قازاقستان پرەمەر-مينيسترى ولجاس بەكتەنوۆ جۇمىس ساپارىمەن الماتىعا باردى. نەگىزگى ماقسات – مەملەكەت باسشىسىنىڭ ينجەنەرلىك جانە الەۋمەتتىك ينفراقۇرىلىمدى جاڭعىرتۋ، كاسىپكەرلىكتى قولداۋ جانە يندۋستريالىق نەگىزدى نىعايتۋ جونىندەگى تاپسىرمالارىنىڭ ورىندالۋىن قاداعالاۋ، دەپ حابارلايدى ق ر ۇكىمەتىنىڭ باسپا ءسوز قىزمەتى.
سورعى ستانساسىنىڭ اۋماعىندا ۇكىمەت باسشىسى مەگاپوليستىڭ جوعارعى اۋداندارىن سۋمەن قامتاماسىز ەتۋدىڭ رەزەرۆتىك جۇيەسىن سالۋ جۇمىسىنىڭ قارقىنىن تەكسەردى. جوبانىڭ ماڭىزى جەر ءۇستى سۋلارىنا تاۋەلدىلىككە بايلانىستى. بۇعان دەيىن 2023 جىلعى 18 تامىزدا الماتى قالاسىن دامىتۋ ماسەلەلەرى جونىندەگى كەڭەستە سەلدىڭ كوبەيۋى جانە وزەن سۋى لايلانۋىنىڭ ارتۋىنا بايلانىستى پرەزيدەنت قالانىڭ جوعارعى بولىگىنە اۋىز سۋ بەرۋدى شەكتەمەۋ ءۇشىن اتالعان ماسەلەنى شەشۋگە تاپسىرما بەرگەن بولاتىن. ماسەلەن، الماتى 6 نەگىزگى كوزدەن: ۇلكەن جانە كىشى الماتى، اقساي، قارعالى وزەندەرىنەن جانە الماتى مەن تالعار كەن ورىندارىنىڭ جەراستى سۋ جيناعىشى ارقىلى سۋمەن قامتاماسىز ەتىلەدى.
قالا تۇرعىندارىن سۋمەن تۇراقتى ءارى ۇزدىكسىز قامتاماسىز ەتۋ ماقساتىندا تالعار جەراستى سۋ جيناعىشىنان تاۋلىگىنە 17 مىڭ م3 كولەمىندە قولدانىستاعى جەلىلەردى قوسىمشا تولىقتىرۋعا جاعداي جاسالدى. جوبا قۋاتتىلىعى 15 مىڭ م3 بولاتىن جاڭا 6 ۇڭعىما سالۋدى جانە قۋاتتىلىقتى 60%-عا ارتتىرا وتىرىپ، 6 سورعى ستانساسىنداعى 14 سورعىنى تولىق اۋىستىرۋدى كوزدەيدى. قالا اكىمىنىڭ ورىنباسارى اسقار ءامرين پرەزيدەنتتىڭ رەزەرۆتىك جۇيە تۋرالى تاپسىرماسىنىڭ ورىندالعانىن باياندادى.
سونىمەن قاتار پرەمەر-مينيسترگە الماتى قالاسىنىڭ بارلىق تۇرعىنىن ورتالىقتاندىرىلعان سۋمەن قامتۋ بويىنشا جۇرگىزىلىپ جاتقان جۇمىس بارىسى تۋرالى باياندالدى. وتكەن جىلى 117 شاقىرىم سۋ قۇبىرى سالىنىپ، 46 شاقىرىمى جاڭعىرتىلدى، بۇل الماتى تۇرعىندارىنىڭ 99،3%-ىن ورتالىقتاندىرىلعان سۋمەن قامتاماسىز ەتۋگە مۇمكىندىك بەردى. الاتاۋ، بوستاندىق جانە ناۋرىزباي اۋداندارىنىڭ تۇرعىندارىن سۋمەن قامتۋ ماسەلەسىن شەشۋ ءۇشىن 4 سۋ جيناعىش قۇرىلىسى مەن جوباسى جۇرگىزىلۋدە. بيىل 142 شاقىرىم ينجەنەرلىك كوممۋنيكاسيا سالۋ جانە 48 شاقىرىم جەلىنى جوندەۋ جوسپارلانعان. قابىلدانعان شارالار جىل سوڭىنا دەيىن تۇرعىنداردىڭ 99،6%-ىن ورتالىق سۋمەن قامتۋعا جانە جەلىلەردىڭ توزۋ دەڭگەيىن 53،8%-عا دەيىن تومەندەتۋگە مۇمكىندىك بەرەدى.
ۇكىمەت باسشىسى حالىقتىڭ اۋىز سۋعا قول جەتكىزۋىنىڭ ماڭىزدىلىعىن اتاپ ءوتىپ، ينجەنەرلىك ينفراقۇرىلىمدى ودان ءارى جاڭعىرتۋ جونىندە ءبىرقاتار تاپسىرما بەردى.
«سۋمەن قامتۋ – ستراتەگيالىق ماسەلە. قالانىڭ تىنىس-تىرشىلىگىن قامتاماسىز ەتۋ جۇيەلەرىنىڭ جۇمىس ىستەۋى – اكىمدىكتىڭ باستى مىندەتى. وتكەن جازدا ماسەلە بار ەكەنى بايقالدى. سوندىقتان بارلىق باستالعان جوبالاردى اياقتاۋ ماڭىزدى. اكىمدىك ازىرلەپ جاتقان الماتى قالاسىن سۋمەن جابدىقتاۋ سحەماسىندا تۇرعىۆنداردى سۋمەن ءتۇرلى بالامالى كوزدەردەن قامتاماسىز ەتۋ مۇمكىندىگى ەسكەرىلۋى ءتيىس»، — دەپ اتاپ ءوتتى ولجاس بەكتەنوۆ.
