بۇگىن قازاقستاننىڭ تۇركياداعى ەلشىسى ابزال ساپاربەك ۇلى تۇركيا ۇلى ۇلتتىق ءماجىلىسىنىڭ ءتوراعاسى مۇستافا شەنتوپپەن كەزدەستى. تاراپتار قازاقستان مەن تۇركيانىڭ ەكىجاقتى جانە كوپجاقتى ىنتىماقتاستىعىنا قاتىستى ءبىرقاتار ماسەلەلەر تالقىلاندى. بۇل تۋرالى اقپارات ەلىمىزدىڭ سىرتقى ىستەر مينيسترلىگىنىڭ سايتىندا جاريالاندى.
ا. ساپاربەك ۇلى م. شەنتوپقا قازاقستاندا سوڭعى كەزدە بولىپ جاتقان ماڭىزدى وقيعالار تۋرالى بايانداپ بەردى. بۇلە رەتتە قازاق ديپلوماتى ەلىمىزدە ساياسي ساباقتاستىقتىڭ ساقتالىپ وتىرعاندىعىنا، ەلباسىنىڭ سىندارلى ىشكى جانە سىرتقى ساياسي باعىتىنىڭ جالعاساتىندىعىنا نازار اۋداردى. ەلشى ساپاربەك ۇلى بيىل نۇرسۇلتان نازاربايەۆ ۇسىنعان ەۋرازيالىق ىنتىماقتاستىق يدەياسىنا 25 جىل تولىپ وتىرعانىن ايتىپ، م. شەنتوپقا الداعى قىركۇيەك ايىندا نۇر-سۇلتاندا وتەتىن ەۋرازيا ەلدەرى پارلامەنت سپيكەرلەرىنىڭ 4ء-شى جينالىسىنا رەسمي شاقىرۋ حاتىن تابىستادى.
ءوز كەزەگىندە، تۇرىك پارلامەنتىنىڭ سپيكەرى نۇرسۇلتان نازاربايەۆتىڭ تاۋەلسىز قازاقستاندى دامىتۋداعى وراسان زور رول اتقارعانىن تىلگە تيەك ەتە وتىرىپ، ەلباسىنىڭ پرەزيدەنتتىك وكىلەتتىكتى توقتاتۋ بويىنشا شەشىمىنىڭ ستراتەگيالىق ماڭىزدىلىعىنا توقتالدى. م. شەنتوپ قازاقستاننىڭ تۇڭعىش پرەزيدەنتىنىڭ قازاق-تۇرىك بايلانىستارىن، سونداي-اق تۇركى الەمىندەگى ىنتىماقتاستىقتى ىلگەرىلەتۋگە قوسقان ۇلكەن ايرىقشا اتاپ ءوتىپ، تۇركيا پرەزيدەنتى ر.ت. ەردوعاننىڭ ن.ءا. نازاربايەۆتىڭ وتستاۆكاعا كەتۋى تۋرالى حاباردى مۇڭايا قابىلداعانىن ايتتى.
سونىمەن بىرگە م. شەنتوپ پرەزيدەنت قاسىم-جومارت توقايەۆتىڭ ۇلكەن تاجىريبەسىن اتاي وتىرىپ، ەلدەرىمىز اراسىنداعى ستراتەگيالىق ارىپتەستىكتىڭ بۇدان كەيىن دە نىعايا بەرەتىنىنە دەگەن سەنىمىن ءبىلدىردى. تۇركيا پارلامەنتىنىڭ ءتوراعاسى قازاقستان پارلامەنت سەناتىنىڭ ءتوراعاسى د. نازاربايەۆانى تەلەفون ارقىلى قۇتتىقتاپ، جاۋاپتى قىزمەتىندە ساتتىلىك تىلەگەنىن اتاپ ءوتتى.
تاراپتار ەكى ەل اراسىنداعى ساياسي، ساۋدا-ەكونوميكالىق، زاڭشىعارۋشىلىق سالالارىنداعى ىنتىماقتاستىق ماسەلەلەرىنە توقتالدى. اتاپ ايتقاندا، م. شەنتوپ استانادا ورنالاسقان ازىق-تۇلىك قاۋىپسىزدىگى جونىندەگى يسلام ۇيىمىنىڭ جارعىسىن ماقۇلداۋعا قاتىستى ءتيىستى زاڭنىڭ تۇركيا پارلامەنتىندە جۋىق ارادا قابىلداناتىنىن جەتكىزدى.
