ەلىمىزدىڭ مەديا كەڭىستىگى «قاڭتار قاسىرەتىنەن» كەيىن سان الۋان مازمۇندى  اقپاراتتارعا تولدى. اراسىنان «ەلىمىزدە بيلىك السىرەپ، بەرەكەمىز قاشسا، ميللياردتاعان ينۆەستيسياسىن قورعاۋ ءۇشىن جۇڭگو اسكەر ەنگىزۋى ابدەن مۇمكىن ەدى» دەگەن پىكىرلەر دە كەزدەستىرۋگە بولادى. وسىنى تالداپ كورسەك.  
تاۋەلسىزدىك جىلدارىنان بەرى جۇڭگو حالىق رەسپۋبليكاسىنىڭ قازاقستانعا قۇيعان تىكەلەي ينۆەستيسياسىنىڭ كولەمى $22 ملرد شاماسىندا. بۇل ەلىمىزگە كەلگەن جالپى تىكەلەي شەتەلدىك ينۆەستيسيانىڭ 5% عانا قۇرايدى. 
ال 2010-2020 جىلدار ارالىعىندا قىتايدىڭ شەت ەلدەرگە قۇيعان  ينۆەستيسيانىڭ جالپى كولەمى $1،4 ترلن. ياعني ەلىمىزگە 30 جىل ىشىندە كەلگەن قىتايق ينۆەستيسيا ولاردىڭ سوڭعى ون جىلداعى سىرتقى شىعارعان جالپى تىكەلەي شەتەلدىك ينۆەستيسيانىڭ 1،5% عانا قۇرايدى. 
1،5 پايىزدىق ينۆەستيسيانى قورعاۋعا قازاقستانعا اسكەر جونەلتۋ جۇڭگو ءۇشىن قانشالىقتى راسيونالدى شەشىم بولۋى مۇمكىن؟ قازاقستاننىڭ گەوساياسي ستراتەگيالىق ماڭىزدىلىعىنا قاراماستان پەكين مۇنداي شەشىمگە بارادى دەگەنگە سەنۋ قيىنىراق. 
قىتايدىڭ قورعانىس بويىنشا «اق كىتابى» (اسكەري دوكترينا) 2015 جانە 2019 جىلدارى ەكى رەت وزگەرتىلىپ تولىقتىرىلدى. اتالعان  قۇجاتتىڭ الدىڭعىلارىنان باستى ايىرماشىلىعى رەتىندە «بۇدان بىلاي جۇڭگو ءوزىنىڭ قورعانىس شەبىن بۇرىنعىداي تەك مەملەكەتتىك شەكارا سىزىعى توڭىرەگىندە ەسەپتەمەيتىندىگىن» اتاۋعا بولادى.
 الايدا جاڭارعان «اق كىتاپتىڭ» نەگىزگى مازمۇنى بۇرىنعىلارىمەن ساباقتاس: «جۇڭگو ەشقاشان گەگەمون بولۋعا ۇمتىلمايدى. پەكين سىرتقى ساياساتتا ءارقاشان «win-win» قاعيداسىن باسشىلىققا الادى. 
حالىقارالىق قاتىناستار مەن الەمدىك دامۋدا جۇڭگو ءوزىن «ۇلكەن جاۋاپكەرشىلىك ارقالاعان الىپ مەملەكەت» (负责任大国 fu zeren da guo) ۇستايدى. حالىقارالىق قاۋىپسىزدىكتى قامتاماسىز ەتۋ مەن الەمنىڭ تۇراقتى دامۋىنىڭ باستى كەپىلى رەتىندە جۇڭگو مەملەكەتتەردىڭ ىشكى ىسىنە مۇلدە ارالاسپايدى. 
قىتايدىڭ ۇستانمى بويىنشا، كەز كەلگەن مەملەكەت ءوزىنىڭ ىشكى زاڭناماسىنا جانە ۇلتتىق مۇددەسىنە سايكەس دەربەس ساياسي، ەكونوميكالىق، الەۋمەتتىك شەشىمدەر قابىلداۋعا جانە قالىپتاسىپ وتىرعان ىشكى شيەلەنىستى جاعدايلاردى ءوز پايىمىنشا شەشۋگە قۇقىلى». 
«قاڭتار قاسىرەتى» بويىنشا رەسمي پەكيننىڭ باستى ۇستانىمى دا وسى مازمۇنداس ەكەنىن الماتىداعى الاساپىران كەزىندە قىتايلىق ساياساتكەرلەردىڭ جاساعان پىكىرلەرىنەن دە، 25 قاڭتارداعى ورتالىق ازيا-قىتاي سامميتىندەگى سي ءسزينپيننىڭ بايانداماسىنان دا بايقاۋعا بولادى.

ايبولات دالەلحان، قىتايتانۋشى