمىنىڭ كولەمى دە ارتا تۇسەدى، – دەدى قاسىم-جومارت توقايەۆ.
پرەزيدەنت ءساۋىر ايىنداعى وزبەكستانعا جاساعان مەملەكەتتىك ساپارىنىڭ ناتيجەسىندە ساۋدا-ەكونوميكالىق بايلانىستاردى نىعايتىپ، ءوزارا ساۋدا اينالىمىن بىرتىندەپ 5 ميلليارد دوللارعا دەيىن ارتتىرۋ تۋرالى كەلىسىمگە قول جەتكىزىلگەنىن ايتتى.
مەملەكەت باسشىسى ەكى ەل اراسىنداعى كولىك-ترانسپورت بايلانىستارىنىڭ، سونداي-اق، مادەني-گۋمانيتارلىق قارىم-قاتىناستاردىڭ دامۋ بارىسى جوعارى دەڭگەيدە ەكەنىن اتاپ ءوتتى.
– قازاقستان مەن وزبەكستان ءوزارا ىنتىماقتاستىقتى دامىتۋعا قىزىعۋشىلىق تانىتىپ قانا قويماي، سونىمەن قاتار، ءبىرقاتار ماسەلەلەر بويىنشا ءبىرىن-بىرى تولىقتىرىپ وتىرادى. سوندىقتان ءبىزدىڭ ءوزارا ىقپالداستىعىمىز تابىستى بولاتىنى ءسوزسىز. ونىڭ ۇستىنە، ارىپتەسىم، وزبەكستان پرەزيدەنتى شاۆكات ميرزيويەۆپەن ەكى ەل اراسىنداعى ىنتىماقتاستىقتى جان-جاقتى دامىتۋ ءۇشىن بەلسەندى جۇمىس جۇرگىزۋگە كەلىستىك، – دەدى قاسىم-جومارت توقايەۆ.
تانزيلا ناربايەۆا قاسىم-جومارت توقايەۆقا قوناقجايلىق تانىتقانى ءۇشىن العىس ايتىپ، شاۆكات ميرزيويەۆتىڭ سالەمىن جەتكىزدى.
– ءسىزدىڭ قازاقستان پرەزيدەنتى لاۋازىمىنا سايلانۋىڭىز – بۇعان دەيىنگى ابىرويلى قىزمەتىڭىزدىڭ ناتيجەسى. ءسىز تاجىريبەلى ديپلومات، ىقپالدى باسشى رەتىندە تۇڭعىش پرەزيدەنت نۇرسۇلتان نازاربايەۆتىڭ قازاقستاننىڭ مەملەكەتتىك قاۋىپسىزدىگىن نىعايتۋ جانە ەكونوميكاسىن دامىتۋعا باعىتتالعان باستامالارىن جالعاستىرىپ كەلەسىز، – دەدى وزبەك ساياساتكەرى.
كەزدەسۋ سوڭىندا مەملەكەت باسشىسى وزبەكستان پرەزيدەنتىنە ىزگى تىلەگىن جولدادى.
سۋرەتتەر akorda.kz سايتىنان الىندى.
