يۋنۋس ەمرە اتىنداعى تۇرىك مادەني ورتالىعى «جاستار جىلىنا» وراي تالانتتى جاستارعا قولداۋ كورسەتۋ ماقساتىندا ءوز ءىس-شارالارىن باستاماق. ورتالىق الداعى اپتا جاس سۋرەتشى نازەركە كەمەلبايەۆانىڭ «قازاقستاندىقتار كوزىمەن تۇركيا» اتتى كورمەسىن وتكىزەدى. جاس تالانتتىڭ العاشقى جەكە كورمەسىنىڭ تۇساۋى 14 ناۋرىزدا كەسىلەدى. وسى ورايدا تۇرىك مادەنيەتى مەن ونەرىنە عاشىق قىل قالام شەبەرىمەن بولعان سۇحباتتى نازارلارىڭىزعا ۇسىنامىز.
- نازەركە، الداعى اپتا جەكە كورمەڭ وتپەك ەكەن، قۇتتىقتايمىز. الدىمەن ءوزىڭىز تۋرالى قىسقاشا ايىتىپ بەرسەڭىز.
-مەن 1996 جىلى 19 قاڭتاردا جەزقازعان قالاسىندا تۋدىم. بالالىق شاعىم ياعني 13 جاسقا دەيىن سەمەي قالاسىندا ءوتتى. بۇل قالانىڭ ماعان بەرگەن رۋحاني اسەرى مول بولدى. قازاق ادەبيەتىنىڭ ۇلى تۇلعالارى تۋعان، الەم تانىعان اباي مەن مۇحتاردىڭ ەلىندە ءوستىم. مەكتەپتى استانا قالاسىنداعى №66 قازاق ليسەيىندە وقىپ ءبىتىردىم. قازىرگى تاڭدا قازاق ۇلتتىق ونەر ۋنيۆەرسيتەتى سەنوگرافيا فاكۋلتەتىنىڭ 5 كۋرس ستۋدەنتىمىن.
-بەينەلەۋ ونەرىنە قالاي كەلدىڭ؟
- 15 جاسىمنان باستاپ استانا قالاسىنداعى «بالالار سۋرەت مەكتەبى. يۋنەسكو كلۋبى» اتتى مەكتەپتە قوسىمشا سۋرەت ونەرىن وقي باستادىم. اتالعان وقۋ ورنىنان اكادەميالىق ءبىلىم الدىم. 2014 جىلى «شابىت» ۋنيۆەرسيتەتىنە وقۋعا ءتۇستىم. ۋنيۆەرسيتەتتە ۇستازدارىم دراماتۋرگيالىق شىعارمالارعا كاسىبي تەوريالىق تالداۋ جاساۋدى ۇيرەتتى. العان ءبىلىمىم مەن تاجىريبەمنىڭ ارقاسىندا اكادەميا مەن ءاناليزدى قوسقاندا جاقسى يلليۋستراسيا شىعاتىنىن ءتۇسىندىم. جالپى، ءبىزدىڭ ۇيدەگى باستى يدەولوگيا – كىتاپ كۋلتى جانە ادەبيەت الەمى. انامنىڭ ۇيدە ۇلكەن جەكە كىتاپحاناسى بار. مەنىڭ انام — ايگۇل كەمەلبايەۆا جازۋشى، كينودراماتۋرگ، ەسسەشى، 5 كىتاپتىڭ اۆتورى، «دارىن» مەملەكەتتىك جاستار سىيلىعىنىڭ لاۋرەاتى. ۇيدە بالنۇر ەكەۋمىز كىشكەنتايىمىزدان مامام وقىپ بەرەتىن ەرتەگى كىتاپتاردىڭ مازمۇنىن جاتقا ءبىلىپ وستىك. يلليۋستراسيالارعا قىزىعىپ ءوستىم، شيمايلاپ سالا بەرەتىن بالالىق سۋرەتتەرىمدى مامام ساقتاپ قويىپتى. مەنىڭ سۋرەت ونەرىن تاڭداۋىما ۇيدەگى شىعارماشىلىق اتموسفەرا ايرىقشا اسەر ەتتى.
- سوڭعى كەزدە تۇرىك مادەنيەتى، تىرشىلىگى مەن رۋحانياتىنا قاتىستى ءبىراز سۋرەتتەر سالىپسىز. باۋىرلاس ەلدىڭ مادەنيەتىنە، ونەرىنە دەگەن قىزىعۋشىلىق قاي كەزدەن، قالاي پايدا بولدى؟
-تۇرىك رۋحانياتىنا قىزىعۋشىلىعىم تەلەسەريالداردان، كينو الەمىنەن باستالدى. شەبەر تۇسىرىلگەن تاريحي فيلمدەردەگى كورىكتى اكتەرلەر، كوركەم مۋزىكا، تاماشا كوستيۋمدەر، ديزاين مەن مەنتاليتەت تۇگەل ۇنايدى. اپكەمنىڭ كەڭەسى بويىنشا ءبىر جارىم جىل بۇرىن يۋنۋس ەمرە ينستيتۋتىن بارىپ، تۇرىكشە ۇيرەنە باستادىم. ورتالىقتا وقىعان سايىن تۇرىك مادەنيەتىنە قىزىعۋشىلىعىم ارتتى. ءوزىم ءۇشىن كاپپادوكيانىڭ رeri Bacaları مەن ىستامبۇلداعى سۇلتان احمەت مەشىتىنىڭ سۋرەتىن كاسىبي ءتۇرلى-تۇستى Faber-Castell قارىنداشتارىمەن گرافيكا تەحنيكاسىندا سالىپ، ۇستازىم احمەت بەيگە كورسەتتىم. ول ماعان ارى قاراي تۇركياعا قاتىستى سۋرەتتەر سەرياسىن سالۋىما يدەيا بەرىپ، كەلەشەكتە كورمە اشا الاتىنىمىزدى ايتتى. ءسويتىپ، مەن ءۇشىن بۇل تاماشا شىعارماشىلىق ۇردىسكە اينالدى. مەنى نوبەل سىيلىعىنىڭ لاۋرەاتى، قازىرگى زامانعى ۇزدىك تۇرىك جازۋشىسى ورحان پامۋكتىڭ «مەنىڭ اتىم – قىزىل» اتتى رومانىندا بەينەلەۋ ونەرىنە ارنالعان تەرەڭ تانىم باۋرايدى. روماندا مينياتيۋرانىڭ قاس شەبەرى كەماليددين بەكزات پەن پارسىنىڭ ۇلى سۋرەتشىسى بەكزات يلليۋستراسياسىن سالعان ءنيزاميدىڭ پوەمالارى ءجيى اتالعان. جازۋشى بەكزاتتى «شەبەردىڭ شەبەرى، سۋرەتشىلەردىڭ پاديشاحى» دەپ اتايدى. بۇل كىتاپتان ادەبيەت پەن بەينەلەۋ ونەرىنىڭ وتە جاقىن، ءبىر-بىرىن تولىقتىراتىن قاسيەتتى ونەر ەكەنىن ابدەن ۇعۋعا بولادى. كەلەشەكتە ادەبي شىعارمالارعا يلليۋستراسيا سالۋدى ويلاپ ءجۇرمىن. بۇل رەتتە بەكزات، گيۋستاۆ دورە، لاتيف قازبەكوۆ سياقتى كۇشتى سۋرەتشىلەردىڭ شىعارماشىلىعى مەن ءۇشىن شامشىراق سياقتى. 2018 جىلى گەرمانيادان الماتى گەتە-ينستيتۋتىنىڭ ارنايى شاقىرتۋىمەن كەلگەن مامان توم ۆيببەرەنس وتكىزگەن سەمينارعا قاتىسىپ، سەرتيفيكات الىپ، كاسىبي شىڭدالۋ جولىندا ءبىر ادىم العا باستىم. كەلەشەكتە مىقتى يلليۋستراتور بولعىم كەلەدى. سوندىقتان تۇركيادا ماگيستراتۋرادا وقۋ ءۇشىن ءوتىنىش بەردىم.
-سۇحباتىڭىزعا كوپ راقمەت، 14-ناۋرىزدا بولاتىن كورمەڭىز ءساتتى ءوتسىن، ارماندارىڭىزعا جەتە بەرىڭىز!
وقىرماندار نازارىنا: 14 نارىز كۇنى يۋنۋس ەمرە تۇرىك مادەنيەت ورتالىعىنىڭ ۇيىمداستىرۋىمەن قازاق ۇلتتىق ونەر ۋنيۆەرسيتەتىنىڭ 5 كۋرس ستۋدەنتى نازەركە كەمەلبايەۆانىڭ جەكە سۋرەت كورمەسى وتەدى. «قازاقستاندىقتاردىڭ كوزىمەن تۇركيا» اتتى كورمە ساعات: 15.00-دە باستالادى. كەلەم دەۋشىلەرگە ەسىك اشىق.
مەكەن-جاي: استانا، تۇران داڭعىلى 37، حان شاتىر وسو، 1 قابات، اتريۋم زالى.
