قوستاناي وبلىسىنداعى ءجىتىقارا قالاسىندا قايعىلى وقيعا بولعان. ءۇي شاتىرى وپىرىلىپ قۇلاعان كەزدە وندا ەرەسەكتەردىڭ قاراۋىنسىز قالعان 2011، 2016، 2018، 2019، 2022، 2023 جىلى تۋعان بالالار بولعان. وكىنىشكە قاراي، ۇيىندىلەردى تازالاۋ كەزىندە بەس بالانىڭ دەنەسى تابىلدى. 2011 جىلى تۋعان بالالاردىڭ ۇلكەنى زارداپ شەككەن جوق. بۇل تۋرالى Ulys تجم سىلتەمە جاساپ حابارلايدى.

«بۇگىن ساعات 04:29-دا ءجىتىقارا قالاسىنداعى جەكە شارۋا قوجالىعىنىڭ اۋماعىندا ءورت شىعىپ، سالدارىنان تۇرعىن ءۇيدىڭ شاتىرى وپىرىلىپ ءتۇستى. قۇتقارۋشىلار وقيعا ورنىنا 7 مينۋت ىشىندە جەتتى، ءۇي تولىعىمەن ورتكە وراندى. جالىن ساعات 06:08-دە اۋىزدىقتالىپ، تولىعىمەن ءسوندىرىلدى. الدىن الا مالىمەت بويىنشا، بالالاردىڭ اناسى كەشكىسىن تانىسىنا كەتكەن. كۇيەۋى تۇرمەدە وتىر»، - دەپ حابارلادى وبلىستىق تجد.

وقيعانىڭ سەبەپتەرى انىقتالىپ جاتىر. ورت-تەحنيكالىق زەرتتەۋ تاعايىندالدى. اپاتتار مەديسيناسى ورتالىعى فيليالىنىڭ پسيحولوگتارى تۋىستارىنا قاجەتتى پسيحولوگيالىق كومەك كورسەتىپ جاتىر. 

قاراعاندى وبلىسى قارقارالى اۋدانى اۋماعىندا بولعان دالا ورتىنەن 33 جاستاعى ءورت ءسوندىرۋشى مەرت بولدى. اقپاراتتى رەسمي ورگان راستادى، دەپ حابارلايدى Ulys.

«6 قازان كۇنى قاراعاندى وبلىسى قارقارالى اۋدانىنداعى دالا ءورتىن ءسوندىرۋ بارىسىندا ءوز قىزمەتتىك مىندەتىن اتقارۋ كەزىندە 24ء-ورت ءسوندىرۋ ءبولىمىنىڭ اعا ءورت ءسوندىرۋشىسى 1991 جىلى تۋعان حالي حايرات قازا تاپتى.  سەرجانت ازاماتتىق قورعاۋ ورگاندارىندا 2014 جىلدان باستاپ جۇمىس ىستەگەن»، - دەدى توتەنشە جاعدايلار مينيستىرلىگى.

ايتا كەتەيىك، ءورت قاراعاندى وبلىسى قارقارالى اۋدانى قوياندى اۋىلىنىڭ ماڭىندا بولعان. بۇل ءورت پاۆلودار وبلىسىنىڭ اۋماعىنا وتكەن.

ءانشى قايرات نۇرتاس الماتى-استانا باعىتىنداعى ۇشاقتا بۇزاقىلىق كورسەتىپ، جولاۋشىنىڭ دەنساۋلىعىنا جەڭىل زيان كەلتىرگەن، دەپ حابارلايدى Ulys.

جاقىندا تانىمال ءانشى قايرات نۇرتاس (ايداربەكوۆ) الماتىدان استاناعا ۇشاتىن ۇشاقتىڭ بورتىندا داۋ شىعارعان. ءانشى باسقا جولاۋشىنىڭ دەنساۋلىعىنا جەڭىل زيان كەلتىرگەن. جابىرلەنۋشىنىڭ اتى - اسىلبەك بەكقايىروۆ.  بۇل جاعدايعا بايلانىستى اۋە كەمەسىنىڭ كومانديرى پوليسيانىڭ كومەگىنە جۇگىنۋگە ءماجبۇر بولدى. قۇقىق قورعاۋ ورگاندارىنىڭ قىزمەتكەرلەرى ەكەۋىن  بولىمشەگە الىپ بارادى. وندا مۋزىكانتقا ەكى اكىمشىلىك قۇقىق بۇزۋشىلىق - دەنساۋلىققا قاساقانا جەڭىل زيان كەلتىرۋ جانە قايتا جاسالعان ۇساق بۇزاقىلىق تۋرالى حاتتاما رەسىمدەلدى»،- دەپ جازدى Kozachkov telegram ارناسى. 

بۇعان دەيىن نۇرتاس ساحنادا بەيادەپ سوزدەر ءۇشىن ايىپپۇل تولەگەن بولاتىن، سوندىقتان ول رەسيديۆيست بولىپ شىقتى. اسىلبەك بەكقايىروۆقا دا حاتتاما جاسالدى. 

بۇل وقيعاعا قاتىستى كولىكتەگى پوليسيانىڭ باسپا ءسوز قىزمەتى حابارلاما جاسادى.

«الماتى-استانا» باعىتىنداعى اۋە رەيسىنىڭ بورتىنداعى ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالىپ، ماتەريالدار قاراۋ ءۇشىن سوتقا جولداندى»،- دەپ حابارلادى كولىكتەگى پوليسيا دەپارتامەنتىنىڭ باسپا ءسوز قىزمەتى.